ഡോളറിനെതിരെ രൂപയ്ക്ക് വന്‍ തകര്‍ച്ച

ഇന്ത്യന്‍ രൂപയ്ക്ക് വന്‍ മൂല്യത്തകര്‍ച്ച. അമേരിക്കന്‍ ഡോളറിനെതിരെ 72.03 എന്ന നിലയിലേക്ക് രൂപ ഇന്ന് കൂപ്പുകുത്തി. 2018 ഡിസംബറിന് ശേഷമുള്ള ഏറ്റവും താഴ്ന്ന നിലവാരമാണിത്. ഡോളറിനെതിരെ 15 പൈസ നഷ്ടത്തില്‍, 71.97 എന്ന നിലയ്ക്കാണ് രൂപ രാവിലെ വ്യാപാരം തുടങ്ങിയത്. ഇന്നലെ 71.82 എന്ന നിലയ്ക്ക് രൂപ വ്യാപാരം അവസാനിപ്പിക്കുകയായിരുന്നു.

കഴിഞ്ഞ ആറു വര്‍ഷത്തിനിടെയുള്ള ഏറ്റവും വലിയ പ്രതിമാസ മൂല്യത്തകര്‍ച്ചയാണ് രൂപയെ ഇപ്പോള്‍ കാത്തിരിക്കുന്നത്. ഓഗസ്റ്റ് മാസം ഇതുവരെ 4.6 ശതമാനത്തിലേറെ വീഴ്ച്ച രൂപയ്ക്ക് സംഭവിച്ചു കഴിഞ്ഞു. 2019 വര്‍ഷം വിലയിരുത്തിയാല്‍ 3.10 ശതമാനം തകര്‍ച്ച രൂപ നേരിട്ടത് കാണാം.

അമേരിക്ക – ചൈന വ്യാപാരത്തര്‍ക്കവും ചൈനീസ് കറന്‍സിയായ യുവാന്റെ മൂല്യത്തകര്‍ച്ചയും രൂപയുടെ വീഴ്ച്ചയ്ക്കുള്ള കാരണങ്ങളാണ്. കഴിഞ്ഞ 11 വര്‍ഷത്തെ ഏറ്റവും വലിയ പ്രതിസന്ധിയിലൂടെയാണ് യുവാന്‍ കടന്നുപോകുന്നത്. ചൈനയില്‍ നിന്നുള്ള കൂടുതല്‍ ഉത്പന്നങ്ങള്‍ക്ക് സെപ്തംബര്‍ ഒന്നു മുതല്‍ പത്തു ശതമാനം ഇറക്കുമതി തീരുവ ചുമത്തുമെന്ന അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ പ്രസ്താവനയാണ് വ്യാപാരയുദ്ധം മുറുകാന്‍ കാരണം.

ഇതോടെ യുവാന്റെ മൂല്യം കൂപ്പുകുത്തി. ഡോളറിനെതിരെ 7.09 എന്ന നിലയിലാണ് യുവാന്‍ തുടരുന്നത്. എന്തായാലും രൂപയുടെ മൂല്യം ഇടിയുന്ന സാഹചര്യം രാജ്യത്ത് വിലക്കയറ്റത്തിന് വഴിയൊരുക്കും. ഇതേസമയം കയറ്റുമതിക്കാര്‍ക്ക് രൂപയുടെ വിലയിടിവ് നേട്ടമാണെന്നും ഇവിടെ പ്രത്യേകം പരാമര്‍ശിക്കണം.