ധനകാര്യ സെക്രട്ടറിയുടെ വിശദീകരണം

ജനങ്ങൾക്ക് വളരെയധികം വിശ്വാസമുള്ള പൊതുമേഖലാ ബാങ്കുകൾ അടയ്ക്കുന്നതിനെക്കുറിച്ച് യാതൊരു തീരുമാനവും എടുത്തിട്ടില്ലെന്നും ഇത്തരം അഭ്യൂഹങ്ങൾ അപഹാസ്യമാണെന്ന് ധനകാര്യ സെക്രട്ടറി രാജീവ് കുമാർ പറഞ്ഞു. മൂലധന നിക്ഷേപം നടത്തി സർക്കാർ ബാങ്കുകളെ ശക്തിപ്പെടുത്താനുള്ള നടപടികളാണ് സ്വീകരിക്കുന്നതെന്നും അദ്ദേഹം ചൂണ്ടിക്കാട്ടി.

വ്യാജ വാർത്ത

വിവിധ സോഷ്യൽ മീഡിയ പ്ലാറ്റ്‌ഫോമുകളിൽ പ്രചരിക്കുന്ന തെറ്റായ സന്ദേശത്തിൽ വിവിധ ബാങ്കുകൾ അടച്ചു പൂട്ടാൻ പോകുന്നുവെന്നും നിക്ഷേപകർ എത്രയും വേ​ഗം ബാങ്കുകളിൽ നിന്ന് പണം പിൻവലിക്കണമെന്നുമാണ് പൊതുജനങ്ങളോട് ആവശ്യപ്പെടുന്നത്. വ്യാജ വാർത്തയിൽ പ്രചരിക്കുന്ന ഒൻപത് ബാങ്കുകൾ താഴെ പറയുന്നവയാണ്.

ബാങ്കുകൾ ഇവയാണ്

• കോർപ്പറേഷൻ ബാങ്ക്
• യു‌ക്കോ ബാങ്ക്
• ഐ‌ഡി‌ബി‌ഐ
• ബാങ്ക് ഓഫ് മഹാരാഷ്ട്ര
• ആന്ധ്ര ബാങ്ക്
• ഇന്ത്യൻ ഓവർസീസ് ബാങ്ക്
• സെൻ‌ട്രൽ ബാങ്ക് ഓഫ് ഇന്ത്യ
• ദേനാ ബാങ്ക്
• യുണൈറ്റഡ് ബാങ്ക് ഓഫ് ഇന്ത്യ

ലയന പ്രഖ്യാപനം

മുകളിൽ പറയുന്ന മിക്ക ബാങ്കുകളും മറ്റ് ബാങ്കുകളുമായി ലയിപ്പിച്ചതോ ലയിപ്പിക്കുന്ന പ്രക്രിയയിൽ ഉൾപ്പെട്ടിട്ടുള്ളതോ ആണ്. രാജ്യത്തെ 10 പൊതുമേഖലാ ബാങ്കുകളെയാണ് നാല് വലിയ ബാങ്കുകളായി ലയിപ്പിക്കുമെന്ന് സർക്കാർ കഴിഞ്ഞ മാസം പ്രഖ്യാപിച്ചിരുന്നു. ഓറിയന്റൽ ബാങ്ക് ഓഫ് കൊമേഴ്‌സും യുണൈറ്റഡ് ബാങ്ക് ഓഫ് ഇന്ത്യയും പഞ്ചാബ് നാഷണൽ ബാങ്കുമായി ലയിക്കും. സിൻഡിക്കേറ്റ് ബാങ്ക്, കാനറ ബാങ്കിന്റെ ഭാഗമാകും. ആന്ധ്ര ബാങ്കും കോർപ്പറേഷൻ ബാങ്കും യൂണിയൻ ബാങ്ക് ഓഫ് ഇന്ത്യയുമായി ലയിക്കും. അലഹബാദ് ബാങ്ക് ഇന്ത്യൻ ബാങ്കുമായും ലയിക്കും. സർക്കാർ ഇതിനകം ദേനാ ബാങ്കിനെയും വിജയ ബാങ്കിനെയും ബാങ്ക് ഓഫ് ബറോഡയുമായി ലയിപ്പിച്ചിട്ടുണ്ട്.