കർഷകർക്ക് നേട്ടം, മികച്ച വില ഉറപ്പാക്കും: അവശ്യ സാധന നിയമം ഭേദഗതി ചെയ്യും

കാർഷിക മേഖലയെയും അനുബന്ധ പ്രവർത്തനങ്ങളെയും കേന്ദ്രീകരിച്ചുള്ള പ്രഖ്യാപനങ്ങളാണ് ധനമന്ത്രി നിർമ്മല സീതാരാമൻ സാമ്പത്തിക പാക്കേജ് പ്രഖ്യാപനത്തിന്റെ മൂന്നാം ദിവസം നടത്തിയത്. ഇതിൽ വളരെ പ്രധാനപ്പെട്ട ഒന്നാണ് അവശ്യസാധന നിയമം ഭേദഗതി ചെയ്യും എന്നത്. അസാധാരണ സന്ദർഭങ്ങളിലൊഴികെ കർഷകർക്ക് ഉൽപ്പന്നങ്ങൾ കൂടുതൽ സംഭരിക്കാമെന്നും വിൽപന മെച്ചപ്പെടുത്താനും മികച്ച വില ഉറപ്പാക്കാനുമാണ് ഈ നിയമമെന്നും നിർമ്മല സീതാരാമൻ വ്യക്തമാക്കി.

നിയമ ഭേദഗതി വഴി കർഷകർക്ക് അന്തർ സംസ്ഥാന വ്യാപാരം എളുപ്പത്തിലാക്കുമെന്നും മന്ത്രി പറഞ്ഞു. കർഷകർക്ക് ഉൽപ്പന്നങ്ങൾ മെച്ചപ്പെട്ട വിലയ്ക്ക് വിൽക്കാം. കർഷകർക്ക് ഇഷ്ടമുളളയിടത്ത് ഉൽപ്പന്നങ്ങൾ വിൽക്കാനാകുമെന്നും സീതാരാമൻ പറഞ്ഞു. ഇതോടെ ലൈസൻസ് ഉളളവർക്ക് മാത്രമേ അന്തർ സംസ്ഥാന വ്യാപാരം നടത്താനാവൂ എന്ന സ്ഥിതി മാറും. കൃഷി തുടങ്ങുമ്പോൾ തന്നെ വില നിശ്ചയിക്കാമെന്നും ധനമന്ത്രി വ്യക്തമാക്കി.

കർഷകർക്ക് നേട്ടം: അവശ്യ സാധന നിയമം ഭേദഗതി ചെയ്യും

കർഷകർക്ക് വിപണി കണ്ടെത്താൻ എല്ലാവിധ സഹായവും നൽകുമെന്നും എല്ലാ പച്ചക്കറികൾക്കും പഴങ്ങൾക്കും വിപണി ഉറപ്പാക്കുമെന്നും മന്ത്രി പറഞ്ഞു. ഓപ്പറേഷൻ ഗ്രീൻ പദ്ധതി ഇതിനായി വ്യാപിപ്പിക്കും. തേനീച്ച വളർത്തൽ സംരംഭങ്ങൾക്ക് 500 കോടി രൂപ നൽകുമെന്നും ധനമന്ത്രി പ്രഖ്യാപിച്ചു. 2 ലക്ഷം തേനീച്ച കർഷകർക്ക് പ്രയോജനം നേടുന്ന പദ്ധതിയാണിത്. തേനിന്റെ നിലവാരം ഉയർത്താനുള്ള നടപടികൾ സ്വീകരിക്കുമെന്നും മന്ത്രി പറഞ്ഞു.

സംയോജിത തേനീച്ചവളർത്തൽ വികസന കേന്ദ്രങ്ങൾ, ശേഖരണം, വിപണനം, സംഭരണ ​​കേന്ദ്രങ്ങൾ എന്നിവയുമായി ബന്ധപ്പെട്ട അടിസ്ഥാന സൗകര്യ വികസനം നടപ്പിലാക്കുമെന്നും മന്ത്രി വ്യക്തമാക്കി.