സാമ്പത്തിക മാന്ദ്യം ഉടൻ

അടുത്ത 12 മാസത്തിനുള്ളിൽ ആഗോള സാമ്പത്തിക മാന്ദ്യം പ്രതീക്ഷിക്കുന്നുണ്ടെന്നാണ് ഫണ്ട് മാനേജർമാരുടെ ഏറ്റവും പുതിയ സർവേയിൽ വ്യക്തമാക്കിയിരിക്കുന്നത്. 2011 ന് ശേഷം ഏറ്റവും ഉയർന്ന നിരക്കിലാണ് സാമ്പത്തിക മാന്ദ്യ സാധ്യതകൾ. കഴിഞ്ഞയാഴ്ച, യു‌എസിന്റെ നേട്ടം കുറഞ്ഞതോടെ സ്വർണ വില റെക്കോർഡ് ഉയരത്തിലെത്തി.

യുഎസ് സമ്പദ്‌വ്യവസ്ഥ

യുഎസ് സമ്പദ്‌വ്യവസ്ഥ മാന്ദ്യത്തിലേക്ക് നയിക്കുന്നുവെന്ന മുന്നറിയിപ്പാണ് നിലവിൽ സാമ്പത്തിക വിദ​ഗ്ധർ ചർച്ച ചെയ്യുന്നത്. മാന്ദ്യ സാധ്യതകളെക്കുറിച്ചുള്ള ചർച്ചകൾ ആരംഭിച്ചതോടെ നിക്ഷേപകർ സുരക്ഷിത നിക്ഷേപ മാർ​ഗമായ സ്വർണത്തിൽ അഭയം തേടാൻ തുടങ്ങി. ആ​ഗോള വിപണിയിൽ സ്വർണ വില കുതിച്ചുയർന്നിട്ടും നിക്ഷേപം നടത്തുന്നവരുടെ എണ്ണം വളരെ കൂടുതലാണ്.

സ്വർണ വില കൂടാൻ കാരണം

ആഗോള മാന്ദ്യത്തെ ഭയന്ന് നിക്ഷേപകർ അവരുടെ ആസ്തികൾ വൈവിധ്യവത്കരിക്കാൻ ആരംഭിച്ചെന്നും അതിനാലാണ് സ്വർണ വില ഉയരുന്നതെന്നും സാമ്പത്തിക വിദ​ഗ്ധർ പറയുന്നു. വിലയിലെ കുതിച്ചുചാട്ടം താൽക്കാലികമല്ലെന്നും, ഭാവിയിലെ വിലയുടെ പാത നയപരമായ പ്രഖ്യാപനത്തെ ആശ്രയിച്ചിരിക്കുമെന്നും അഹമ്മദാബാദിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്‌മെന്റിന്റെ ഇന്ത്യ ഗോൾഡ് പോളിസി സെന്റർ മേധാവി സുധീഷ് നമ്പിയത്ത് പറഞ്ഞു.

യുഎസ് - ചൈന വ്യാപാര യുദ്ധം

യുഎസ് - ചൈന വ്യാപാര യുദ്ധമാണ് ആഗോള സമ്പദ്‌വ്യവസ്ഥയെക്കുറിച്ചുള്ള ആശങ്കകൾ രൂക്ഷമാക്കുന്ന മറ്റൊരു കാര്യം. നിക്ഷേപകർ സ്വർണത്തിലേയ്ക്ക് ശ്രദ്ധ കേന്ദ്രീകരിക്കാനുള്ള പ്രധാന കാരണവും ഇതാണ്. കൂടാതെ, സെൻ‌ട്രൽ ബാങ്കുകളും സ്വർണം വാങ്ങാൻ ആരംഭിച്ചിട്ടുണ്ട്. 2019 രണ്ടാം പാദത്തിൽ സെൻട്രൽ ബാങ്കുകൾ 224.4 ടൺ സ്വർണം വാങ്ങിയതായാണ് ലോക ഗോൾഡ് കൗൺസിലിന്റെ ഏറ്റവും പുതിയ റിപ്പോർട്ട്.

ആ​ഗോള സ്വർണ വില

നിലവിലെ സ്വർണ്ണ വില ഔൺസിന് 1,515.10 ഡോളറാണ്. 2011 സെപ്റ്റംബറിൽ ചരിത്രത്തിലെ തന്നെ ഏറ്റവും ഉയർന്ന വിലയായ 1,921.15 ഡോളറായി സ്വർണ വില ഉയർന്നിരുന്നു. രൂപ അടിസ്ഥാനത്തിൽ, കഴിഞ്ഞയാഴ്ച സ്വർണ വില എക്കാലത്തെയും ഉയർന്ന നിരക്കായ 10 ​ഗ്രാമിന് 37,799 രൂപ വരെ ഉയർന്നിരുന്നു. നിലവിൽ 10 ​ഗ്രാമിന് 37,476 രൂപയാണ് വില.