കേരളത്തിലെ വില

സംസ്ഥാനത്ത് സ്വർണ വില ഇന്ന് പവന് 120 രൂപ കുറഞ്ഞ് പവന് 27880 രൂപയ്ക്കാണ് വ്യാപാരം പുരോ​ഗമിക്കുന്നത്. ഗ്രാമിന് 3485 രൂപയാണ് വില. ഒരാഴ്ച കൊണ്ട് സ്വർണ വിലയിൽ പവന് 1240 രൂപയുടെ കുറവാണ് ഉണ്ടായിരിക്കുന്നത്. ഈ മാസം നാലിന് 29120 രൂപയുടെ റെക്കോർഡ് നിരക്കാണ് സ്വർണത്തിനുണ്ടായിരുന്നത്.

ആഭ്യന്തര വിപണി

എം‌സി‌എക്‌സിൽ ഒക്ടോബർ സ്വർണ്ണ ഫ്യൂച്ചർ വില ഇന്ന് 10 ഗ്രാമിന് 0.20 ശതമാനം കുറഞ്ഞ് 37,650 രൂപയിലെത്തി. കഴിഞ്ഞയാഴ്ചത്തെ ഏറ്റവും ഉയർന്ന നിരക്കായ 39,885 ൽ നിന്ന് 2,200 രൂപയാണ് ഇന്ന് കുറഞ്ഞിരിക്കുന്നത്. വെള്ളിക്കാണ് ഏറ്റവും കൂടുതൽ നഷ്ടം സംഭവിച്ചിരിക്കുന്നത്. എം‌സി‌എക്‌സിൽ വെള്ളി ഫ്യൂച്ചർ‌ വില ഇന്ന്‌ കിലോയ്ക്ക്‌ 0.2 ശതമാനം ഇടിഞ്ഞ്‌ 47,047 രൂപയിലെത്തി. വെള്ളി വില കഴിഞ്ഞയാഴ്ചത്തെ ഉയർന്ന നിരക്കായ 51,489 രൂപയിൽ നിന്ന് 8 ശതമാനമാണ് കുറഞ്ഞിരിക്കുന്നത്.

ആഗോള വിപണി

ആഗോള വിപണിയിൽ സ്വർണ വില ഇന്ന് ഔൺസിന് 1,499 ഡോളറായി കുറഞ്ഞു. വെള്ളി ഔൺസിന് 18.08 ഡോളറായും കുറഞ്ഞു. ആഗോളതലത്തിൽ, സ്വർണ വില ഈ മാസം ആദ്യം രേഖപ്പെടുത്തിയ ഉയർന്ന വിലയായ 1,550 ഡോളറിൽ നിന്ന് 4 ശതമാനം കുറവ് രേഖപ്പെടുത്തി.

രൂപയുടെ മൂല്യവും സ്വർണ വിലയും

യുഎസ് ഡോളറിനെതിരെ രൂപയുടെ വില ഒരു മാസത്തെ ഏറ്റവും ഉയർന്ന നിരക്കായ 70.96 ലെത്തി. ആഭ്യന്തര സ്വർണ വില കുറയാൻ പ്രധാന കാരണം രൂപയുടെ മൂല്യം ഇടിഞ്ഞതാണ്. സ്വർണ വിലയിൽ കുറവ് രേഖപ്പെടുത്തിയതിനാൽ ജ്വല്ലറികളിൽ ഇനി ഡിമാൻഡ് ഉയരാൻ സാധ്യതയുണ്ടെന്നാണ് വ്യാപാരികളുടെ പ്രതീക്ഷ. ഈ വർഷം നിരക്ക് കുത്തനെ ഉയർന്നതിനാൽ സ്വർണം വാങ്ങുന്നവരുടെ എണ്ണത്തിൽ വലിയ ഇടിവ് രേഖപ്പെടുത്തിയിരുന്നു.

ബിഐഎസ് ഹോൾമാർക്കിംഗ്

ദീപാവലിക്ക് മുമ്പ് സ്വർണ്ണാഭരണങ്ങൾക്ക് ബിഐഎസ് ഹോൾമാർക്കിംഗ് നിർബന്ധമാക്കാനുള്ള നിർദ്ദേശത്തിന് സർക്കാർ അംഗീകാരം നൽകുമെന്ന് പ്രസ് ട്രസ്റ്റ് ഓഫ് ഇന്ത്യ റിപ്പോർട്ട് ചെയ്തു. വിലയേറിയ ലോഹത്തിന്റെ പരിശുദ്ധി സർട്ടിഫിക്കേഷനാണ് ബിഐഎസ് ഹോൾമാർക്കിംഗ്.