അബുദാബി: ഇന്ത്യയുടെ സ്വന്തം 'റുപേ' കാര്‍ഡ് നിലവില്‍വരുന്ന ഗള്‍ഫ് രാജ്യങ്ങളാകാനൊരുങ്ങി യുഎഇയും ബഹ്റൈനും . പ്രധാനമന്ത്രി നരേന്ദ്രമോദി അടുത്തയാഴ്ച യുഎഇ സന്ദര്‍ശിക്കുമ്പോള്‍ ഇത് സംബന്ധിച്ച ഔദ്യോഗിക പ്രഖ്യാപനമുണ്ടാകുമെന്ന് യുഎഇയിലെ ഇന്ത്യന്‍ അംബാസഡര്‍ നവദീപ് സിങ് സുരി അറിയിച്ചു.

വിസ, മാസ്റ്റര്‍കാര്‍ഡ് തുടങ്ങിയവയ്ക്ക് ബദലാണ് ഇന്ത്യയുടെ റുപേകാര്‍ഡ്. റുപേ കാര്‍ഡിന്റെ ഉപയോഗം സാധ്യമാക്കുന്നതിന് നാഷണല്‍ പേയ്‌മെന്റ് കോര്‍പറേഷന്‍ ഓഫ് ഇന്ത്യയും യുഎഇയിലെ മെര്‍ക്കുറി പേയ്‌മെന്റും ധാരണാപത്രം ഒപ്പുവെയ്ക്കും. ഇതോടെ യുഎഇയിലെ പി.ഒ.എസ് ടെര്‍മിനലുകളില്‍ റുപേ കാര്‍ഡുകള്‍ ഉപയോഗിക്കാന്‍ സാധിക്കുമെന്ന് നവദീപ് സിങ് സുരി പറഞ്ഞു.അയല്‍ക്കാരുമായുള്ള ഡിജിറ്റല്‍ പേയ്മെന്റുകള്‍, വ്യാപാരം, ടൂറിസം എന്നിവയില്‍ ഇന്ത്യയുടെ ബന്ധം ശക്തിപ്പെടുത്തുകയെന്നതാണ് ഈ നീക്കത്തിന് പിന്നിലെതെന്ന് അധികൃതര്‍ പറഞ്ഞു.

ഗള്‍ഫ്, അറബ് രാജ്യങ്ങളുമായുള്ള ഞങ്ങളുടെ ഇടപഴകല്‍ അങ്ങേയറ്റം കരുത്തുറ്റതും എല്ലായ്‌പ്പോഴും ഉയര്‍ന്നതുമാണ്. ഇസ്ലാമിക ലോകവുമായി ഞങ്ങള്‍ക്ക് നല്ല ബന്ധമുണ്ട്, ''വിദേശകാര്യ മന്ത്രാലയം സെക്രട്ടറി (എക്‌സ്റ്റേണല്‍ റിലേഷന്‍സ്) ടി എസ് തിരുമൂര്‍ത്തി പറഞ്ഞു.വിനോദസഞ്ചാരം അടക്കമുള്ള മേഖലകളില്‍ ഇത് സഹായമാകും. നിലവില്‍ സിംഗപ്പൂരിലും ഭൂട്ടാനിലുമാണ് ഇന്ത്യയ്ക്ക് പുറത്ത് റുപേ കാര്‍ഡുകള്‍ ഉപയോഗിക്കാനാവുന്നത്. പ്രധാനമന്ത്രി നരേന്ദ്രമോദിയുടെ യുഎഇ സന്ദര്‍ശനത്തോടെ ഇരു രാജ്യങ്ങള്‍ക്കുമിടയില്‍ വിവിധ രംഗങ്ങളിലുള്ള സഹകരം കൂടുതല്‍ ശക്തമാകുമെന്നും നവദീപ് സിങ് സുരി പറഞ്ഞു.

യുഎഇയില്‍ മോദിയെ അബുദാബി കിരീടാവകാശി ഷെയ്ഖ് മുഹമ്മദ് ബിന്‍ സായിദ് അല്‍ നഹ്യാന്‍ സന്ദര്‍ശിക്കും. പരസ്പര താല്‍പ്പര്യമുള്ള ഉഭയകക്ഷി, പ്രാദേശിക, അന്തര്‍ദേശീയ കാര്യങ്ങള്‍ ചര്‍ച്ച ചെയ്‌തേക്കുംഇരുരാജ്യങ്ങളും തമ്മിലുള്ള ഉഭയകക്ഷി ബന്ധം ഊട്ടിയുറപ്പിക്കുന്നതിനുള്ള നേതൃത്വത്തിന് ഈ വര്‍ഷം ആദ്യം പ്രഖ്യാപിച്ച യുഎഇയിലെ ഏറ്റവും ഉയര്‍ന്ന സിവില്‍ ഡെക്കറേഷന്‍ ആയ ഓര്‍ഡര്‍ ഓഫ് സായിദ് പ്രധാനമന്ത്രിക്ക് നല്‍കും.