ഇൻ‌ഫോസിസിന്റെ ഓസ്‌ട്രേലിയയിലെ വരുമാനം ഒരു ബില്യൺ ഡോളർ കടന്നു. ഇതോടെ ഓസ്ട്രേലിയ സോഫ്റ്റ്വെയർ സേവന കമ്പനിയായ ഇൻഫോസിസിന്റെ മൂന്നാമത്തെ വലിയ കയറ്റുമതി വിപണിയായി മാറി. ബംഗളൂരു ആസ്ഥാനമായുള്ള കമ്പനിയുടെ വരുമാനത്തിന്റെ 85% യുഎസ്, യൂറോപ്യൻ വിപണികളിൽ നിന്നാണ് ലഭിക്കുന്നത്.

ഓസ്‌ട്രേലിയയിൽ ഇപ്പോൾ സ്വന്തമായി ഒരു ബില്യൺ ഡോളറിലധികം ബിസിനസ് നേട്ടമുണ്ടെന്നും വളരെ വലിയ വിപണിയായി ഓസ്ട്രേലിയ മാറിയെന്നും ഇൻഫോസിസ് ചീഫ് എക്സിക്യൂട്ടീവ് ഓഫീസർ സലീൽ പരേഖ് വ്യക്തമാക്കി. ജപ്പാനിലും സിംഗപ്പൂരിലും കൂടുതൽ ബിസിനസ് വ്യാപിപ്പിക്കുമെന്നും ഇതോടെ കൂടുതൽ തൊഴിൽ അവസരങ്ങൾ ഇവിടെ ഉണ്ടാകുമെന്നും അദ്ദേഹം പറഞ്ഞു.

നിലവിൽ, ടെക് സർവീസ് കമ്പനിയായ ഇൻഫോസിന്റെ 61.65 ശതമാനം വരുമാനം യുഎസിൽ നിന്നും 23.6 ശതമാനം വരുമാനം യൂറോപ്പിൽ നിന്നുമാണ് നേടുന്നത്. ഏഷ്യാ പസഫിക് മേഖലയിലെ സർക്കാർ ഏജൻസികളുടെ ഡിജിറ്റൽ പരിവർത്തനത്തിലാണ് ഇനി ഇൻഫോസിസ് ശ്രദ്ധ കേന്ദ്രീകരിക്കുക. ബാങ്കിംഗ്, ധനകാര്യ സേവനങ്ങൾ മറ്റൊരു പ്രധാന ബിസിനസ് വിഭാഗമാണ്.

ഓസ്‌ട്രേലിയയിൽ 1,200 തൊഴിലവസരങ്ങൾ സൃഷ്ടിക്കുമെന്ന് കഴിഞ്ഞ വർഷം ഇൻഫോസിസ് അറിയിച്ചിരുന്നു. എന്നാൽ ഓസ്‌ട്രേലിയ ഒരു ചെറിയ വിപണിയാണെന്നും ഐടി സേവനങ്ങൾക്ക് ഒരു ഘട്ടത്തിനപ്പുറം ഓസ്ട്രേലിയയിൽ വളരാൻ സാധിക്കില്ലെന്നുമാണ് അനലിസ്റ്റുകളുടെ വിലയിരുത്തൽ. ആർട്ടിഫിഷ്യൽ ഇന്റലിജൻസ്, ഡാറ്റാ അനലിറ്റിക്‌സ് തുടങ്ങിയ ഡിജിറ്റൽ സാങ്കേതിക മേഖലകളിലും ഇൻഫോസിസ് കൂടുതൽ പുതുമകൾ കൊണ്ടുവരാനുള്ള ശ്രമത്തിലാണ്.

malayalam.goodreturns.in