'ബാങ്കിങ്' വിശേഷണം നഷ്ടപ്പെട്ട് ആദിത്യ ബിര്‍ല ഐഡിയ പെയ്‌മെന്റ് ബാങ്ക്

കഴിഞ്ഞവര്‍ഷം ജൂലായിലാണ് ബാങ്കിങ് സേവനങ്ങള്‍ നിര്‍ത്തുന്ന കാര്യം ആദിത്യ ബിര്‍ല ഐഡിയ പെയ്‌മെന്റ് ബാങ്ക് പ്രഖ്യാപിച്ചത്. അപ്രതീക്ഷിത സംഭവവികാസങ്ങള്‍ മുന്‍നിര്‍ത്തി പിന്തുടര്‍ന്നുവന്ന സാമ്പത്തിക മാതൃക നഷ്ടത്തിലാണെന്ന് കമ്പനി അന്ന് വിശദീകരിച്ചു. ശേഷം 2019 നവംബറില്‍ ആദിത്യ ബിര്‍ല ഐഡിയ പെയ്‌മെന്റ് ബാങ്കിനെ പാപ്പര്‍പ്പട്ടികയില്‍ പെടുത്താനുള്ള നടപടികള്‍ റിസര്‍വ് ബാങ്ക് തുടങ്ങി.

നേരത്തെ, ഗ്രാസിം ഇന്‍ഡസ്ട്രീസ് ലിമിറ്റഡും വോഡഫോണ്‍ ഐഡിയ ലിമിറ്റഡും സംയുക്തമായാണ് പെയ്‌മെന്റ് ബാങ്കെന്ന ആശയം അവതരിപ്പിച്ചത്. സംരംഭത്തില്‍ 51 ശതമാനം ഓഹരി ഗ്രാസിം ഇന്‍ഡസ്ട്രീസിനായിരുന്നു. 49 ശതമാനം വോഡഫോണ്‍ ഐഡിയക്കും. എന്നാല്‍ 2019 ജൂലായില്‍ ബിസിനസ് മാതൃക നഷ്ടത്തിലാണെന്ന് സൂചിപ്പിച്ച് ആദിത്യ ബിര്‍ല ഐഡിയ പെയ്‌മെന്റ് ബാങ്ക് സേവനങ്ങള്‍ അവസാനിപ്പിക്കുകയായിരുന്നു. 2017 ഏപ്രിലിലാണ് പെയ്‌മെന്റ് ബാങ്കായി പ്രവര്‍ത്തിക്കാനുള്ള ലൈസന്‍സ് കമ്പനിക്ക് കിട്ടിയത്. 'പ്രീപെയ്ഡ് പെയ്‌മെന്റ് ഇന്‍സ്ട്രമെന്റ്' ബിസിനസ് രീതി സ്വീകരിക്കാനും കമ്പനിക്ക് അനുമതി ലഭിക്കുകയുണ്ടായി.

ശേഷം 2018 -ല്‍ രാജ്യത്തെ നാലാമത്തെ പെയ്‌മെന്റ് ബാങ്കായി ആദിത്യ ബിര്‍ല ഐഡിയ പെയ്‌മെന്റ് ബാങ്ക് പ്രവര്‍ത്തനം ആരംഭിച്ചു. 2015 ഓഗസ്റ്റ് മുതല്‍ക്കാണ് പെയ്‌മെന്റ് ബാങ്ക് സേവനങ്ങള്‍ക്ക് റിസര്‍വ് ബാങ്ക് ലൈസന്‍സ് നല്‍കാന്‍ തുടങ്ങിയത്. ഇതുവരെ 11 കമ്പനികള്‍ക്ക് റിസര്‍വ് ബാങ്ക് പെയ്‌മെന്റ് ബാങ്ക് ലൈസന്‍സ് നല്‍കിയിട്ടുണ്ട്. ആദിത്യ ബിര്‍ല ഐഡിയ പെയ്‌മെന്റ് ബാങ്കിന് പുറമെ വെസ്റ്റ്പാക് ബാങ്കിങ് കോര്‍പ്പറേഷനും ബാങ്കിങ് കമ്പനിയെന്ന സാധുത നഷ്ടപ്പെട്ടതായി റിസര്‍വ് ബാങ്ക് വ്യാഴാഴ്ച്ച അറിയിച്ചു.