റിസര്വ് ബാങ്കിന്റെ വാര്ഷിക റിപ്പോര്ട്ട് പുറത്തുവന്നിരിക്കുന്നു. നടപ്പു സാമ്പത്തികവര്ഷം വളര്ച്ചാനിരക്ക് തിരിച്ചുപിടിക്കലാണ് റിസര്വ് ബാങ്ക് ഓഫ് ഇന്ത്യയുടെ പ്രധാന അജണ്ട. ഉപഭോഗ ഡിമാന്ഡും സ്വകാര്യ നിക്ഷേപവും പുനരുജ്ജീവപ്പിക്കാനുള്ള നടപടികള്ക്കും റിപ്പോര്ട്ട് ഊന്നല് നല്കുന്നുണ്ട്.
നിലവില് 6.9 ശതമാനം ജിഡിപി വളര്ച്ചയാണ് കേന്ദ്ര ബാങ്ക് പ്രവചിക്കുന്നത്. 2019-20 സാമ്പത്തികവര്ഷം ആദ്യപാദം ജിഡിപി വളര്ച്ച 5.8 ശതമാനം മുതല് 6.6 ശതമാനം വരെ കുറിക്കാം. 7.3 ശതമാനം മുതല് 7.5 ശതമാനം വരെയാണ് രണ്ടാംപാദത്തില് റിസര്വ് ബാങ്ക് പ്രതീക്ഷിക്കുന്ന ജിഡിപി വളര്ച്ചാ നിരക്ക്.
ഈ അവസരത്തില് റിസര്വ് ബാങ്ക് ഓഫ് ഇന്ത്യയുടെ വാര്ഷിക റിപ്പോര്ട്ടില് പ്രതിപാദിക്കുന്ന നിര്ണായക വിലയിരുത്തലുകള് ചുവടെ പരിശോധിക്കാം.
1. രാജ്യത്ത് കറന്സിയുടെ ഉപയോഗം 17 ശതമാനം കൂടി. കറന്സിയുടെ ആകെ മൂല്യം 21.10 ട്രില്യണ് രൂപയില് എത്തിനില്ക്കുന്നു.
2. ഇന്ത്യയുടെ സമ്പദ്ഘടനയുടെ സമീപകാല ചിത്രത്തില് അനിശ്ചിതത്വങ്ങള് ഏറെയുണ്ട്.
3. ആഭ്യന്തര ഡിമാന്ഡ് വളരെയേറെ കുറഞ്ഞു. സ്വകാര്യ നിക്ഷേപവും ഉപഭോഗവും കൂട്ടാന് അടിയന്തര നടപടികള് കൈക്കൊള്ളണം.
4. IL & FS പ്രതിസന്ധിക്ക് ശേഷം വാണിജ്യ മേഖലയ്ക്ക് ബാങ്കിതര സാമ്പത്തിക സേവന മേഖല നല്കിവരുന്ന വായ്പാ സഹായങ്ങള് 20 ശതമാനത്തോളം കുറഞ്ഞു.
5. നടപ്പു സാമ്പത്തികവര്ഷം ഇതുവരെ 6,801 തട്ടിപ്പു കേസുകള് ബാങ്കുകള് റിപ്പോര്ട്ട് ചെയ്തു. 71,542.93 കോടി രൂപയാണ് ഈ ഇനത്തില് ബാങ്കുകള്ക്ക് നഷ്ടം സംഭവിച്ചിരിക്കുന്നത്.
6. അധിക കരുതല് ധനത്തില് നിന്നും 52,637 കോടി രൂപ സര്ക്കാരിന് കൈമാറി സാഹചര്യത്തില്, റിസര്വ് ബാങ്കിന്റെ കരുതല് ധനം 1,96,344 കോടി രൂപയില് എത്തിനില്ക്കുകയാണ്.
7. കഴിഞ്ഞ സാമ്പത്തികവര്ഷം റിസര്വ് ബാങ്കിന്റെ കരുതല് ധനം 2.32 ലക്ഷം കോടി രൂപയായിരുന്നു. നടപ്പു സാമ്പത്തികവര്ഷമിത് 1.96 ലക്ഷം കോടി രൂപയായി ചുരുങ്ങി.