ചോക്ലേറ്റ് ഇഷ്ട്ടപ്പെടാത്തവരായി ആരും കാണില്ല. എന്നാൽ ഈ ചോക്ലേറ്റ് പലർക്കും വാങ്ങാൻ സാധിച്ചെന്നും വരില്ല. ലോകത്തിലെ ഏറ്റവും വില കൂടിയ ചോക്ലേറ്റായ ട്രിനിറ്റി ട്രഫിൾസ് എക്സ്ട്രാ ഓർഡിനെയർ കഴിഞ്ഞ ദിവസം ഐടിസിയുടെ പ്രീമിയം ചോക്ലേറ്റ് ബ്രാന്‍ഡായ ഫാബെല്ലെ എക്‌സ്‌ക്വിസിറ്റ്' ആണ് വിപണിയില്‍ എത്തിച്ചത്. ഒരു കിലോയ്ക്ക് 4.3 ലക്ഷം രൂപയാണ് ഈ ചോക്ലേറ്റിന്റെ വില. ഏറ്റവും വില കൂടിയ ചോക്ലേറ്റ് എന്ന ഗിന്നസ് റെക്കോർഡും ഈ ചോക്ലേറ്റിന് ലഭിച്ചു.

ഐടിസി ലിമിറ്റഡിന്റെ ഹോം-ലക്ഷ്വറി ചോക്ലേറ്റ് ബ്രാൻഡായ മിഷേലിന്റെ സ്റ്റാർ ഷെഫ് ഫിലിപ്പ് കോണ്ടീസിനിയുമായി സഹകരിച്ചാണ് ട്രിനിറ്റി - ട്രഫിൾസ് എക്സ്ട്രാ ഓർഡിനെയർ ചോക്ലേറ്റ് ഉണ്ടാക്കിയിരിക്കുന്നത്. ലോകത്തിലെ ഏറ്റവും മികച്ച ​ഗുണനിലവാരമുള്ള കൊക്കോയും ചില അപൂർവമായ ചേരുവകളും ഉപയോഗിച്ചാണ് ചോക്ലേറ്റ് നിർമ്മിച്ചിരിക്കുന്നത്.

ട്രിനിറ്റി - ട്രഫിൾസ് എക്സ്ട്രാഡോർഡിനെയറിന്റെ പരിമിത പതിപ്പ് തടി കൊണ്ട് നിർമ്മിച്ച പെട്ടിയിലാണ് ലഭിക്കുക. 15 ചോക്ലേറ്റുകളാണ് ഇതിൽ അടങ്ങിയിരിക്കുന്നത്. 15 ഗ്രാം ഭാരം വരുന്ന ഓരോ ചോക്ലേറ്റും വ്യത്യസ്ത ആശയത്തെ പ്രതിനിധീകരിക്കുന്നു. ഇത്തരം ഒരു ബോക്സിന് ഒരു ലക്ഷം രൂപയാണ് വില.

ചോക്ലേറ്റ് ബോക്സുകൾ ഇന്ന് മുതൽ വിപണിയിൽ ലഭ്യമാകും. ഓര്‍ഡര്‍ ലഭിക്കുന്നതിന് അനുസരിച്ച്‌ ചോക്ലേറ്റ് ലഭിക്കും. ചോക്ലേറ്റ് പ്രിയർക്ക് ഏറ്റവും പ്രിയങ്കരമായ രുചികളിലാണ് ഇവ നിർമ്മിച്ചിരിക്കുന്നതെന്ന് ഐടിസി ചീഫ് ഓപ്പറേറ്റിംഗ് ഓഫീസർ അനുജ് റുസ്തഗി പറഞ്ഞു. ഘാന മുതൽ കോട്ട് ഡി ഐവയർ, മഡഗാസ്കർ മുതൽ സാന്റോ ഡൊമിംഗോ, വെനിസ്വേല മുതൽ സാവോ ടോം തുടങ്ങിയ കൊക്കോയുടെ നാടുകളിൽനിന്നാണ് ഏറ്റവും മികച്ച ആഡംബര അനുഭവം സൃഷ്ടിക്കാൻ കമ്പനി കൊക്കോകൾ തിരഞ്ഞെടുത്തിരിക്കുന്നത്.

malayalam.goodreturns.in