യു.പി.ഐ മുതൽ മിനിമം ബാലൻസ് വരെ വമ്പൻ മാറ്റങ്ങൾ: നാളെ മുതൽ വിവിധ സാമ്പത്തിക നിയമങ്ങൾ മാറുന്നു

നാളെ ഏപ്രിൽ 1 മുതൽ 2025-26 സാമ്പത്തിക വർഷം ആരംഭിക്കുകയാണ്. ഇത്തവണ ഇന്ത്യയിലുടനീളമുള്ള എല്ലാ പൗരൻമാരെയും ഒരുപോലെ ബാധിക്കുന്ന നിരവധി സാമ്പത്തിക മാറ്റങ്ങളാണ് ഏപ്രിൽ 1 മുതൽ തുടങ്ങുന്നത്. പുതിയ ആദായ നികുതി നിയമ മാറ്റങ്ങൾ, ക്രെഡിറ്റ് കാർഡ് നിയമ മാറ്റം, യു.പി.ഐ നിയമത്തിലെ മാറ്റം തുടങ്ങിയ വിവിധ മാറ്റങ്ങളാണ് കാത്തിരിക്കുന്നത്.

ഇവ രാജ്യത്തിൻ്റെ സമ്പദ് വ്യവസ്ഥക്ക് വെല്ലുവിളി നിറക്കുമോ? അതോ വളർച്ചയിലേക്ക് നയിക്കുമോ? എല്ലാ നികുതിദായകരും അറിഞ്ഞിരിക്കേണ്ട ഏപ്രിൽ 1 മുതൽ പ്രാബല്യത്തിൽ വരുന്ന പ്രധാന പണ നിയമ മാറ്റങ്ങൾ ഇതാ...

1. യു.പി.ഐ നിയമത്തിലെ പ്രധാന മാറ്റം

ഏകീകൃത പേയ്‌മെന്റ് ഇന്റർഫേസിന്റെ (UPI) സുരക്ഷ വർദ്ധിപ്പിക്കുന്നതിനായി നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ (NPCI) ചില മാർഗ്ഗനിർദ്ദേശങ്ങൾ പ്രഖ്യാപിച്ചു. യു.പി.ഐയുമായി ബന്ധിപ്പിച്ചിരിക്കുന്ന പ്രവർത്തന രഹിതമായ നമ്പറുകൾ സുരക്ഷാ അപകടസാധ്യത സൃഷ്ടിക്കുന്നതിനാൽ അവ നിർത്തലാക്കുന്നതിനുള്ള മാർഗ്ഗനിർദ്ദേശങ്ങൾ നടപ്പിലാക്കാൻ NPCI ബാങ്കുകൾക്കും തേർഡ് പാർട്ടി യു.പി.ഐ ആപ്പുകൾക്കും നിർദ്ദേശം നൽകി. അതായത് ഏപ്രിൽ 1 മുതൽ ഇത്തരത്തിൽ ഉപയോ​ഗിക്കാത്ത നമ്പറുകളിൽ നിന്നുള്ള യു.പി.ഐ പേയ്‌മെന്റുകൾ സാധ്യമാകില്ല.

2. പുതിയ ആദായ നികുതി നിയമ മാറ്റം

2025 ലെ കേന്ദ്ര ബജറ്റിൽ ധനമന്ത്രി നിർമ്മല സീതാരാമൻ ആദായ നികുതിയിലെ മാറ്റങ്ങളെ കുറിച്ച് പ്രഖ്യാപനങ്ങൾ നടത്തി. ഇതിൽ പുതിയ നികുതി സ്ലാബുകളും നിരക്കുകളും ഉൾപ്പെടുത്തി. പുതുക്കിയ ആദായ നികുതി നിയമങ്ങൾ പ്രകാരം, പ്രതിവർഷം 12 ലക്ഷം വരെ വരുമാനമുള്ള വ്യക്തികൾ ആദായ നികുതി അടയ്ക്കേണ്ടതില്ല.

ശമ്പളം വാങ്ങുന്ന വ്യക്തികൾക്ക് 75,000 രൂപയുടെ സ്റ്റാൻഡേർഡ് കിഴിവ് ബാധകമാകും. ഇത് ഫലത്തിൽ പുതിയ നികുതി വ്യവസ്ഥയിൽ 12.75 ലക്ഷം ശമ്പളം നികുതി രഹിതമാക്കുന്നു. ഈ മാറ്റങ്ങളെല്ലാം നാളെ ഏപ്രിൽ 1 മുതൽ പ്രാബല്യത്തിൽ വരും.

