ട്രെയിൻ വൈകിയാൽ

ട്രെയിൻ‌ വൈകിയാൽ‌ ഐ‌ആർ‌സി‌ടി‌സി യാത്രക്കാർ‌ക്ക് പണം തിരികെ നൽകും. ലഖ്‌നൗ - ഡൽഹി തേജസ് എക്സ്പ്രസ് ഒരു മണിക്കൂറിലധികം വൈകിയാൽ യാത്രക്കാർക്ക് 100 രൂപ നഷ്ടപരിഹാരം ലഭിക്കും. രണ്ട് മണിക്കൂറും അതിൽ കൂടുതലും വൈകിയാൽ യാത്രക്കാർക്ക് 250 രൂപ ലഭിക്കുമെന്ന് ഐആർസിടിസി അറിയിച്ചു.

ലഗേജ് പിക്ക് ആൻഡ് ഡ്രോപ്പ്

യാത്രക്കാർക്ക് എക്‌സ്‌ക്ലൂസീവ് ലഗേജ് പിക്ക് ആൻഡ് ഡ്രോപ്പ് സേവനം നൽകാനും ഐആർസിടിസി പദ്ധതിയിടുന്നുണ്ട്. അതായത് നിങ്ങളുടെ ലഗേജ് വീട്ടിൽ നിന്ന് എടുത്ത് ട്രെയിനിൽ എത്തിച്ച് ട്രെയിനിൽ നിന്ന് നിങ്ങളുടെ ലക്ഷ്യസ്ഥാനത്തേക്ക് എത്തിക്കുന്ന സേവനമാണ് ഐആർസിടിസി ആലോചിക്കുന്നത്. തേജസ് എക്സ്പ്രസിൽ യാത്ര ചെയ്യുന്ന എല്ലാ യാത്രക്കാർക്കും ഐആർസിടിസി 25 ലക്ഷം രൂപ വരെ സൗജന്യ ഇൻഷുറൻസും നൽകും.

ടിക്കറ്റ് ബുക്ക് ചെയ്യുന്നത് എങ്ങനെ?

യാത്രക്കാർക്ക് ഡൽഹി - ലഖ്‌നൗ തേജസ് എക്സ്പ്രസിൽ ഐആർസിടിസി വെബ്‌സൈറ്റ് വഴിയോ മൊബൈൽ ആപ്ലിക്കേഷൻ വഴിയോ ടിക്കറ്റ് ബുക്ക് ചെയ്യാം. റെയിൽ‌വേ റിസർവേഷൻ കൗണ്ടറുകളിൽ നിന്ന് ടിക്കറ്റ് ലഭിക്കില്ല. തേജസ് എക്സ്പ്രസ് ആറ് മണിക്കൂർ പതിനഞ്ച് മിനിറ്റിനുള്ളിൽ ലഖ്‌നൗ മുതൽ ന്യൂഡൽഹി വരെ സർവ്വീസ് പൂർത്തിയാക്കും.

ടിക്കറ്റ് നിരക്ക്

ഐആർസിടിസിയുടെ തേജസ് എക്സ്പ്രസിന്റെ ലഖ്‌നൗ - ന്യൂഡൽഹി ടിക്കറ്റ് നിരക്ക് എസി ചെയർ കാറിന് 1,125 രൂപയും എക്സിക്യൂട്ടീവ് ചെയർ കാറിന് 2,310 രൂപയുമാണ്. ഡൽഹി - ലഖ്‌നൗ എസി ചെയർ കാർ യാത്രാ ടിക്കറ്റിന് 1,280 രൂപയും എക്സിക്യൂട്ടീവ് ചെയർ കാർ തിരഞ്ഞെടുക്കുന്നവർക്ക് 2,450 രൂപയുമായിരിക്കും നിരക്ക്. 60 ദിവസത്തെ അഡ്വാൻസ് റിസർവേഷൻ കാലയളവ് ഉണ്ടായിരിക്കും. തേജസ് എക്സ്പ്രസിൽ 'തത്കാൽ' ടിക്കറ്റ് ലഭിക്കില്ല.

യാത്രാ സമയം

ഒക്ടോബർ 5 മുതൽ ലഖ്‌നൗ - ഡൽഹി തേജസ് എക്സ്പ്രസ് ചൊവ്വാഴ്ച ഒഴികെ ആഴ്ചയിൽ ആറ് ദിവസവും പ്രവർത്തിക്കും. രാവിലെ 6.10 ന് ലഖ്‌നൗവിൽ നിന്ന് ആരംഭിച്ച് ഉച്ചയ്ക്ക് 12.25 ന് ഡൽഹിയിലെത്തും. തിരിച്ച് ട്രെയിൻ വൈകിട്ട് 4.30 ന് ന്യൂഡൽഹിയിൽ നിന്ന് പുറപ്പെട്ട് രാത്രി 10.45 ന് ലഖ്‌നൗവിൽ എത്തും. 5 വയസും അതിൽ കൂടുതലും പ്രായമുള്ള കുട്ടികളിൽ നിന്ന് മുഴുവൻ നിരക്കും ഈടാക്കും. ഈ ട്രെയിനുകളിൽ ആനുകൂല്യങ്ങളോ ഡ്യൂട്ടി പാസുകളോ അനുവദിക്കില്ല.

ഭക്ഷണവും ലഭിക്കും

തേജസ് എക്സ്പ്രസിന്റെ എക്സിക്യൂട്ടീവ് ചെയർ കാർ, എസി ചെയർ കാർ എന്നിവയിൽ യാത്ര ചെയ്യുന്ന യാത്രക്കാർക്ക് കോംബോ ഭക്ഷണം തിരഞ്ഞെടുക്കാനുള്ള സൗകര്യമുണ്ട്. എസി ചെയർ കാറിന് 185 രൂപയും എക്സിക്യൂട്ടീവ് ചെയർ കാറിന് 245 രൂപയും കാറ്ററിംഗ് ചാർജുകൾ ടിക്കറ്റ് നിരക്കിൽ ഉൾപ്പെടുത്തിയിട്ടുണ്ട്. ഫ്ലൈറ്റുകളിലേത് പോലെ തന്നെ ഡൽഹി - ലഖ്‌നൗ തേജസ് എക്സ്പ്രസിലെ ഓൺ-ബോർഡ് സർവീസ് സ്റ്റാഫുകൾക്കും ഭക്ഷണം നൽകും. ചായ, കോഫി എന്നിവ വെൻഡിംഗ് മെഷീനുകളിലൂടെ ട്രെയിനിൽ ലഭ്യമാണ്.