പുതുവർഷം കാറിന് വില കൂടുമോ...? അറിയാം വില വിവരങ്ങൾ, ഒപ്പം പുതിയ മോഡലുകളും

ഒരു കാർ സ്വന്തമാക്കുക എന്നത് മിക്ക ആളുകളുടെയും ആഗ്രഹവും, ലക്ഷ്യവുമാണ്. നിക്ഷേപ പദ്ധതികളിലൂടെയും കാർലോൺ സംഘടിപ്പിച്ചുമാണ് പലരും സ്വന്തമായി വാഹനം വാങ്ങുന്നത്. 2024ൽ വാഹനം സ്വന്തമാക്കാം എന്ന് കരുതുന്നവർക്ക് പക്ഷേ അത്ര സന്തോഷം പകരുന്ന വാർത്തകൾ അല്ല വിപണിയിൽ നിന്നും പുറത്തു വരുന്നത്. പുതുവർഷാരംഭത്തോടെ ഇന്ത്യയിലെ പല ഓട്ടോമൊബൈൽ കമ്പനികളും തങ്ങളുടെ വാഹനങ്ങളുടെ വില വർധിപ്പിച്ചിരുന്നു. ആഡംബര വാഹന നിർമ്മാതാക്കളായ ഓഡി ഇന്ത്യ മുതൽ ആഭ്യന്തര വാഹന നിർമ്മാതാക്കളായ ടാറ്റ മോട്ടോഴ്‌സ് വരെ വാഹനങ്ങളുടെ വില വർദ്ധിപ്പിച്ച കമ്പനികളാണ്. കാർ വാങ്ങുന്നതിന് മുൻപ് വില സംബന്ധിച്ച കാര്യങ്ങൾ വിശദമായി പരിശോധിക്കുന്നത് നല്ലതാണ്.

ഔഡി ഇന്ത്യ

ഔഡി കാർ എന്നത് എല്ലാവരുടെയും സ്വപ്ന വാഹനമാണ്. ഔഡി കാർ എന്ന് കേൾക്കുമ്പോൾ ആദ്യം മനസ്സിലേക്ക് വരുന്നത് അതിന്റെ ലോഗോ ആയിരിക്കും. ഒന്നിനുമേൽ ഒന്നായി കൊരുത്തെടുത്ത നാല് വളയങ്ങളാണ് ഈ വാഹന ഭീമന്റെ ​ലോഗോയിലുള്ളത്. ഔഡി ഇന്ത്യ രാജ്യത്തെ തങ്ങളുടെ മുഴുവൻ മോഡൽ ശ്രേണിയിലും വില വർദ്ധന പ്രഖ്യാപിച്ചു. 2 ശതമാനം വരെ വിലയാണ് ജർമ്മൻ വാഹന നിർമ്മാതാക്കൾ കൂട്ടിയത്. പ്രവർത്തന ചെലവ് വർധിച്ചതാണ് വില വർദ്ധിപ്പിക്കാൻ പ്രേരിപ്പിച്ചതെന്നാണ് കമ്പനി അധികൃതർ പറയുന്നത്. എന്തായാലും 2024 ജനുവരി 1 മുതൽ വിലവർദ്ധനവ് പ്രാബല്യത്തിൽ ഉണ്ട്.

ജനപ്രിയ ഔഡി എ6 സെഡാൻ 2024 പകുതിയോടെ ഇന്ത്യൻ വിപണിയിൽ മിഡ്-ലൈഫ് അപ്‌ഡേറ്റ് ലഭിക്കാൻ സാധ്യതയുണ്ട്. പുതിയ ഫീച്ചറുകൾക്കൊപ്പം സൂക്ഷ്മമായ ഡിസൈൻ മാറ്റങ്ങളും ചെറിയ ഇന്റീരിയർ മാറ്റങ്ങളുമായാണ് ഇത് വരുന്നത്. ഇതിന് മാട്രിക്‌സ് എൽഇഡി ഹെഡ്‌ലൈറ്റുകളുടെ അപ്‌ഡേറ്റ് ചെയ്‌ത പതിപ്പ്, ഒരു പ്രമുഖ സിംഗിൾ-ഫ്രെയിം ഓഡിയുടെ ഗ്രിൽ, പുതുക്കിയ ബമ്പറുകൾ എന്നിവ ലഭിക്കും. 7-സ്പീഡ് ഡ്യുവൽ-ക്ലച്ച് ഓട്ടോമാറ്റിക് ഗിയർബോക്‌സുള്ള നിലവിലുള്ള 245hp, 2.0L മൈൽഡ്-ഹൈബ്രിഡ് ടർബോ പെട്രോൾ എഞ്ചിൻ ഇത് നിലനിർത്തും.

