എട്ടാം ശമ്പള കമ്മീഷന്‍: കേന്ദ്ര സര്‍ക്കാര്‍ ജീവനക്കാരുടെ ശമ്പള വര്‍ദ്ധനവ് എത്രയാകും? - അറിയേണ്ടതെല്ലാം

ശമ്പള-പെന്‍ഷന്‍ പരിഷ്‌കാരത്തിനായി രൂപീകരിച്ച 8-ാം കേന്ദ്ര ശമ്പള കമ്മീഷന്‍ പ്രവര്‍ത്തനം വേഗത്തിലാക്കി. സമയപരിധിക്കുള്ളില്‍ പ്രവര്‍ത്തനം പൂര്‍ത്തിയാക്കുക ലക്ഷ്യമിട്ടാണിത്.

18 മാസമാണ് കമ്മീഷന്റെ കാലാവധി.അതിനുശേഷം ശുപാര്‍ശകള്‍ സമര്‍പ്പിക്കും.

ഏകദേശം 50 ലക്ഷം കേന്ദ്ര സര്‍ക്കാര്‍ ജീവനക്കാര്‍ക്കും 69 ലക്ഷം പെന്‍ഷന്‍കാര്‍ക്കും പരിഷ്‌കരണത്തിന്റെ നേട്ടം ലഭ്യമാകും.

ശമ്പള വര്‍ദ്ധനവ് എത്രയാകും

8-ാം ശമ്പളക്കമ്മീഷന്‍ ശുപാര്‍ശകള്‍ പ്രകാരം ജീവനക്കാരുടെ ശമ്പളത്തില്‍ 20 മുതല്‍ 35 ശതമാനം വരെ വര്‍ധനവ് പ്രതീക്ഷിക്കപ്പെടുന്നു. പ്രതിമാസം 50,000 രൂപ ശമ്പളമുണ്ടെങ്കില്‍, പുതിയ ശമ്പള ഘടന പ്രകാരം അത് ഏകദേശം 60,000 മുതല്‍ 67,500 രൂപ വരെയാകാന്‍ സാധ്യതയുണ്ട്.

പ്രാബല്യത്തിലാകുന്ന തീയതി

പുതിയ ശമ്പള ഘടന 2026 ജനുവരി 1 മുതല്‍ പ്രാബല്യത്തില്‍ വരും. അതിന് ശേഷമാണ് കമ്മീഷന്‍ ശുപാര്‍ശകള്‍ സമര്‍പ്പിക്കുന്നതെങ്കില്‍ ജനുവരി 2026 മുതല്‍ ലഭിക്കേണ്ട തുക കുടിശികയായി (arrears) ലഭ്യമാക്കും.

നിര്‍ദേശങ്ങള്‍ക്ക് അവസരം

ശമ്പള പരിഷ്‌കാരവുമായി ബന്ധപ്പെട്ട് ജീവനക്കാരില്‍നിന്നും പെന്‍ഷന്‍കാരില്‍നിന്നും ധനമന്ത്രാലയം നിര്‍ദ്ദേശങ്ങള്‍ സ്വീകരിക്കുന്നു. ഇതിനായി പ്രത്യേക പോര്‍ട്ടല്‍ ആരംഭിച്ചിട്ടുണ്ട്.
2026 ഏപ്രില്‍ 30 വരെ നിര്‍ദേശങ്ങള്‍ സമര്‍പ്പിക്കാം.

മുന്‍ ശമ്പള കമ്മീഷനുകളുടെ സ്വാധീനം

മുന്‍പത്തെ ശമ്പള കമ്മീഷനുകള്‍ വലിയ ശമ്പള വര്‍ധനവാണ് നല്‍കിയിട്ടുള്ളത്.

• 6-ാം ശമ്പള കമ്മീഷന്‍ ശരാശരി 40% വരെ ശമ്പള വര്‍ധനവിന് ശുപാര്‍ശ ചെയ്തു
• 7-ാം ശമ്പള കമ്മീഷന്‍ ഏകദേശം 23-25% ശമ്പളവര്‍ദ്ധനവിന് ശുപാര്‍ശ ചെയ്തു.

അന്തിമ തീരുമാനം

വിദഗ്ധര്‍ പറയുന്നതനുസരിച്ച്, 8-ാം ശമ്പളക്കമ്മീഷന്റെ അന്തിമ ശുപാര്‍ശകള്‍ ചില പ്രധാന സാമ്പത്തിക ഘടകങ്ങളെ ആശ്രയിച്ചായിരിക്കും.

• പണപ്പെരുപ്പ നിരക്ക്
• സര്‍ക്കാരിന്റെ സാമ്പത്തിക ശേഷി
• 16-ാം ധനകാര്യ കമ്മീഷന്റെ ശുപാര്‍ശകള്‍
• നികുതി വരുമാനം

ഇതെല്ലാം പരിഗണിച്ചാണ് ശമ്പള വര്‍ധനവിന്റെ അന്തിമ രൂപം തീരുമാനിക്കുക.

കേന്ദ്ര സര്‍ക്കാര്‍ ജീവനക്കാരും പെന്‍ഷന്‍കാരും ഏറെ പ്രതീക്ഷയോടെ കാത്തിരിക്കുന്ന 8-ാം ശമ്പള കമ്മീഷന്‍ ശുപാര്‍ശകളെക്കുറിച്ചുള്ള വിവരങ്ങള്‍ വരും മാസങ്ങളില്‍ കൂടുതല്‍ വ്യക്തമാകും.