ടാറ്റാ മോട്ടോഴ്‌സിന്റെ ഏകീകൃത നഷ്ടം ജൂലൈ മുതൽ സെപ്റ്റംബർ വരെയുള്ള കാലയളവിൽ 216.56 കോടി രൂപയായി കുറഞ്ഞു. കഴിഞ്ഞ സാമ്പത്തിക വർഷം ഇതേ കാലയളവിൽ 1,048.80 കോടി രൂപയുടെ നഷ്ടമാണ് കമ്പനി രേഖപ്പെടുത്തിയിരുന്നത്. അവലോകന കാലയളവിൽ കമ്പനിയുടെ മൊത്തം വരുമാനം 66,104.51 കോടി രൂപയാണ്. മുൻ‌വർഷം ഇത് 72,729.30 കോടി രൂപയായിരുന്നു. 9.1 ശതമാനം കുറവാണ് വരുമാനത്തിൽ ടാറ്റാ മോട്ടോഴ്‌സിന് ഉണ്ടായിരിക്കുന്നത്.

സെപ്റ്റംബറിൽ അവസാനിച്ച പാദത്തിൽ ജാഗ്വാർ ലാൻഡ് റോവർ പ്രകടനം മെച്ചപ്പെടുത്തിയെന്നും മികച്ച പ്രകടനം കാഴ്ചവച്ചതായും റിപ്പോർട്ടിൽ പറയുന്നു. പ്രത്യേകിച്ചും ചൈനയിലെ പുരോഗതി കമ്പനിയ്ക്ക് ആശ്വാസകരമായി.

2019 സെപ്റ്റംബറിൽ അവസാനിച്ച ത്രൈമാസത്തിൽ മാരുതി സുസുക്കിയുടെ അറ്റാദായം 39.35 ശതമാനം കുറഞ്ഞതായി കഴിഞ്ഞ ദിവസം റിപ്പോർട്ടുകൾ പുറത്തു വിട്ടിരുന്നു. 1,358.60 കോടി രൂപയാണ് മാരുതിയുടെ രണ്ടാം പാദ അറ്റാദായം.. കഴിഞ്ഞ വർഷം ഇതേ കാലയളവിൽ അറ്റാദായം 2,240.4 കോടി രൂപയായിരുന്നു. വാഹന വില്‍പ്പന കുറഞ്ഞതു മൂലം മാരുതി ഇത്തവണ ലിമിറ്റഡ് നാലു വര്‍ഷത്തിനിടയിലെ ഏറ്റവും താഴ്ന്ന ലാഭമാണ് രേഖപ്പെടുത്തിയിരിക്കുന്നത്.

കമ്പനിയുടെ അറ്റവിൽപ്പന 22.50 ശതമാനം ഇടിഞ്ഞ് 16,120.40 കോടി രൂപയായി. അവലോകന കാലയളവിൽ വിൽപ്പനയുടെ അളവ് 30.2 ശതമാനം ഇടിഞ്ഞ് 338317 യൂണിറ്റായി കുറഞ്ഞിരുന്നു. കോര്‍പ്പറേറ്റ് നികുതിയിലുണ്ടായ വന്‍ ഇളവും, ഇതര വരുമാനങ്ങളിലുണ്ടായ വര്‍ദ്ധനവും മൂലമാണ് ലാഭം അമിതമായി ഇടിയാതെ പിടിച്ചുനിര്‍ത്താന്‍ കമ്പനിക്കു കഴിഞ്ഞതെന്ന് സാമ്പത്തിക വിദ​ഗ്ധർ വ്യക്തമാക്കി.

malayalam.goodreturns.in