എൽ.പി.ജി വില മുതൽ പി.എഫ് വരെ അടിമുടി മാറ്റം വരുന്നു: നിങ്ങളറിഞ്ഞോ 2025ലെ ഈ പുത്തൻ മാറ്റങ്ങൾ

പുതുവർഷത്തെ വരവേൽക്കാൻ ആരവങ്ങൾ ഉയർന്നു. 2024ൽ സാമ്പത്തിക രം​ഗത്ത് വലിയ മാറ്റങ്ങളാണ് സംഭവിച്ചത്. സാധരണക്കാരനെ സംബന്ധിച്ച് ​ഗ്യാസ് വില, പെട്രോൾ/ഡീസൽ വില, സ്വർണം തുടങ്ങിയ കാര്യങ്ങളിൽ വിലക്കയറ്റം അൽപം പ്രയാസമേറിയതാണ്. പുതു വർഷത്തിൽ ഇത്തരം മേഖലകളിൽ വിലക്കുറവ് സംഭവിക്കുമോ? 2024നോട് വിട പറയുമ്പോൾ പുതു വർഷത്തെ പുതിയ മാറ്റങ്ങളെ കുറിച്ചും അറിഞ്ഞിരിക്കാം.

2025 ജനുവരി 1 മുതൽ വമ്പൻ മാറ്റങ്ങൾ വരുന്നു. എൽ.പി.ജി വില മുതൽ ഇ.പി.എഫ്.ഒ വരെയുള്ള നിയമങ്ങൾ ഇതിൽ ഉൾപ്പെടുന്നു. ഓരോ മാറ്റങ്ങളെ കുറിച്ചും വിശദമായി അറിയാം.

1. ​ഗ്യാസ് വില ഉയരുന്നത് സാധാരണക്കാരെ സംബന്ധിച്ച് ഏറെ പ്രയാസമേറിയ കാര്യമാണ്. സാധാരണയായി, എല്ലാ മാസവും ഒന്നാം തീയതി സർക്കാർ എൽ.പി.ജി വില മാറ്റും. 19 കിലോഗ്രാം വാണിജ്യാടിസ്ഥാനത്തിലുള്ള പാചക വാതക സിലിണ്ടറിൻ്റെ വിലയിൽ കഴിഞ്ഞ ദിവസങ്ങളിൽ ഒട്ടേറെ മാറ്റങ്ങളുണ്ടായി.

എന്നാൽ 14 കിലോഗ്രാം വരുന്ന ​ഗാർഹിക ഉപയോ​ഗത്തിനായുള്ള പാചക വാതക സിലിണ്ടറിന്റെ വില വളരെക്കാലമായി മാറ്റമില്ലാതെ തുടരുന്നു. അതിനാൽ തന്നെ ഇത്തവണയും പാചകവാതക സിലിണ്ടറിൻ്റെ വിലയിൽ കാര്യമായ മാറ്റം പ്രതീക്ഷിക്കുന്നു. നാളെ ജനുവരി 1ന് പാചകവാതക വിലയിൽ കാര്യമായ മാറ്റം വന്നേക്കാം.

2. പി. എഫ് അക്കൗണ്ട് ഉടമകൾക്ക് ഈ പുതുവർഷത്തിൽ പുതിയ മാറ്റങ്ങൾ വന്നേക്കാം. അതായത് ഇനി മുതൽ നിങ്ങൾക്ക് എ.ടി.എം മെഷീനിൽ നിന്ന് പി.എഫ് പണം പിൻവലിക്കാൻ സാധിക്കും. തൊഴിൽ മന്ത്രാലയം ഇതിനു വേണ്ടി പ്രയത്നിക്കുന്നുണ്ട്. പി.എഫ് പിൻവലിക്കൽ കാര്യക്ഷമമാക്കുന്നതിനും സേവനം മെച്ചപ്പെടുത്തുന്നതിനുമായി തൊഴിൽ മന്ത്രാലയം അവരുടെ ഐ.ടി സംവിധാനം നവീകരിക്കുകയാണെന്ന് ലേബർ സെക്രട്ടറി സുമിത ദവ്‌റ അടുത്തിടെ പറഞ്ഞിരുന്നു.

3. റിസർവ് ബാങ്ക് ഓഫ് ഇന്ത്യ (ആർ.ബി.ഐ) ഈയിടെ ഫീച്ചർ ഫോൺ ഉപയോക്താക്കൾക്ക് വേണ്ടി യു.പി.ഐ പേയ്മെന്റ് പരിധി നീട്ടിയിരുന്നു. ഇപ്പോൾ യു.പി.ഐ 123പേ ഉപയോഗിച്ച് 10,000 രൂപ വരെ പേയ്‌മെൻ്റ് നടത്താം. ഇത് 2025 ജനുവരി 1 മുതൽ ആരംഭിക്കും. ഇതു വരെ യു.പി.ഐ 123പേയുടെ ഇടപാട് പരിധി 5,000 രൂപയായിരുന്നു.

4. ഈ വർഷം കർഷകർക്കു വേണ്ടിയും റിസർവ് ബാങ്ക് ഓഫ് ഇന്ത്യ ചില തീരുമാനങ്ങൾ എടുത്തിരുന്നു. അതിൽ പ്രധാനപ്പെട്ട ഒന്നായിരുന്നു ഗ്യാരണ്ടി ഇല്ലാതെ കർഷകർക്ക് ലഭ്യമാക്കുന്ന വായ്പയുടെ പരിധി ആർ.ബി.ഐ 2 ലക്ഷം രൂപയായി ഉയർത്തി. 2025 ജനുവരി 1 മുതൽ പുതിയ നിയമങ്ങൾ പ്രാബല്യത്തിൽ വരും. നേരത്തെ ഈ വായ്പയുടെ പരിധി 1.60 ലക്ഷം രൂപയായിരുന്നു. ഇത് വലിയ നേട്ടമാണ്. കർഷകർക്കുള്ള ഏറ്റവും മികച്ചവായ്പാ സൗകര്യവുമാണിത്.

5. നാഷണൽ സ്റ്റോക്ക് എക്‌സ്‌ചേഞ്ച് (NSE) അതിൻ്റെ കരാറുകളുടെ കാലാവധി തീരുന്ന ദിവസത്തിൽ മാറ്റം വരുത്തി. ഇത് 2025 ജനുവരി 1 മുതൽ പ്രാബല്യത്തിൽ വരും. നവംബർ 29 ന് NSE ഇതുമായി ബന്ധപ്പെട്ട് ഒരു സർക്കുലർ പുറപ്പെടുവിച്ചിരുന്നു. ഇപ്പോൾ FinNifty, MidCPNifty, NiftyNext50 എന്നിവയുടെ പ്രതിമാസ കരാറുകൾ അതത് മാസത്തെ അവസാന വ്യാഴാഴ്ച അവസാനിക്കും. ബാങ്ക് നിഫ്റ്റിയുടെ പ്രതിമാസ, ത്രൈമാസ കരാറുകൾ മാസത്തിൻ്റെ അവസാന വ്യാഴാഴ്ച അവസാനിക്കും.