Click it and Unblock the Notifications
ദില്ലി: ഓണ്ലൈന് വഴി ബുക്ക് ചെയ്യുന്ന ട്രെയിന് ടിക്കറ്റുകള്ക്ക് സെപ്തംബര് ഒന്നു മുതല് ചെലവ് കൂടും. ഇ-ടിക്കറ്റുകള്ക്ക് സര്വീസ് നിരക്ക് ഈടാക്കാന് ഇന്ത്യന് റെയില്വേ തീരുമാനിച്ചു. നോണ്-എസി ക്ലാസ് ടിക്കറ്റുകള്ക്ക് 15 രൂപയാണ് സര്വീസ് നിരക്ക്. എസി ക്ലാസ് ടിക്കറ്റുകള്ക്ക് സര്വീസ് നിരക്ക് 30 രൂപയായി ഉയരും. ഓഗസ്റ്റ് 30 -ന് പുറത്തിറക്കിയ ഉത്തരവിലാണ് ഇ-ടിക്കറ്റുകള്ക്ക് സര്വീസ് നിരക്ക് ഈടാക്കുമെന്ന കാര്യം ഐആര്സിടിസി വ്യക്തമാക്കിയത്.
സര്വീസ് നിരക്കിന് പുറമെ ജിഎസ്ടി നിരക്കും ഓണ്ലൈന് വഴി ബുക്ക് ചെയ്യുന്ന ടിക്കറ്റുകള്ക്ക് ബാധകമാണ്. മൂന്നു വര്ഷം മുന്പാണ് ഇ-ടിക്കറ്റുകള്ക്കുള്ള സര്വീസ് നിരക്ക് ഇന്ത്യന് റെയില്വേ പിന്വലിച്ചത്. നരേന്ദ്ര മോദി സര്ക്കാര് കൊണ്ടുവന്ന ഡിജിറ്റല് പെയ്മെന്റ് പദ്ധതികള് പ്രോത്സാഹിപ്പിക്കുന്നതിന്റെ ഭാഗമായിരുന്നു ഈ നടപടി. ഓഗസ്റ്റ് ആദ്യവാരമാണ് ഓണ്ലൈന് വഴി ബുക്ക് ചെയ്യുന്ന ട്രെയിന് ടിക്കറ്റുകള്ക്ക് സര്വീസ് നിരക്ക് പുനഃസ്ഥാപിക്കാനുള്ള അനുമതി ഐആര്സിടിക്ക് (ഇന്ത്യന് റെയില്വേ കാറ്ററിങ് ആന്ഡ് ടൂറിസം കോര്പ്പറേഷന്) റെയില്വേ ബോര്ഡ് നല്കിയത്.
സര്വീസ് നിരക്കുകള് പുനഃസ്ഥാപിക്കുന്നതോടെ ഓണ്ലൈന് ബുക്കിങ് മേഖലയില് നേരിടുന്ന നഷ്ടം കുറയുമെന്നാണ് ഐര്സിടിസിയുടെ വിലയിരുത്തല്. സര്വീസ് ചാര്ജുകള് പിന്വലിച്ചതിനെ തുടര്ന്ന് 2016-17 സാമ്പത്തിക വര്ഷം ഓണ്ലൈന് വഴിയുള്ള ബുക്കിങ് വരുമാനത്തില് 26 ശതമാനം ഇടിവ് സംഭവിച്ചെന്ന് റെയില്വേ അധികൃതര് പറയുന്നു.
Sign in with Google