സംസ്ഥാനത്ത് ഇന്നും സ്വർണവില ഏറ്റവും പുതിയ റെക്കോർഡിൽ. ചരിത്രത്തിലെ ഏറ്റവും ഉയർന്ന വിലയാണ് സ്വർണത്തിന് ഇന്ന് കേരളത്തിൽ. പവന് 26,800 രൂപയും ഗ്രാമിന് 3,350 രൂപയുമാണ് ഇന്നത്തെ വില. ഇന്നലത്തേതിനേക്കാൾ പവന് 200 രൂപയാണ് ഇന്ന് വർദ്ധിച്ചിരിക്കുന്നത്. ഇന്നലെ ഗ്രാമിന് 3325 രൂപയും പവന് 26600 രൂപയുമായിരുന്നു വില.
ആഗോള വിപണി
ആഗോള വിപണിയിൽ ട്രോയ് ഔൺസ് സ്വർണ്ണത്തിന് 1,461.02 ഡോളറാണ് ഇന്നത്തെ നിരക്ക്. കഴിഞ്ഞ ഒരു വർഷത്തിനിടെ 20 ശതമാനത്തിന്റെ വർധനയാണ് ആഗോള സ്വർണ വിലയിൽ ഉണ്ടായിരിക്കുന്നത്. അമേരിക്കയും ചൈനയും തമ്മിലുള്ള വ്യാപാരയുദ്ധം മുറുകുന്നതും രൂപയുടെ മൂല്യത്തകർച്ചയും ഇന്ത്യൻ വിപണിയിൽ സ്വർണ്ണവില ഉയരാൻ ഇടയാക്കിയിട്ടുണ്ട്.
സ്വർണ ഫ്യൂച്ചറുകൾ
എംസിഎക്സിൽ ഒക്ടോബർ സ്വർണ്ണ ഫ്യൂച്ചറുകൾ 10 ഗ്രാമിന് 0.41 ശതമാനം അഥവാ 154 രൂപ കുറഞ്ഞ് 37,191 രൂപയിലെത്തി. തിങ്കളാഴ്ച സ്വർണ്ണ ഫ്യൂച്ചർ റെക്കോർഡ് ഉയർച്ചയിൽ എത്തിയിരുന്നു. ഇന്നലെ 37,437 രൂപയായിരുന്നു വില. വെള്ളിയുടെ വിലയും ഇന്ന് കുറഞ്ഞു. എംസിഎക്സിലെ സിൽവർ ഫ്യൂച്ചറുകൾ കിലോയ്ക്ക് 0.50 ശതമാനം അഥവാ 210 രൂപ കുറഞ്ഞ് 42,273 ഡോളറിലെത്തി.
വില വീണ്ടും കൂടും
കേരളത്തിൽ അടുത്ത രണ്ടാഴ്ചയ്ക്കുള്ളിൽ ഓണം, വിവാഹ സീസണുകൾ തുടങ്ങുന്നതിനാൽ വില വീണ്ടും കൂടാൻ സാധ്യതയുണ്ടെന്ന് വ്യാപാരികൾ പറയുന്നു. സ്വർണ്ണ വില കുതിച്ചുയരുന്നതിനാൽ ജ്വല്ലറികളിൽ വിൽപ്പനയിലും ഇടിവുണ്ടായിട്ടുണ്ട്. ഈ വർഷം ഇതുവരെ ഇത് 15 ശതമാനത്തിലധികമാണ് വിൽപ്പന കുറഞ്ഞിരിക്കുന്നത്.
സ്വര്ണം വാങ്ങാനുള്ള ശരിയായ സമയം എപ്പോഴാണന്നറിയോ?
വിൽപ്പന കൂടി
സ്വർണത്തിന്റെ വില കൂടിയതോടെ ധാരാളം ആളുകൾ പഴയ ആഭരണങ്ങൾ വിൽക്കാൻ ആരംഭിച്ചിട്ടുണ്ട്. കഴിഞ്ഞ മാസം മുതൽ സ്വർണാഭരണങ്ങൾ വിൽക്കുന്നവരുടെ എണ്ണത്തിൽ 10 മുതൽ 15 ശതമാനം വരെ വാർഷിക വർദ്ധനവുണ്ടായിട്ടുണ്ടെന്നും റിപ്പോർട്ടുണ്ട്. ആഭ്യന്തര സ്വർണ്ണ വിലയിൽ 12.5% ഇറക്കുമതി നികുതിയും 3% ജിഎസ്ടിയും ഉൾപ്പെടുന്നു.
സ്വർണം വാങ്ങാൻ പ്ലാനുണ്ടോ? പോക്കറ്റ് കാലിയാകും; സ്വർണ വിപണിയ്ക്ക് മോദിയുടെ അപ്രതീക്ഷിത തിരിച്ചടി
malayalam.goodreturns.in