ആപ്പിളിന്റെ ഇന്ത്യയിലെ ആദ്യ ഓണ്‍ലൈന്‍ റീട്ടെയില്‍ സ്‌റ്റോറിന് തുടക്കമായി

ദില്ലി: ആപ്പിളിന്റെ ഇന്ത്യയിലെ ആദ്യത്തെ ഓണ്‍ലൈന്‍ റീട്ടെയില്‍ സ്‌റ്റോര്‍ പ്രവര്‍ത്തനം തുടങ്ങി. ഓണ്‍ലൈന്‍ റീട്ടെയില്‍ സ്‌റ്റോര്‍ ഇന്ത്യയില്‍ പ്രവര്‍ത്തനം തുടങ്ങുന്നത് സംബന്ധിച്ച് കഴിഞ്ഞ ആഴ്ച തന്നെ ആപ്പിള്‍ വ്യക്തമാക്കിയിരുന്നു.

ഇന്ത്യയില്‍ ഇത്രകാലവും ആപ്പിള്‍ ഉത്പന്നങ്ങള്‍ വിറ്റിരുന്നത് ആമസോണ്‍, ഫ്‌ലിപ്കാര്‍ട്ട് തുടങ്ങിയ തേര്‍ഡ് പാര്‍ട്ടി വിതരണക്കാര്‍ മുഖേനയായിരുന്നു. ഇനി മുതല്‍ ആപ്പിള്‍ സ്റ്റോറില്‍ നിന്ന് നേരിട്ട് ഉത്പന്നങ്ങള്‍ വാങ്ങാനാവും. ഇതോടൊപ്പം ആപ്പിളില്‍ നിന്ന് നേരിട്ടുളള കസ്റ്റമര്‍ സപ്പോര്‍ട്ടും മറ്റ് ഡിസ്‌കൗണ്ടുകളും ലഭിക്കും. ഫിനാന്‍സ് ഓപ്ഷനുകളും കൂടി ലഭ്യമാകും.

ആപ്പിള്‍ ഉത്പന്നങ്ങള്‍ക്കായി ഇംഗ്ലീഷിലും ഹിന്ദിയിലും വെബ് സ്റ്റോര്‍ സഹായങ്ങള്‍ വാഗ്ദാനം ചെയ്യുന്നുണ്ട്. ആപ്പിള്‍ വാച്ച് എസ്ഇ, ആപ്പിള്‍ വാച്ച് സീരാസ് 6 തുടങ്ങി ആപ്പിളിന്റെ എല്ലാ പുത്തന്‍ ഉത്പന്നങ്ങളും ഇന്ത്യന്‍ സ്റ്റോറിലും ലഭ്യമാകും. നിലവില്‍ തേര്‍ഡ് പാര്‍ട്ടി ഓഫറുകള്‍ സ്റ്റോര്‍ പ്രദാനം ചെയ്യുന്നില്ല. എന്നാല്‍ അധികം വൈകാതെ ഇതും സാധ്യമാക്കും എന്നാണ് റിപ്പോര്‍ട്ട്.

ലോകത്തിലെ വമ്പന്‍മാരാണെങ്കിലും ഇന്ത്യയില്‍ സ്മാര്‍ട്ട് ഫോണ്‍ രംഗത്ത് അത്രയേറെ സ്വാധീനം ആപ്പിളിന് ഇല്ലെന്ന് പറയേണ്ടി വരും. നിലവില്‍ ഇന്ത്യയിലെ മൊബൈല്‍ ഫോണ്‍ മാര്‍ക്കറ്റ് ഷെയറിന്റെ വെറും രണ്ട് ശതമാനം മാത്രമാണ് ആപ്പിളിനുള്ളത്. ആപ്പിള്‍ ഉത്പന്നങ്ങളുടെ വില തന്നെയാണ് ഇതിന് പ്രധാന കാരണം. എന്നാല്‍ പ്രീമിയം സെഗ്മെന്റ്‌സ് നോക്കിയാല്‍ ആപ്പിളിന് വന്‍ സ്വാധീനമാണുള്ളത്.