3. ക്രെഡിറ്റ് കാർഡ് നിയമത്തിലെ മാറ്റം

വിവിധ ക്രെഡിറ്റ് കാർഡുകൾക്കും പല തരത്തിലുള്ള മാറ്റങ്ങളാണ് വരാനിരിക്കുന്നത്. സിംപ്ലിക്ലിക്ക് എസ്.ബി.ഐ ക്രെഡിറ്റ് കാർഡ്, എയർ ഇന്ത്യ എസ്‌.ബി‌.ഐ പ്ലാറ്റിനം ക്രെഡിറ്റ് കാർഡ് എന്നീ കാർഡുകൾ ഉപയോഗിക്കുന്നവർക്ക് വമ്പൻ പണി വരുന്നു. റിവാർഡ് പോയിന്റുകളുടെ എണ്ണത്തിൽ ​ഗണ്യമായ കുറവാണ് ഇത്തരം കാർഡുകളിൽ സംഭവിക്കാൻ പോകുന്നത്. എയർലൈൻ എയർ ഇന്ത്യയുമായി ലയിച്ചതിനുശേഷം ആക്സിസ് ബാങ്ക് വിസ്താര ക്രെഡിറ്റ് കാർഡ് ആനുകൂല്യങ്ങൾ പരിഷ്കരിക്കും. ഈ മാറ്റങ്ങളെല്ലാം ഏപ്രിൽ മുതൽ പ്രാബല്യത്തിൽ വരും.

4. ഏകീകൃത പെൻഷൻ പദ്ധതി (യു.പി.എസ്)

2024 ഓഗസ്റ്റിൽ സർക്കാർ ആരംഭിച്ച ഏകീകൃത പെൻഷൻ പദ്ധതി (യുപിഎസ്) ഏപ്രിൽ 1 മുതൽ പ്രാബല്യത്തിൽ വരും. ഇത് പഴയ പെൻഷൻ പദ്ധതിക്ക് പകരമായിട്ടാണ് എത്തുന്നത്. രാജ്യത്തെ ഏകദേശം 23 ലക്ഷം കേന്ദ്ര സർക്കാർ ജീവനക്കാരെ ഈ മാറ്റം ബാധിക്കും. കുറഞ്ഞത് 25 വർഷത്തെ സേവനമുള്ള ജീവനക്കാർക്ക് അവരുടെ റിട്ടയർമെൻ്റ് കാലത്തെ അവസാന 12 മാസത്തെ ശരാശരി അടിസ്ഥാന ശമ്പളത്തിന്റെ 50 ശതമാനത്തിന് തുല്യമായ പെൻഷൻ ലഭിക്കും.

5. ജി.എസ്.ടി നിയമത്തിൽ പ്രധാന മാറ്റം

ജിഎസ്ടി നിയമങ്ങളിലും പ്രധാന മാറ്റങ്ങൾ വരും. നികുതിദായകർക്ക് മികച്ച സുരക്ഷ ഉറപ്പാക്കുന്നതിനു വേണ്ടി ഗുഡ്സ് ആൻഡ് സർവീസ് ടാക്സ് (ജിഎസ്ടി) പോർട്ടലിൽ ഇപ്പോൾ മൾട്ടി-ഫാക്ടർ ഓതന്റിക്കേഷൻ (എംഎഫ്എ) ഓപ്ഷൻ ഉണ്ടായിരിക്കും. 180 ദിവസത്തിൽ കൂടുതൽ പഴക്കമില്ലാത്ത അടിസ്ഥാന രേഖകൾക്ക് മാത്രമേ ഇ-വേ ബില്ലുകൾ (ഇഡബ്ല്യുബി) സൃഷ്ടിക്കാൻ കഴിയൂ. ഈ മാറ്റങ്ങൾ ഏപ്രിൽ 1 മുതൽ പ്രാബല്യത്തിൽ വരും.

6. ബാങ്കിലെ മിനിമം ബാലൻസിലും മാറ്റം

എസ്‌.ബി‌.ഐ, പഞ്ചാബ് നാഷണൽ ബാങ്ക്, കാനറ ബാങ്ക് തുടങ്ങിയ ധനകാര്യ സ്ഥാപനങ്ങൾ അവരുടെ മിനിമം ബാലൻസ് നിയമങ്ങൾ പുതുക്കുന്നു. മിനിമം ബാലൻസ് നിലനിർത്താൻ കഴിയാത്ത ബാങ്ക് അക്കൗണ്ട് ഉടമകൾക്ക് പിഴ ചുമത്തും. ഏപ്രിൽ 1 മുതൽ ഈ മാറ്റങ്ങൾ പ്രാബല്യത്തിൽ വരും.