സ്വർണ ബോണ്ട് വേണോ? ഇന്ന് മുതൽ വാങ്ങാം, ആഭരണം വാങ്ങുന്നതിനേക്കാൾ ലാഭം

വിൽപ്പന എന്ന് വരെ?

ഒക്ടോബർ 11ന് വിൽപ്പന അവസാനിക്കും. ഒക്ടോബർ 21 മുതൽ 25 വരെ മറ്റൊരു ​ഗോൾഡ് ബോണ്ട് വിൽപ്പനയും നടക്കുന്നുണ്ട്. സ്വർണ്ണ ബോണ്ട് പദ്ധതി പ്രകാരം, ഒരു ഗ്രാം സ്വർണത്തിന്റെയും അതിന്റെ ഗുണിതങ്ങളുടെയും യൂണിറ്റുകളിലായാണ് ബോണ്ടുകൾ വിൽക്കുന്നത്. ബോണ്ടുകളിലെ മിനിമം നിക്ഷേപം ഒരു ഗ്രാം ആണ്. സ്വർണ്ണ ബോണ്ടുകളിൽ നിക്ഷേപിക്കുന്നതിന്റെ നേട്ടങ്ങൾ ഇതാ..

മൂലധന നേട്ടനികുതി

കാലാവധി പൂർത്തിയാകുന്നതുവരെ മൂലധന നേട്ട നികുതി സ്വർണ്ണ ബോണ്ടുകൾക്ക് ബാധകമല്ല. എട്ട് വർഷമാണ് സ്വർണ ബോണ്ടുകളുടെ കാലാവധി. വീണ്ടെടുക്കൽ സമയത്ത് ഉണ്ടാകുന്ന മൂലധന നേട്ടങ്ങൾ നികുതി രഹിതമാണ്. ഗോൾഡ് ബോണ്ടുകളിൽ വാഗ്ദാനം ചെയ്യുന്ന ഈ ആദായനികുതി ആനുകൂല്യം ഗോൾഡ് ഇടിഎഫ്, ഗോൾഡ് ഫണ്ടുകൾ അല്ലെങ്കിൽ ഫിസിക്കൽ ഗോൾഡ് പോലുള്ള മറ്റ് ഉപകരണങ്ങളിൽ ലഭ്യമല്ല.

ജിഎസ്ടി ബാധകമല്ല

സ്വർണ്ണ ബോണ്ടുകൾ വാങ്ങുമ്പോൾ ജിഎസ്ടി ഈടാക്കുന്നില്ല. ഇത് ഈ പദ്ധതിയെ കൂടുതൽ ചെലവ് കുറഞ്ഞതാക്കുന്നു. ആഭരണങ്ങളായി സ്വർണം വാങ്ങുമ്പോൾ 3% ജിഎസ്ടി ഈടാക്കും. ചാർജ് ഈടാക്കുന്നത് പോലുള്ള പ്രശ്നങ്ങളിൽ നിന്നും ഗോൾഡ് ബോണ്ടുകൾ സ്വതന്ത്രമാണ്. ഇന്ത്യാ ഗവൺമെന്റിന്റെ പിന്തുണയുള്ള ​ഗോൾഡ് ബോണ്ടുകൾ വഴി 24 കാരറ്റ് സ്വർണമാണ് വരിക്കാർക്ക് ലഭിക്കുക.

പലിശ ഇങ്ങനെ

ഗോൾഡ് ബോണ്ടുകൾ പ്രതിവർഷം 2.5% പലിശ നൽകുന്നു. പലിശ വരുമാനം വരിക്കാരുടെ വരുമാനവുമായി ബന്ധിപ്പിക്കുകയും അതിനനുസരിച്ച് നികുതി നൽകുകയും ചെയ്യുന്നു. എന്നാൽ പലിശ വരുമാനത്തിൽ നിന്ന് ടിഡിഎസ് പിടിക്കില്ല.

കാലാവധിയ്ക്ക് മുമ്പ്

നിക്ഷേപകന് എട്ട് വർഷത്തിന് മുമ്പ് സ്വർണ്ണ ബോണ്ടുകളിൽ നിന്ന് പുറത്തുകടക്കാൻ ആഗ്രഹമുണ്ടെങ്കിൽ, എക്സ്ചേഞ്ചുകളിൽ ബോണ്ട് വിൽക്കാൻ കഴിയും. ഇഷ്യു ചെയ്ത തീയതി മുതൽ അഞ്ചാം വർഷത്തിനുശേഷം നേരത്തെയുള്ള എൻ‌ക്യാഷ്മെൻറും സർക്കാർ അനുവദിക്കുന്നുണ്ട്. എന്നാൽ ഈ രണ്ട് സാഹചര്യങ്ങളിലും, മൂലധന നേട്ട നികുതി ബാധകമാണ്.