റിലയൻസ് ജിയോ ജിയോഫോൺ ദീപാവലി 2019 ഓഫർ പ്രഖ്യാപിച്ചു. ജിയോ ഫോണിന് നിലവിലെ വിലയായ 1500 രൂപയിൽ നിന്ന് 699 രൂപയായി ഒറ്റയടിയ്ക്ക് കമ്പനി കുത്തനെ വില കുറച്ചു. ദസറയും ദീപാവലിയും പ്രമാണിച്ചാണ് ഫോണിന്റെ വിലയിൽ വൻ ഇളവ് പ്രഖ്യാപിച്ചിരിക്കുന്നത്. ഇതോടെ യാതൊരു നിബന്ധനകളും ബാധകമല്ലാതെ 800 രൂപയുടെ ലാഭമാണ് ഉപഭോക്താക്കൾക്ക് ലഭിക്കുക.

ദീപാവലി 2019 ഓഫറിലൂടെ ജിയോ ഫോൺ വാങ്ങുന്നവർക്ക് 700 രൂപ വിലമതിക്കുന്ന ഡാറ്റാ ആനുകൂല്യങ്ങളും ജിയോ വാഗ്ദാനം ചെയ്യുന്നുണ്ട്. ഉപഭോക്താവ് ചെയ്യുന്ന ആദ്യത്തെ ഏഴ് റീചാർജുകൾക്ക് ജിയോ അധികമായി 99 രൂ മൂല്യമുള്ള അധിക ഡാറ്റാ നൽകും. ജിയോഫോൺ വാങ്ങുന്നതിലൂടെയുള്ള 800 രൂപ ലാഭവും 700 രൂപയുടെ ഡാറ്റയും സൗജന്യമായി ലഭിക്കുന്നതോടെ ഓരോ ജിയോഫോൺ ഉപഭോക്താക്കൾക്കും 1,500 രൂപയുടെ ആനുകൂല്യമാണ് ലഭിക്കുക.

ഒരു ഇന്ത്യക്കാരനും താങ്ങാനാവുന്ന ഇന്റർനെറ്റും ഡിജിറ്റൽ വിപ്ലവത്തിന്റെ നേട്ടങ്ങളും നഷ്ടപ്പെടുന്നില്ലെന്ന് ജിയോ ഉറപ്പാക്കുമെന്നും 'ജിയോഫോൺ ദീപാവലി സമ്മാനം' വാഗ്ദാനം ചെയ്യുന്നതിലൂടെ, സാമ്പത്തിക പിരമിഡിന്റെ അടിത്തട്ടിൽ ഉള്ളവരെയും ഇന്റർനെറ്റ് ഇക്കോണമിയിലേക്ക് കൊണ്ടുവരുന്നതിനാണ് 1,500 രൂപയുടെ നിക്ഷേപം നടത്തുന്നതെന്നും റിലയൻസ് ഇൻഡസ്ട്രീസ് ചെയർമാനും മാനേജിംഗ് ഡയറക്ടറുമായ മുകേഷ് അംബാനി പറഞ്ഞു.

ദസ്സറ മുതൽ ദീപാവലി വരെയുള്ള കാലയളവിലാണ് ഈ സൗജന്യ ഓഫർ ജിയോ ലഭ്യമാക്കുന്നത്. 50 കോടി ഉപയോക്താക്കളിലേക്ക് ജിയോഫോണ്‍ എത്തിക്കുന്നതിനും കൂടുതല്‍ ഫീച്ചര്‍ ഫോണ്‍ ഉപയോക്താക്കളെ 2ജിയില്‍ നിന്നും 4ജിയിലേക്ക് കൊണ്ടുവരുന്നതിനുമാണ് ജിയോയുടെ പുതിയ നീക്കം.

malayalam.goodreturns.in