സ്വർണ വിലയിൽ ഇന്ന് വീണ്ടും വർദ്ധനവ്. പവന് 80 രൂപ വർദ്ധിച്ച് 27960 രൂപയ്ക്കാണ് ഇന്ന് വ്യാപാരം പുരോ​ഗമിക്കുന്നത്. ഒക്ടോബർ ഒന്നിന് സ്വർണ വില കുത്തനെ കുറഞ്ഞിരുന്നു. എന്നാൽ പിന്നീട് വില വീണ്ടും മുകളിലേയ്ക്ക് ഉയരുന്ന പ്രവണതകളാണ് കാണുന്നതെന്ന് വ്യാപാരികൾ വ്യക്തമാക്കി. ഇന്ന് ഒരു ​ഗ്രാം സ്വർണത്തിന് 3495 രൂപയാണ് വില.

സ്വർണ വില വീണ്ടും 28000ന് മുകളിലേയ്ക്ക് ഉയരാൻ സാധ്യതയുണ്ടെന്നും വ്യാപാരികൾ വ്യക്തമാക്കി. ഒക്ടോബർ ഒന്നിന് പവന് 27520 രൂപയായിരുന്നു സ്വർണ വില. രണ്ട് മാസത്തിനിടയിലെ ഏറ്റവും കുറഞ്ഞ വിലയായിരുന്നു ഇത്. എന്നാൽ സെപ്റ്റംബർ ആദ്യം പവന്‍റെ വില 29,000 കടന്നിരുന്നു. 29,120 രൂപ വരെ എത്തിയ പവന്‍റെ വില പിന്നീട് ഇടിയുകയായിരുന്നു. ചരിത്രത്തിലെ തന്നെ റെക്കോർ‍ഡ് വിലയായിരുന്നു ഇത്.

വിവാഹ സീസണും ദീപാവലി, ദസറ തുടങ്ങിയ ഉത്സവങ്ങളും അടുത്തതോടെ ഒക്ടോബർ-ഡിസംബർ പാദത്തിൽ ഇന്ത്യയിൽ സ്വർണ്ണ ആവശ്യം സാധാരണ ഉയരാറുണ്ട്. ഈ അവസരത്തിൽ സ്വർണ വില കുത്തനെ ഉയർന്നാൽ ഈ വർഷം സ്വർണം വാങ്ങുന്നവരുടെ എണ്ണത്തിൽ കുറവുണ്ടാകാനും സാധ്യതയുണ്ട്.

എം‌സി‌എക്‌സിൽ ഒക്ടോബർ സ്വർണ്ണ ഫ്യൂച്ചർ വില ഇന്നലെ 10 ഗ്രാമിന് 36,771 മുതൽ 37,513 രൂപ വരെ ഉയർന്നിരുന്നു. ആഗോള വിപണിയിലും സമാനമായ ഒരു പ്രവണതയാണ് കണ്ടത്. കഴിഞ്ഞ ദിവസം വെള്ളി വിലയും കുത്തനെ ഉയർന്നിരുന്നു. എം‌സി‌എക്‌സിൽ 1,100 രൂപ അഥവാ 1.7 ശതമാനം ഉയർന്ന് വെള്ളിവില ഒരു കിലോയ്ക്ക് 44,870 രൂപയിലെത്തി. കേന്ദ്രസർക്കാരിനു വേണ്ടി റിസർവ് ബാങ്ക് പുറത്തിറക്കുന്ന സ്വർണ്ണ ബോണ്ടുകളിലും ഈ മാസം മുതൽ നിക്ഷേപം നടത്താം.

malayalam.goodreturns.in