എച്ച്ഡിഎഫ്സി ഭവന വായ്പ പലിശ നിരക്ക് കുറച്ചു. ഇന്ന് മുതലാണ് പുതുക്കിയ നിരക്കുകൾ പ്രാബല്യത്തിൽ വരിക. ഭവന വായ്പാ പലിശ നിരക്ക് 10 ബേസിസ് പോയിൻറുകളാണ് കുറച്ചിരിക്കുന്നത്. സ്ത്രീകളിൽ നിന്ന് 30 ലക്ഷം രൂപ വരെയുള്ള വായ്പകൾക്ക് 8.55 ശതമാനം പലിശയാണ് ഈടാക്കുന്നത്. മറ്റുള്ളവരിൽ നിന്ന് ഭവന വായ്പയ്ക്ക് 8.60 ശതമാനം പലിശയും ഈടാക്കും.

30 ലക്ഷത്തിനും 75 ലക്ഷത്തിനും ഇടയിലുള്ള വായ്പകൾക്ക് 8.85 ശതമാനമാണ് പലിശ നിരക്ക്. 75 ലക്ഷത്തിന് മുകളിലുള്ള തുകയ്ക്ക് എച്ച്‍‍ഡിഎഫ്സി  8.90 ശതമാനം പലിശയും ഈടാക്കും. എന്നാൽ എല്ലാ കാലാവധികളിലുമുള്ള വായ്പകൾക്ക് വനിതാ വായ്പക്കാർക്ക് അഞ്ച് ബേസിസ് പോയിൻറ് കിഴിവ് നൽകും. ഇതനുസരിച്ച് ഒരു ലക്ഷം രൂപയുടെ ഇഎംഐയിൽ 7 രൂപയുടെ കുറവാണ് സ്ത്രീകൾക്ക് ലഭിക്കുന്നത്.

ജൂലൈയിൽ സ്റ്റേറ്റ് ബാങ്ക് ഓഫ് ഇന്ത്യയും ഒരു വർഷം കാലാവധിയുള്ള വായ്പകളുടെ പലിശ നിരക്ക് അഞ്ച് ബേസിസ് പോയിൻറ് കുറച്ചിരുന്നു. തുടർന്ന് ബാങ്ക് ഓഫ് ബറോഡയും ഭവന വായ്പയുടെ പലിശ നിരക്ക് കുറച്ചു. 10 ബേസിസ് പോയിൻറാണ് ബാങ്ക് ഓഫ് ബറോഡയും കുറച്ചത്.

ചൊവ്വാഴ്ച പൊതുമേഖലാ ബാങ്കായ യൂണിയൻ ബാങ്ക് ഓഫ് ഇന്ത്യ വായ്പാ പലിശ നിരക്കിൽ 20 ബേസിസ് പോയിൻറ് കുറവും വരുത്തിയിരുന്നു.

 malayalam.goodreturns.in