പുറത്തുവിട്ട വിവരങ്ങൾ

2018-19 മൂല്യനിർണയ വർഷത്തിൽ അല്ലെങ്കിൽ 2017-18 സാമ്പത്തിക വർഷത്തിൽ ഇന്ത്യയിലെ കോടീശ്വരരായ നികുതിദായകരുടെ എണ്ണം 20 ശതമാനം ഉയർന്ന് 97,689 ആയി. ഒരു കോടിയിലധികം നികുതി വരുമാനമുള്ള വ്യക്തികളുടെ എണ്ണം 2017-18 കാലയളവിൽ 81,344 ആയിരുന്നു.

അതിസമ്പന്നർ

500 കോടിയിലധികം നികുതി വരുമാനമുള്ള ഇന്ത്യയിലെ അതിസമ്പന്ന ക്ലബിൽ ഇടം നേടിയിരിക്കുന്നത് 3 വ്യക്തികൾ മാത്രമാണ്. റിപ്പോർട്ടിൽ അവരുടെ പേരുകൾ വെളിപ്പെടുത്തിയിട്ടില്ല. ഒരു കോടി മുതൽ 5 കോടി വരെ വരുമാനം നേടുന്ന 89,793 പേരാണ് ഇന്ത്യയിലുള്ളത്. 5 മുതൽ 10 കോടി വരെ വരുമാന പരിധിയിൽ 5,132 നികുതിദായകരാണ് ഉള്ളത്. 10 മുതൽ 25 കോടി രൂപ പരിധിയിൽ രണ്ടായിരത്തിലധികം വ്യക്തികളുമുണ്ട്.

ശമ്പളക്കാരുടെ നികുതി

ശമ്പളക്കാരുടെ നികുതി പരിഗണിക്കുകയാണെങ്കിൽ, മിക്ക നികുതിദായകരും 5.5 ലക്ഷത്തിനും 9.5 ലക്ഷത്തിനും ഇടയിൽ ശമ്പളം നേടുന്നവരാണ്. ഈ വിഭാഗത്തിലെ ശരാശരി ശമ്പള വരുമാനം 7.12 ലക്ഷമാണ്. വ്യക്തികൾ, എച്ച് യു എഫ്, കമ്പനികൾ, സ്ഥാപനങ്ങൾ തുടങ്ങിയവയിലെ നികുതിദായകരെ കണക്കിലെടുത്താൽ പ്രതിവർഷം ഒരു കോടിയിലധികം നികുതി വരുമാനമുള്ളവരുടെ എണ്ണം ഏകദേശം 1.67 ലക്ഷമായി ഉയരുന്നു. മുൻ വർഷത്തെ അപേക്ഷിച്ച് 19 ശതമാനം വർധനവാണിത്.

വരുമാനമില്ലാത്തവർ

ആദായനികുതി വകുപ്പിന്റെ കണക്കുകൾ പ്രകാരം 1.7 ലക്ഷത്തിലധികം ആളുകൾ പൂജ്യ വരുമാനത്തോടെ ആദായനികുതി റിട്ടേൺ സമർപ്പിച്ചു എന്നതാണ് ശ്രദ്ധേയമായ മറ്റൊരു കാര്യം.

റിട്ടേൺ കണക്കുകൾ

2019 ഓഗസ്റ്റ് 15 വരെ സമർപ്പിച്ച ഇ-ഫയൽ റിട്ടേണുകളിൽ നിന്ന് ലഭിച്ച സ്ഥിതിവിവരക്കണക്കുകൾ പ്രകാരം 5.87 കോടിയിലധികം ആദായനികുതി റിട്ടേണുകൾ സമർപ്പിക്കപ്പെട്ടിട്ടുണ്ട്. റിട്ടേൺ സമർപ്പിച്ചവരിൽ 5.52 കോടി വ്യക്തികളും 11.3 ലക്ഷം എച്ച് യു എഫുകളും 12.69 ലക്ഷം സ്ഥാപനങ്ങളും 8.41 ലക്ഷം കമ്പനികളും ഉൾപ്പെടുന്നു.