ബജറ്റില് അതിസമ്പന്നര്ക്ക് ഏര്പ്പെടുത്തിയ അധിക സര്ചാര്ജില് നിന്ന് ഓഹരി വിപണിയിലെ വിദേശ നിക്ഷേപകരെ ഒഴിവാക്കുമെന്ന് കേന്ദ്ര ധനന്ത്രി നിര്മല സീതാരാമന്. ഇന്ത്യന് ഓഹരി വിപണിക്കും രൂപയ്ക്കും സംഭവിച്ചുകൊണ്ടിരിക്കുന്ന തകര്ച്ച പ്രതിരോധിക്കാന് പുതിയ നീക്കത്തിന് കഴിയുമെന്നാണ് കേന്ദ്ര സര്ക്കാരിന്റെ പ്രതീക്ഷ. അതിസമ്പന്ന നികുതി ഒഴിവാക്കുന്നതോടെ വിദേശ നിക്ഷേപകരുടെ ആത്മവിശ്വാസം വര്ധിക്കും. കൂടുതല് വിദേശ നിക്ഷേപകര് ഇന്ത്യന് ഓഹരി വിപണിയിലേക്ക് വരും. ഇതുവഴി ഓഹരി വിപണിയിലെ തകര്ച്ച മറിക്കടക്കാനാവുമെന്ന് ധനമന്ത്രാലയം കരുതുന്നു. ഇന്ന് ദില്ലിയില് വിളിച്ചുച്ചേര്ത്ത പത്രസമ്മേളനത്തിലാണ് ധനമന്ത്രി നിര്മല സീതാരാമന് ഇക്കാര്യം അറിയിച്ചത്.
നേരത്തെ നിര്മല സീതാരാമന് അവതരിപ്പിച്ച 2019-20 ബജറ്റിലാണ് അതിസമ്പന്നര്ക്ക് അധിക നികുതി ഏര്പെടുത്തുന്നതിനുള്ള നിര്ദ്ദേശം ഉള്പ്പെടുത്തിയത്. രണ്ടു കോടിക്കും അഞ്ചു കോടിക്കും ഇടയില് വരുമാനമുള്ളവര്ക്ക് 25 ശതമാനവും അഞ്ചു കോടിക്ക് മുകളില് വരുമാനമുള്ളവര്ക്ക് 37 ശതമാനവും അതിസമ്പന്ന നികുതി ധനമന്ത്രാലയം നിശ്ചയിക്കുകയായിരുന്നു. ഇതോടെ ഓഹരി വിപണിയിലെ വിദേശ നിക്ഷേപകര്ക്കും അതിസമ്പന്ന നികുതി ബാധകമായി. ജൂലായില് മാത്രം ഇന്ത്യന് ഓഹരി കമ്പോളത്തില് നിന്ന് ഏകദേശം 180 കോടി ഡോളര് വിദേശ നിക്ഷേപകര് പിന്വലിച്ചതായാണ് വിവരം. എന്തായാലും അതിസമ്പന്ന നികുതിയില് നിന്നും വിദേശ നിക്ഷേപകരെ ഒഴിവാക്കാനുള്ള കേന്ദ്ര തീരുമാനം ഓഹരി വിപണിയിലെ തകര്ച്ചയ്ക്ക് ആശ്വാസമാവും.