ബിഎംഡബ്ലിയു

ജർമ്മൻ ആഡംബര കാർ നിർമ്മാതാക്കളായ ബിഎംഡബ്ല്യു വാഹനങ്ങളുടെ വില രണ്ട് ശതമാനമാണ് വർദ്ധിപ്പിച്ചത്. ബിഎംഡബ്ല്യു 220ഐ എം സ്‌പോർട്ട് മുതൽ ബിഎംഡബ്ല്യു എക്‌സ്‌എം വരയുള്ള വാഹന ശ്രേണികളുടെ വില 43.5 ലക്ഷം മുതൽ 2.6 കോടി രൂപ വരെയാണ്. എന്തായാലും വില വർധനവ് ജനുവരി 1 മുതൽ പ്രാബല്യത്തിലുണ്ട്.

2024 അവസാനത്തോടെ ബിഎംഡബ്ല്യു പുതിയ 5-സീരീസ്, i5 ഇലക്ട്രിക് സെഡാൻ എന്നിവ ഇന്ത്യൻ വിപണിയിൽ അവതരിപ്പിക്കുമെന്ന് പ്രതീക്ഷിക്കുന്നു. ന്യൂ-ജെൻ 5 സീരീസ് വലുപ്പത്തിൽ വളരുകയും ചില സവിശേഷതകൾ 7-സീരീസുമായി പങ്കിടുകയും ചെയ്യും. 12.3 ഇഞ്ച് ഡിജിറ്റൽ ഇൻസ്ട്രുമെന്റ് ക്ലസ്റ്ററും 14.9 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് യൂണിറ്റും - ഇരട്ട സ്‌ക്രീൻ ലേഔട്ട് ഫീച്ചർ ചെയ്യാൻ സാധ്യതയുണ്ട്.

മെഴ്‌സിഡസ്-ബെൻസ്

ജർമ്മൻ ആഡംബര, വാണിജ്യ വാഹന ഓട്ടോമോട്ടീവ് ബ്രാൻഡായ മെഴ്‌സിഡസ് ബെൻസ് 2024 ജനുവരി 1 മുതൽ ഇന്ത്യയിൽ വാഹനങ്ങളുടെ വില 2 ശതമാനം വർദ്ധിപ്പിച്ചു..ഇൻപുട്ട് ചെലവുകൾ, ചരക്ക് ചെലവുകൾ, ലോജിസ്റ്റിക് ചെലവുകൾ എന്നിവയിലെ വിലവർധനമാണ് വാഹനങ്ങളുടെ വില വർദ്ധിപ്പിക്കാൻ പ്രേരിപ്പിച്ചത് എന്നാണ് കമ്പനിയുടെ വിശദീകരണം.

മെഴ്‍സിഡസ് 2024 ആദ്യ പാദത്തിൽ GLS ഫെയ്‌സ്‌ലിഫ്റ്റ്, GLA ഫേസ്‌ലിഫ്റ്റ്, GLB ഫെയ്‌സ്‌ലിഫ്റ്റ് എന്നിവ ഇന്ത്യൻ വിപണിയിൽ അവതരിപ്പിക്കും. GLA & GLB ഫെയ്‌സ്‌ലിഫ്റ്റുകൾ നിലവിലുള്ള 1.3L ടർബോ പെട്രോൾ, 2.0L ഡീസൽ എഞ്ചിനുകൾ നിലനിർത്തുമ്പോൾ, GLS ഫെയ്‌സ്‌ലിഫ്റ്റ് 3.0L ടർബോ പെട്രോൾ, 3.0L ടർബോ ഡീസൽ എഞ്ചിൻ ഓപ്ഷനുകൾക്കൊപ്പം വാഗ്ദാനം ചെയ്യുന്നു.

ഫോക്‌സ്‌വാഗൺ

ഫോക്‌സ്‌വാഗണും വാഹനങ്ങളുടെ വിലയിൽ രണ്ട് ശതമാനത്തിന്റെ വർദ്ധനവാണ് വരുത്തിയത്.

ടാറ്റ മോട്ടോഴ്സ്

ആഭ്യന്തര വാഹന നിർമ്മാതാക്കളായ ടാറ്റ മോട്ടോഴ്‌സ് 2024 ജനുവരി 1 മുതൽ വാഹനങ്ങളുടെ വില 3 ശതമാനം വരെ വർധിപ്പിച്ചിച്ചു.