എം‌സി‌എക്‌സിലെ വില

എം‌സി‌എക്‌സിലെ ഒക്ടോബർ സ്വർണ്ണ ഫ്യൂച്ചറുകളുടെ വില 10 ഗ്രാമിന് 0.22 ശതമാനം ഉയർന്ന് 39,251 രൂപയിലെത്തി. ഈ ആഴ്ച ആദ്യം 39,340 രൂപ വരെ എത്തിയിരുന്നു. എം‌സി‌എക്‌സിലെ സിൽവർ ഫ്യൂച്ചറുകൾ കിലോഗ്രാമിന് 0.42 ശതമാനം ഉയർന്ന് 46,841 രൂപയിലെത്തി. ഇന്നലെ റെക്കോർഡ് വിലയായ 46,925 രൂപയാണ് വെള്ളിയ്ക്ക് രേഖപ്പെടുത്തിയത്. രൂപയുടെ മൂല്യം ഇടിഞ്ഞതാണ് സ്വർണ്ണം, വെള്ളി വിലകളെ ഇന്ത്യൻ വിപണികളിലെ റെക്കോഡ് ഉയരത്തിലെത്തിച്ചത്.

ആഗോള വിപണി

ആഗോള വിപണിയിൽ സ്വർണം ഔൺസിന് 1,540 ഡോളറിലെത്തി. ആറ് വർഷത്തെ ഏറ്റവും ഉയർന്ന നിരക്കായ 1,556 ഡോളർ കഴിഞ്ഞ ആഴ്ച്ച രേഖപ്പെടുത്തിയിരുന്നു. അതേസമയം, വെള്ളി വില 0.85 ശതമാനം ഉയർന്ന് രണ്ട് വർഷത്തെ ഏറ്റവും ഉയർന്ന നിരക്കായ ഔൺസിന് 18.32 ഡോളറിലെത്തി.

വില കൂടാൻ കാരണം

യുഎസ് - ചൈന വ്യാപാര പിരിമുറുക്കങ്ങൾ വർദ്ധിച്ചതും ആഗോള മാന്ദ്യത്തിന്റെ ആശങ്കകൾ നിലനിൽക്കുന്നതുമാണ് ഈ വർഷം സ്വർണത്തിന്റെ വില ഇത്രയും ഉയരാൻ കാരണം. ഈ വർഷം ഇതുവരെ സ്വർണ വില 20 ശതമാനത്തിലധികമാണ് ഉയർന്നിരിക്കുന്നത്. ആഗോള ധനവിപണിയിലെ പ്രതിസന്ധിയും ഇക്വിറ്റി മാർക്കറ്റുകളിലെയും കറൻസി മാർക്കറ്റുകളിലെയും ചാഞ്ചാട്ടവും മൾട്ടി ലോ ബോണ്ട് വരുമാനവും നിക്ഷേപകരെ സ്വർണ്ണ ഇടിഎഫുകളിലേക്ക് അടുപ്പിക്കാനും കാരണമായി.

സ്വർണം വാങ്ങൽ

ലോകമെമ്പാടുമുള്ള പല സെൻ‌ട്രൽ ബാങ്കുകളും സ്വർണം വാങ്ങുന്നതും ധനകാര്യ സ്ഥാപനങ്ങൾ തങ്ങളുടെ ഹോൾഡിംഗ് വൈവിധ്യവത്കരിക്കാൻ ശ്രമിക്കുന്നതും സ്വർണത്തിന്റെ വില വർദ്ധനവിനെ പിന്തുണച്ചിട്ടുണ്ടെന്ന് വിദഗ്ധർ പറയുന്നു. എന്നാൽ ഇന്ത്യയിൽ സ്വർണ വില ഉയർന്നതോടെ പലരും കൈയിലുള്ള സ്വർണം വിൽക്കാനുള്ള ശ്രമത്തിലാണ്.