അമേരിക്കയെ സാമ്പത്തിക പ്രതിസന്ധിയിൽ നിന്ന് കരകയറ്റാൻ ട്രംപിന്റെ പട്ടികയിൽ ഈ 6 ഇന്ത്യൻ വംശജരും

കോവിഡ് അമേരിക്കന്‍ സമ്പദ് വ്യവസ്ഥയ്ക്കു മേല്‍ ഉണ്ടാക്കുന്ന ആഘാതം പ്രതീക്ഷിക്കുന്നതിലും അപ്പുറമെന്നാണ് വിവിധ ആഗോള റേറ്റിങ് ഏജന്‍സികൾ വിലയിരുത്തുന്നത്. കോവിഡിനെ തുടര്‍ന്നുള്ള ലോക്ക്‌ഡൗണും നിയന്ത്രണങ്ങളും യു.എസിന്റെ ദിനംപ്രതി ഉല്‍പ്പാദനത്തില്‍ നല്ലൊരു ശതമാനം കുറവ് വരുത്തിയിട്ടുണ്ട്. ദേശീയ അടിയന്തരാവസ്ഥ കാരണം വിനോദം മുതല്‍ ചില്ലറ വില്‍പ്പന മേഖല വരെ അടച്ചിട്ടതിനാൽ യു‌എസ് ജനസംഖ്യയുടെ 95 ശതമാനത്തിലധികം പേരും വീടുകളിൽ തന്നെയാണെന്നാണ് പ്രസ് ട്രസ്റ്റ് ഓഫ് ഇന്ത്യയുടെ ഒരു റിപ്പോർട്ടിൽ പറയുന്നത്. മാത്രമല്ല യുഎസിലെ സാമ്പത്തിക പ്രതിസന്ധിയെത്തുടർന്ന് 16 ദശലക്ഷത്തിലധികം ആളുകൾക്ക് തൊഴിൽ നഷ്ടമായെന്നാണ് ഔദ്യോഗിക കണക്കുകൾ വ്യക്തമാക്കുന്നത്.

നിലവിലെ സാമ്പത്തിക പ്രതിസന്ധിയിൽ നിന്നും യുഎസിനെ കരകയറ്റുന്നതിനു വേണ്ടി പ്രസിഡന്റ് ഡോണൾഡ് ട്രംപ്, 'ഗ്രേറ്റ് അമേരിക്കൻ ഇക്കണോമിക് റിവൈവൽ ഇൻഡസ്ട്രി' ഗ്രൂപ്പുകളുടെ ഭാഗമാകാനായി വിവിധ വ്യവസായ മേഖലയിൽ നിന്നുള്ള 200 ഓളം മുൻനിര അമേരിക്കൻ ബിനിനസുകാരെ ക്ഷണിച്ചിട്ടുണ്ട്. ഈ ഗ്രൂപ്പിൽ ആറ് ഇന്ത്യൻ വംശജരും ഉൾപ്പെടുന്നുണ്ട്.

ഗ്രേറ്റ് അമേരിക്കൻ ഇക്കണോമിക് റിവൈവൽ ഇൻഡസ്ട്രി ഗ്രൂപ്പുകളുടെ ഭാഗമാകാനായി ഡോണൾഡ് ട്രംപ് ക്ഷണിച്ച ആറ് ഇന്ത്യൻ വംശജർ ഇവരാണ്;

സുന്ദർ പിച്ചൈ

ഇന്ത്യൻ വംശജനായ സുന്ദർ പിച്ചൈ ഗൂഗിളിന്റെ ഇപ്പോഴത്തെ ചീഫ് എക്സിക്യൂട്ടീവ് ഓഫീസർ (സിഇഒ) ആണ്. 2004 മുതൽ ഗൂഗിളിൽ പ്രവർത്തിക്കുന്ന ഇദ്ദേഹം ആൽഫബെറ്റ് ഇൻകോർപ്പറേറ്റഡിന്റെ ഉപവിഭാഗമായ ഗൂഗിളിന്റെ ചീഫ് എക്സിക്യൂട്ടീവ് ഓഫീസറായി 2015 ഓഗസ്റ്റ് 10നു നിയമിതനാവുകയായിരുന്നു.

സത്യ നാദെല്ല

മൈക്രോസോഫ്‌റ്റിന്റെ ചീഫ് എക്സിക്യൂട്ടീവ് ഓഫീസറാണ് ഇന്ത്യൻ അമേരിക്കനായ സത്യ നാദെല്ല. സിഇഒ ആകുന്നതിനുമുമ്പ് മൈക്രോസോഫ്റ്റിന്റെ ക്ലൗഡ് ആൻഡ് എന്റർപ്രൈസ് ഗ്രൂപ്പിന്റെ എക്സിക്യൂട്ടീവ് വൈസ് പ്രസിഡന്റായിരുന്നു.

 

അരവിന്ദ് കൃഷ്ണ

പ്രമുഖ ആഗോള ഐടി കമ്പനിയായ ഐബിഎമ്മിന്റെ (ഇന്റർനാഷനൽ ബിസിനസ് മെഷീൻസ് കോർപറേഷൻ) ചീഫ് എക്സിക്യൂട്ടീവ് ഓഫിസറാണ് ഇന്ത്യൻ വംശജനായ അരവിന്ദ് കൃഷ്ണ. ഇദ്ദേഹത്തെ പ്രസിഡന്റ് ട്രംപ് ടെക് ഗ്രൂപ്പിനായി നാമനിർദേശം ചെയ്‌തിട്ടുണ്ട്.

സഞ്ജയ് മെഹോത്ര.

സെമികൺടക്‌ടർ ബ്രാൻഡായ മൈക്രോണിന്റെ പ്രസിഡന്റും സിഇഒയുമാണ് ഇന്ത്യൻ വംശജനായ സഞ്ജയ് മെഹോത്ര. ഇദ്ദേഹത്തേയും ട്രംപ് ടെക് ഗ്രൂപ്പിലേക്ക് നോമിനേറ്റ് ചെയ്‌തിട്ടുണ്ട്.

 

ആൻ മുഖർജി

പെർനോഡ് റിക്കാർഡിൽ നിന്നുള്ള ഇന്ത്യൻ വംശജയായ ആൻ മുഖർജിയെ ട്രംപ് മാനുഫാക്ചറിംഗ് ഗ്രൂപ്പിലേക്ക് നോമിനേറ്റ് ചെയ്‌തിട്ടുണ്ട്.

അജയ് ബംഗ

മാസ്റ്റര്‍കാര്‍ഡിന്റെ ചീഫ് എക്‌സിക്യൂട്ടീവ് ഓഫീസര്‍ അജയ് ബംഗയെ ഫിനാൻഷ്യൽ സർവീസസ് ഗ്രൂപ്പിലേക്ക് ഉൾപ്പെടുത്തിയിട്ടുണ്ട്.