രാജ്യത്ത് പെട്രോൾ, ‍‍ഡീസൽ വാഹനങ്ങൾക്ക് കടുത്ത നിരോധനം ഏർപ്പെടുത്താനുള്ള പദ്ധതികളാണ് നിതി ആയോ​ഗും റോഡ്, ഗതാഗത, മന്ത്രാലയവും കഴിഞ്ഞ ദിവസം നിർദേശിച്ചിരിക്കുന്നത്. പ്രതിസന്ധിയിലായിരിക്കുന്ന വാഹന വിപണിയെ കൂടുതൽ തളർത്തുന്നതാണ് ഈ തീരുമാനം. 2023 - 2025 ആകുന്നതോടെ ഇന്ത്യന്‍ നിരത്തുകളില്‍ നിന്ന് പെട്രോള്‍, ഡീസല്‍ ഇന്ധനം ഉപയോഗിക്കുന്ന ഇരുചക്ര, മുചക്ര വാഹനങ്ങള്‍ പിന്‍വിലക്കണമെന്നാണ് നീതി ആയോഗും കേന്ദ്ര ഗതാഗത വകുപ്പും നിർദ്ദേശിച്ചിരിക്കുന്നത്.

എന്നാൽ ഇത്തരമൊരു നീക്കത്തിന് കേന്ദ്രം ഇതുവരെ സമയപരിധി നിശ്ചയിച്ചിട്ടില്ലെന്നാണ് ധനമന്ത്രി നിർമ്മല സീതാരാമൻ വ്യക്തമാക്കിയിരിക്കുന്നത്. ഇക്കാര്യം സംബന്ധിച്ച് വളരെയധികം ചർച്ചകൾ നടക്കുന്നുണ്ടെങ്കിലും സമയ പരിധി സർക്കാർ നിശ്ചയിച്ചിട്ടില്ലെന്നാണ് ധനമന്ത്രി വ്യക്തമാക്കിയത്. പരമ്പരാഗത വാഹനങ്ങൾക്ക് നിരോധനം ഏർപ്പെടുത്തിയാൽ തങ്ങളുടെ നിക്ഷേപത്തിന് ഭീഷണിയാകുമോ എന്നാണ് ഇപ്പോൾ വാഹന നിർമാതാക്കളുടെ ആശങ്ക. പ്രത്യേകിച്ച്, ഇരുചക്ര, മുച്ചക്ര വാഹനക്കാരാണ് പ്രതിസന്ധിയിലായിരിക്കുന്നത്.

അടുത്ത മൂന്ന് വര്‍ഷം കൊണ്ട് മലിനീകരണ നിയന്ത്രണ ചട്ടപ്രകാരം വാഹനങ്ങള്‍ ബിഎസ് നാലില്‍ നിന്ന് ബിഎസ് ആറിലേക്ക് ഉയര്‍ത്തണമെന്നാണ് സര്‍ക്കാരിന്റെ നിര്‍ദ്ദേശം. ഇത് നടപ്പാക്കാന്‍ തന്നെ വന്‍ നിക്ഷേപം ആവശ്യമാണ്. ഇതിനിടെ 2023 ഓടെ പൂര്‍ണമായും വൈദ്യുത വാഹനങ്ങളിലേക്ക് മാറ്റാനാണ് സർക്കാർ ശ്രമിക്കുന്നതെങ്കിൽ നഷ്ടം വര്‍ധിക്കുമെന്നാണ് വാഹന നിര്‍മാതാക്കളുടെ ആശങ്ക.

ബാങ്കുകൾ ക്രെഡിറ്റ് മാനദണ്ഡങ്ങൾ ശക്തമാക്കിയതോടെ സെപ്റ്റംബർ മുതൽ വാഹന വിൽപ്പനയിൽ വൻ ഇടിവാണ് ഉണ്ടായിരിക്കുന്നത്.

malayalam.goodreturns.in