ആമസോണിന് ഇനി പ്രൈം വീഡിയോ മാത്രമല്ല, മിനി ടിവിയും; സൗജന്യമായി വീഡിയോ ആസ്വദിക്കാം

മുംബൈ: ഇന്ത്യയില്‍ മിനി ടിവി അവതരിപ്പിച്ച് ആമസോണ്‍. പ്രൈമില്‍ നിന്നും വ്യത്യസ്തമായി എല്ലവര്‍ക്കും സൗജന്യമായി വീഡിയോ കണ്ട് ആസ്വദിക്കാമെന്ന പ്രത്യേകതയാണ് മിനി ടിവിക്കുള്ളത്. ആമസോണ്‍ ഇന്ത്യയിലാണ് ആദ്യമായി സൗജന്യ സ്ട്രീമിംഗ് ഇപ്പോള്‍ ആരംഭിച്ചിരിക്കുന്നത്. ആമസോണ്‍ ഡോട്ട് ഇന്‍ എന്ന ഷോപ്പിംഗ് ആപ്പിലൂടെയാണ് വെബ്‌സീരീസ് ഉള്‍പ്പടെയുള്ള വീഡിയോകള്‍ കാണാന്‍ സാധിക്കുക. വീഡിയോയ്ക്കിടെ യൂട്യൂപിലേത് പോലെ പരസ്യങ്ങളും കാണും.

ആമസോണ്‍ വീഡിയോ പ്ലാറ്റ്‌ഫോമായ പ്രൈം വീഡിയോയ്ക്ക് പുറമെയാണ് പുതിയ സേവനം കമ്പനി ഇപ്പോള്‍ അവതരിപ്പിച്ചിരിക്കുന്നത്. പുതിയ സേവനം പൂര്‍ണമായും സൗജന്യമാണെന്നാണ് ആമസോണ്‍ അറിയിച്ചിരിക്കുന്നത്. ഇപ്പോള്‍ ആന്‍ഡ്രോയിഡ് ഉപഭോക്താക്കള്‍ക്ക് മാത്രമാണ് മിനി ടിവി ലഭ്യമാക്കിയിരിക്കുന്നത്. ഐഒഎസ് ആപ്പിലും മൊബൈല്‍ വെബ്ബലും ഈ സേവനം പിന്നീട് അവതരിപ്പിക്കുമെന്ന് അധികൃതര്‍ അറിയിച്ചു.

പ്രമുഖ താരങ്ങളുടെ വെബ്‌സീരീസ്, ഹാസ്യ പരിപാടികള്‍, ടെക് ന്യൂസ്, ഫുഡ്, സൗന്ദര്യം, ഫാഷന്‍ തുടങ്ങിയ എല്ലാ വിഷയങ്ങളിലുള്ള പരിപാടിയും മിനി ടിവിയില്‍ ഉള്‍പ്പെടുത്തും. ഇംഗ്ലീഷിലും ഒമ്പത് ഇന്ത്യന്‍ ഭാഷകളിലും മിനി ടിവി നിവിലില്‍ വഭ്യമാകുമെന്ന് കമ്പനി അറിയിക്കുന്നു.