എയർ ഏഷ്യ ഇന്ത്യയുടെ പുതിയ ഡൽഹി-ജയ്പൂർ റൂട്ട് സർവ്വീസ് നാളെ ആരംഭിക്കും. ഈ റൂട്ടിൽ ദിവസേനയുള്ള സർവ്വീസാണ് കമ്പനി നടത്തുക. ഡൽഹി വിമാനത്താവളത്തിൽ നിന്ന് രാവിലെ 10.35 ന് പുറപ്പെട്ട് രാവിലെ 11.45 ന് ജയ്പൂർ വിമാനത്താവളത്തിലെത്തും. തിരിച്ച് ദിവസവും ഉച്ചയ്ക്ക് 12.15 ന് ജയ്പൂരിൽ നിന്ന് പുറപ്പെട്ട് ഉച്ചയ്ക്ക് 1.25 ന് ദില്ലി വിമാനത്താവളത്തിൽ എത്തും. ഈ റൂട്ടിൽ 1,315 രൂപ വരെ കുറഞ്ഞ നിരക്കിൽ ടിക്കറ്റുകളും ലഭ്യമാണ്.

 ഒക്ടോബർ 20 മുതൽ അഗർത്തലയിൽ നിന്ന് ഗുവാഹത്തി, ഇംഫാൽ, കൊൽക്കത്ത, ന്യൂഡൽഹി തുടങ്ങിയ സ്ഥലങ്ങളിലേക്കും വിമാന സർവീസുകൾ അടുത്തിടെ പ്രഖ്യാപിച്ചിരുന്നു. ഈ റൂട്ടിൽ 1,019 രൂപ മുതൽ ടിക്കറ്റുകൾ ലഭ്യമാണ്. airasia.com അല്ലെങ്കിൽ എയർ ഏഷ്യ മൊബൈൽ ആപ്ലിക്കേഷൻ വഴി  ടിക്കറ്റ് ബുക്ക് ചെയ്യാവുന്നതാണ്. 

 ടാറ്റാ സൺസ് ലിമിറ്റഡും എയർ ഏഷ്യ ഇൻവെസ്റ്റ്‌മെന്റ് ലിമിറ്റഡും ചേർന്നുള്ള സംയുക്ത സംരംഭമാണ് എയർ ഏഷ്യ ഇന്ത്യ. 2014 ജൂൺ 12 നാണ് എയർലൈൻ പ്രവർത്തനം ആരംഭിച്ചത്. നിലവിൽ 23 എ 320 വിമാനങ്ങളുമായി ഇന്ത്യയിലുടനീളം 20 സ്ഥലങ്ങളിലേക്ക് എയർ ഏഷ്യ ഇന്ത്യ സർവ്വീസ് നടത്തുന്നുണ്ട്. 

മറ്റൊരു ബജറ്റ് കാരിയറായ ഗോ എയർ ദീപാവലിക്ക് മുന്നോടിയായി 24 മണിക്കൂർ നീണ്ടു നിൽക്കുന്ന സൂപ്പർ സേവർ നിരക്കിൽ ടിക്കറ്റുകൾ വിൽക്കുന്നുണ്ട്. ഈ ഓഫർ അനുസരിച്ച് അന്താരാഷ്ട്ര, ആഭ്യന്തര റൂട്ടുകളിൽ 1,296 രൂപ(നികുതി ഉൾപ്പെടെ) മുതൽ ടിക്കറ്റുകൾ ലഭിക്കും. ആഭ്യന്തര വിമാന യാത്രക്കാരുടെ എണ്ണം സെപ്റ്റംബറിൽ തുടർച്ചയായ നാലാം മാസവും കുറഞ്ഞു. പ്രതിമാസ ഇടിവ് ഇതോടെ 2.20 ശതമാനമായി. മുൻ മാസത്തെ അപേക്ഷിച്ച് 0.94 ശതമാനത്തിന്റെ കുറവാണുള്ളത്. 

malayalam.goodreturns.in