ക്രിമിനൽ അല്ലെങ്കിൽ അഴിമതി കേസുകളിൽപ്പെടുന്ന സർക്കാർ ജീവനക്കാർക്ക് മുട്ടൻ പണിയുമായി മോദി സർക്കാർ. മോദി സർക്കാർ രണ്ടാം തവണ ചുമതലയേറ്റതിന് തൊട്ടുപിന്നാലെ ഈ വർഷം ജൂൺ മുതൽ അഴിമതി ഉൾപ്പെടെയുള്ള വിവിധ കുറ്റങ്ങൾ ചുമത്തി കമ്മീഷണർ റാങ്ക് ഓഫീസർമാർ ഉൾപ്പെടെ 64 ജീവനക്കാരെ കേന്ദ്ര ഡയറക്റ്റ് ടാക്സ് (സിബിഡിടി) നിർബന്ധിതമായി വിരമിക്കലിന് നിർദ്ദേശം നൽകിയിരുന്നു.

ഭാവിയിൽ കേന്ദ്രസർക്കാർ ഉദ്യോഗസ്ഥരുടെ വാർഷിക രഹസ്യ റിപ്പോർട്ടുകളും മറ്റ് വിശദാംശങ്ങളും അവലോകനം ചെയ്യുന്നതിനാൽ ഇത്തരം കൂടുതൽ നടപടികൾ പ്രതീക്ഷിക്കുന്നു. പ്രത്യേകിച്ചും ക്രിമിനൽ അല്ലെങ്കിൽ അഴിമതി കേസുകൾ നേരിടുന്നവരെക്കുറിച്ചാണ് സർക്കാർ രഹസ്യമായി അന്വേഷിക്കുക.

സേവന രേഖകൾ സമഗ്രമായി പരിശോധിച്ചതിന് ശേഷം നിർബന്ധിത വിരമിക്കലിനുള്ള സംവിധാനം ഏർപ്പെടുത്തണമെന്ന് കേന്ദ്ര സർക്കാർ എല്ലാ കേഡർ നിയന്ത്രണ അധികാരികളോടും ആവശ്യപ്പെട്ടു. ദുരുപയോഗം അല്ലെങ്കിൽ അഴിമതി ആരോപണം നേരിടുന്ന ഉദ്യോഗസ്ഥരുടെ പട്ടിക തയ്യാറാക്കാൻ കേന്ദ്രം സംസ്ഥാനങ്ങൾക്ക് കത്തെഴുതിയിട്ടുണ്ടെന്ന് ഒരു മുതിർന്ന ഉദ്യോഗസ്ഥൻ പറഞ്ഞു.

ആവശ്യമെങ്കിൽ സേവന നിയമങ്ങളിൽ ഭേദഗതി വരുത്താമെന്നും അല്ലെങ്കിൽ അഴിമതിക്കാരായ ഉദ്യോഗസ്ഥരെ നീക്കം ചെയ്യുന്നതിന് ഭരണപരമായ നിർദ്ദേശങ്ങൾ നൽകാമെന്നും സർക്കാർ അറിയിച്ചിട്ടുണ്ട്. മിക്ക മന്ത്രാലയങ്ങളും കേഡർ-കൺട്രോളിംഗ് അതോറിറ്റികളും പട്ടിക തയ്യാറാക്കിയിട്ടുണ്ടെന്നും പേരുകൾ ഘട്ടംഘട്ടമായി പ്രഖ്യാപിക്കുമെന്നും ഉദ്യോഗസ്ഥർ പറഞ്ഞു. കഴിഞ്ഞ മാസം, സിബിഡിടി 15 മുതിർന്ന ഉദ്യോഗസ്ഥരെ നിർബന്ധിതമായി പിരിച്ചുവിട്ടിരുന്നു.

malayalam.goodreturns.in