World Cup Prize: ലോകകപ്പ് നേടിയ ഇന്ത്യൻ ടീമിന് കിട്ടുക റെക്കോർഡ് സമ്മാന തുക, മനസും കീശയും നിറയും

ലോകക്രിക്കറ്റിന്‍റെ റാണിയാണ് ഇന്ത്യ. ഹർമൻപ്രീത് കൗറിന്റെ നേതൃത്വത്തിൽ ഇന്ത്യൻ വനിതാ ടീം അവരുടെ ആദ്യ ഏകദിന ലോകകപ്പ് നേടി. ഞായറാഴ്ച, ദക്ഷിണാഫ്രിക്കയും ഇന്ത്യയും തമ്മിലുള്ള ഐസിസി വനിതാ ഏകദിന ലോകകപ്പ് 2025 ന്റെ ഫൈനലിൽ ഇന്ത്യൻ വനിതകൾ ദക്ഷിണാഫ്രിക്കയെ പരാജയപ്പെടുത്തി. ഇതോടെ, സ്വന്തം മണ്ണിൽ ലോകകപ്പ് നേടി ഇന്ത്യൻ വനിതകൾ ചരിത്രം സൃഷ്ടിച്ചു.

ഇന്ത്യൻ ക്രിക്കറ്റ് ചരിത്രത്തിൽ പുതിയ അധ്യായം എഴുതിച്ചേർത്ത ഇന്ത്യൻ വനിതാ ടീമിന് ലോകകപ്പ് കിരീടത്തോടൊപ്പം എത്ര സമ്മാനത്തുക ലഭിക്കുമെന്ന് അറിയാമോ..?

സമ്മാന തുകയിലും റെക്കോർഡ്

കിരീടം നേടിയതിന് പിന്നാലെ സമ്മാന തുകയിലും റെക്കോർഡുകൾ സൃഷ്ടിച്ചിരിക്കുകയാണ് ഇന്ത്യൻ വനിതാ ടീം. 4.48 മില്യൺ യുഎസ് ഡോളർ (39.55 കോടി) ആണ് ഇന്ത്യൻ ടീമിന് ലഭിക്കുന്ന സമ്മാന തുക. വനിതാ ക്രിക്കറ്റിന്റെ ചരിത്രത്തിലെ ഏറ്റവും ഉയർന്ന സമ്മാന തുകയാണ് ഇത്. ഈ വർഷം സെപ്തംബറിലാണ് വനിത ലോകകപ്പ് വിജയികൾക്കുള്ള സമ്മാനത്തുക ഐ.സി.സി പ്രഖ്യാപിച്ചത്. വിജയികൾക്കുള്ളത് ഉൾപ്പടെ ആകെ 13.88 മില്യൺ യു.എസ് ഡോളർ(123 കോടി) മൂല്യമുള്ള സമ്മാനങ്ങളാണ് ഐ.സി.സി പ്രഖ്യാപിച്ചത്.

റണ്ണേഴ്സ് അപ്പായ ദക്ഷിണാഫ്രിക്കൻ ടീമിന് 2.24 മില്യൺ ഡോളറിന്റെ സമ്മാനം നൽകും. അതായത് ഏകദേശം 20 കോടി രൂപ. മുൻ ലോകകപ്പ് റണ്ണേഴ്‌സ് അപ്പ് സമ്മാനത്തുകയുമായി താരതമ്യപ്പെടുത്തുമ്പോൾ, ഇത്തവണ അത് 273% വർദ്ധിച്ചു. സെമിഫൈനലിസ്റ്റുകളായ ഇംഗ്ലണ്ടും ഓസ്‌ട്രേലിയയും 1.12 മില്യൺ യുഎസ് ഡോളർ വീതം അതായത് 9.89 കോടി രൂപ വീതം നേടി.

ഓരോ ടീമും പങ്കാളിത്ത ഫീസായി കുറഞ്ഞത് 250,000 യുഎസ് ഡോളർ (₹2.20 കോടി) നേടി. എട്ടാം സ്ഥാനത്തുള്ള പാകിസ്ഥാനും ഏഴാം സ്ഥാനത്തുള്ള ബംഗ്ലാദേശും യഥാക്രമം 4.67 കോടി രൂപയും 4.97 കോടി രൂപയും നേടി. ഇതോടെ, മറ്റ് നിരവധി സമ്മാനങ്ങൾക്കൊപ്പം എല്ലാ ടീമുകൾക്കുമായി ആകെ 122.5 കോടി രൂപയുടെ സമ്മാനത്തുക വിതരണം ചെയ്തു. പുരുഷന്മാരുടെ വേൾഡ് കപ്പ് ഫൈനലിൽ വിജയിച്ച ടീമിന് 4 മില്യൺ ഡോളറാണ് സമ്മാനമായി നൽകിയിരുന്നത്.

ദക്ഷിണാഫ്രിക്കയെ തോൽപ്പിച്ചത് 52 റൺസിന്

ഫൈനലില്‍ ദക്ഷിണാഫ്രിക്കയെ 52 റണ്‍സിന് തോല്‍പ്പിച്ചാണ് ഇന്ത്യ കന്നി കീരീടം നേടിയത്. നവി മുംബൈ, ഡി വൈ പാട്ടീല്‍ സ്റ്റേഡിയത്തില്‍ 299 റണ്‍സ് വിജയലക്ഷ്യം പിന്തുടരുന്ന ദക്ഷിണാഫ്രിക്ക 45.3 ഓവറില്‍ 246 റണ്‍സിന് എല്ലാവരും പുറത്തായി. അഞ്ച് വിക്കറ്റ് നേടിയ ദീപ്തി ശര്‍മയാണ് ദക്ഷിണാഫ്രിക്കയെ തകര്‍ത്തത്. ടോസ് നഷ്ടപ്പെട്ട് ബാറ്റിംഗിനെത്തിയ ഇന്ത്യയെ ഷെഫാലി വര്‍മ (87), ദീപ്തി ശര്‍മ (58), സ്മൃതി മന്ദാന (45), റിച്ചാ ഘോഷ് (34) എന്നിവരുടെ ഇന്നിംഗ്സുകളാണ് മികച്ച സ്‌കോറിലേക്ക് നയിച്ചത്