കൊച്ചി: പ്രമുഖ ബാങ്കിങ്ങ് ഇതര ധനകാര്യ സ്ഥാപനമായ ചോളമണ്ഡലം ഇന്‍വെസ്റ്റ്മെന്റ് ആന്റ് ഫിനാന്‍സ് കമ്പനി (ചോള) നടപ്പു സാമ്പത്തിക വര്‍ഷം ആദ്യപാദം 314 കോടിയുടെ ലാഭം നേടി. കഴിഞ്ഞ സാമ്പത്തിക വര്‍ഷം ഇതേ കാലയളവില്‍ കമ്പനിയുടെ അറ്റാദായം 285 കോടിയായിരുന്നു. 10 ശതമാനം വളര്‍ച്ചയാണ് മുരുഗപ്പ ഗ്രൂപ്പിന് ഉടമസ്ഥതയിലുള്ള കമ്പനി ഇക്കുറി കാഴ്ച്ചവെച്ചത്.

ജൂണ്‍ 30ന് അവസാനിച്ച പാദത്തില്‍ കമ്പനിയുടെ മൊത്തം വരുമാനം 26 ശതമാനം വളര്‍ച്ചയോടെ 2,030 കോടിയായി ഉയര്‍ന്നു. കഴിഞ്ഞ സാമ്പത്തിക വര്‍ഷം ഇതേ കാലയളവില്‍ 1,606 കോടിയായിരുന്നു ആകെ വരുമാനം. നികുതിയ്ക്ക് മുന്‍പുള്ള ലാഭം 10 ശതമാനം വര്‍ധനവോടെ 483 കോടിയായി ഉയര്‍ന്നു.

ഈ വര്‍ഷം 22 ശതമാനം വളര്‍ച്ചയോടെ 8,572 കോടി രൂപയുടെ വിതരണമാണ് നടന്നത്. കഴിഞ്ഞ സാമ്പത്തിക വര്‍ഷം ആദ്യ പാദത്തില്‍ 7,014 കോടി രൂപയായിരുന്നു വിതരണം. 35 ശതമാനം വളര്‍ച്ചയോടെ 62,827 കോടിയുടെ ആസ്തിയും കമ്പനി കൈവരിച്ചു.