Click it and Unblock the Notifications
ആഗോള വളര്ച്ചാനിരക്ക് താഴേക്കാണെങ്കിലും അമേരിക്കയെയും ചൈനയെയും അപേക്ഷിച്ച് ഇന്ത്യ ഏറെ മെച്ചപ്പെട്ട നിലയിലെന്ന് കേന്ദ്ര ധനമന്ത്രി നിര്മല സീതാരാമന്. അമേരിക്കയും ചൈനയും തമ്മില് നടക്കുന്ന വ്യാപാരയുദ്ധം ആഗോള സാമ്പത്തിക പ്രതിസന്ധിക്കുള്ള മൂലകാരണമായി ധനമന്ത്രി ചൂണ്ടിക്കാട്ടി. സാഹചര്യങ്ങള് ആശങ്കജനകമെങ്കിലും മറ്റു രാഷ്ട്രങ്ങളെ അപേക്ഷിച്ച് ഇന്ത്യ ബഹുദൂരം മുന്നിലാണെന്ന് നിര്മല സീതാരാമന് വ്യക്തമാക്കി.
രാജ്യം നേരിട്ടുകൊണ്ടിരിക്കുന്ന സാമ്പത്തിക പ്രതിസന്ധി മറികടക്കാന് കേന്ദ്രം ആവിഷ്കരിച്ചിരിക്കുന്ന തീരുമാനങ്ങളും ദില്ലിയില് നടന്ന വാര്ത്താ സമ്മേളനത്തില് ധനമന്ത്രി വിവരിച്ചു. ഓഹരിയടക്കം വന്കിട നിക്ഷേപങ്ങള്ക്ക് സര്ചാര്ജ് ഈടാക്കാനുള്ള നടപടി സര്ക്കാര് റദ്ദാക്കി. കഴിഞ്ഞ ബജറ്റിലായിരുന്നു വന്കിട നിക്ഷേങ്ങള്ക്ക് അതിസമ്പന്ന നികുതി ഏര്പ്പെടുത്താന് കേന്ദ്രം തീരുമാനിച്ചത്. പുതിയ തീരുമാനം വിദേശ, ആഭ്യന്തര നിക്ഷേപകര്ക്ക് ഒരുപോലെ ഗുണം ചെയ്യും.
സൂക്ഷ്മ, ചെറുകിട, ഇടത്തരം വ്യവസായങ്ങള്ക്ക് അതിവേഗ ജിഎസ്ടി റീഫണ്ടിങ്ങ് ഉറപ്പാക്കുമെന്നും നിര്മല സീതാരാന് ഇന്നറിയിച്ചു. മുടങ്ങിക്കിടക്കുന്ന റീഫണ്ടുകളെല്ലാം മുപ്പതു ദിവസത്തിനുള്ളതില് തീര്പ്പാക്കും. ഇനി മുതല് 60 ദിവസത്തിനകം റീഫണ്ടിങ് നടപടികള് പൂര്ത്തിയാവുമെന്നും മന്ത്രി കൂട്ടിച്ചേര്ത്തു. ജിഎസ്ടി നിരക്കുകള് ലളിതമാക്കാനും ഫോമുകളുടെ എണ്ണം കുറയ്ക്കാനും സര്ക്കാര് തീരുമാനിച്ചിട്ടുണ്ട്. 16 വകുപ്പുകളില് പ്രോസിക്യൂഷന് പകരം പിഴയാണ് ഇനി ഈടാക്കുക.
പലിശ നിരക്കിലെ ഇളവുകള് ജനങ്ങളിലേക്ക് എത്തിക്കാന് ബാങ്കുകള് സമ്മതിച്ചതായി കേന്ദ്ര ധനമന്ത്രി നിര്മല സീതാരാമന് പറഞ്ഞു. റിസര്വ് ബാങ്കിന്റെ ധനനയസമിതി ബാങ്കുകള്ക്ക് പ്രഖ്യാപിക്കുന്ന പലിശയിളവിന്റെ ആനുകൂല്യങ്ങള് ജനങ്ങള്ക്ക് ലഭിക്കുന്നില്ലെന്നാണ് ഇതുവരെ കേട്ട പരാതി. എന്നാല് പലിശയിലെ വ്യത്യാസം എല്ലാം വായ്പകള്ക്കും ലഭ്യമാക്കാന് രാജ്യത്തെ ബാങ്കുകള് സമ്മതിച്ചതായി മന്ത്രി വ്യക്തമാക്കി. ഇതോടെ ഭവന വായ്പയടക്കമുള്ള എല്ലാ വായ്പകള്ക്കും പലിശ കുറയും.
വായ്പാ അപേക്ഷകളുടെ പുരോഗതി ഓണ്ലൈനില് പരിശോധിക്കാനുള്ള സംവിധാനവും കേന്ദ്ര നടപ്പിലാക്കും. വായ്പ തിരിച്ചടച്ചാല് 15 ദിവസത്തിനകം രേഖകളെല്ലാം ഉടമയ്ക്ക് തിരികെ നല്കണെന്ന വ്യവസ്ഥ നടപ്പിലാക്കാനും സര്ക്കാര് തീരുമാനിച്ചിട്ടുണ്ട്.
ഒക്ടോബര് ഒന്നു മുതല് ആദായനികുതി നോട്ടീസുകളും സമന്സുകളുമെല്ലാം കേന്ദ്രീകൃത സംവിധാനം മുഖേനയാകും അയക്കുക. എല്ലാം നോട്ടീസുകളും മറുപടി ലഭിച്ച് മൂന്നുമാസത്തിനകം തീര്പ്പാക്കണമെന്ന വ്യവസ്ഥയും കേന്ദ്രം നടപ്പിലാക്കും.
Sign in with Google