ആയുഷ്മാൻ ഭാരത് സ്കീം: 5 ലക്ഷം കവറേജ് നേടാം, ഇതെല്ലാമാണ് പ്രധാന നേട്ടങ്ങൾ

വയോ ജനങ്ങൾക്കു വേണ്ടി തയ്യാറാക്കിയ കേന്ദ്ര സർക്കാറിന്റെ പദ്ധതിയാണ് ആയുഷ്മാൻ ഭാരത് പ്രധാൻ മന്ത്രി ജൻ ആരോഗ്യ യോജന (AB PM-JAY). ഇതിന്റെ അടിസ്ഥാനത്തിൽ 70 വയസും അതിൽ കൂടുതലുമുള്ള എല്ലാ മുതിർന്ന പൗരന്മാർക്കും ആരോഗ്യ പരിരക്ഷ നൽകുന്നു. ഏകദേശം 6 കോടി മുതിർന്ന പൗരന്മാർക്ക് ഇത്തരത്തിൽ പരിരക്ഷ ഉറപ്പാക്കി. പൊതു ധനസഹായത്തോടെയുള്ള ലോകത്തിലെ ഏറ്റവും വലിയ ആരോഗ്യ ഇൻഷുറൻസ് പദ്ധതിയാണിതെന്ന് വിശ്വസിക്കപ്പെടുന്നു.

ഓരോരുത്തരുടേയും സാമൂഹിക-സാമ്പത്തിക നില വേർതിരിച്ച് കാണാതെ സമഗ്രമായ ആരോഗ്യ പരിരക്ഷയാണ് ഈ പദ്ധതിയിലൂടെ വാഗ്ദാനം ചെയ്യുന്നത്. അതായത് ആരോഗ്യപ്രശ്നങ്ങൾക്ക് സമ്പന്നനെന്നോ ദരിദ്രനെന്നോ വേർതിരിവില്ല എന്നാണ് ഈ സ്കീമിലൂടെ ഉയർത്തിക്കാട്ടുന്നത്. 5 ലക്ഷം രൂപയാണ് ഇൻഷൂറൻസ് പരിരക്ഷ നൽകുന്നത്. മാത്രമല്ല യോ​ഗ്യത നേടിയവരുടെ കുടുംബത്തിനും ഈ പരിരക്ഷ ഉപയോ​ഗിക്കാം.

എന്താണ് ആയുഷ്മാൻ ഭാരത് പ്രധാൻ മന്ത്രി ജൻ ആരോ​ഗ്യ യോജന പദ്ധതി?

രാജ്യത്തെ ഓരോ മുതിർന്ന പൗരന്‍റെയും സുരക്ഷയ്ക്കായി ഭാരത സർക്കാർ രൂപീകരിച്ച പദ്ധതിയാണിത്. നാഷണല്‍ ഹെല്‍ത്ത് പ്രോട്ടക്ഷന്‍ സ്‌കീമിന്റെ പുതുക്കിയ രൂപമാണിത്. ഒരു വ്യക്തിക്കോ അല്ലെങ്കില്‍ കുടുംബാംഗങ്ങള്‍ക്കോ ചികിത്സക്കായി 5 ലക്ഷം രൂപ വരെ ഈ പദ്ധതിയിലൂടെ വിനിയോഗിക്കാവുന്നതാണ്. ഇത് പൂര്‍ണ്ണമായും സര്‍ക്കാര്‍ നിയന്ത്രണത്തില്‍ നടപ്പാക്കുന്ന പദ്ധതിയാണിത്. ചികിത്സ രംഗത്തെ വര്‍ദ്ധിച്ചു വരുന്ന ചെലവുകള്‍ താങ്ങാന്‍ സാധാരണക്കാര്‍ക്കു സാധിക്കാത്തതിനാൽ ഈ പദ്ധതി തീർച്ചയായും അവർക്കൊരു കൈത്താങ്ങ് ആയിരിക്കും.

പിഎംജെഎവൈ സ്കീമിന് കീഴിലുള്ള ആനുകൂല്യങ്ങൾ എന്തൊക്കെയാണ്?

• പരിശോധനക്കോ ചികിത്സക്കോ വേണ്ടി ആശുപത്രിയില്‍ പ്രവേശിക്കപ്പെടുന്നതിനു മുന്‍പുള്ള 3 ദിവസത്തെ ചെലവും കൂടാതെ, ആശുപത്രി വാസത്തിനു ശേഷമുള്ള 15 ദിവസത്തെ ചെലവും പരിരക്ഷയിൽ ഉൾപ്പെടുന്നു.

• ഈ ക്ലൈമില്‍ മരുന്നുകള്‍, മറ്റാവശ്യ വസ്തുക്കള്‍, പരിശോധനകള്‍, ഡോക്ടര്‍ ഫീസ്, മുറി വാടക, ഓപ്പറേഷന്‍ തീയറ്റര്‍ ചാര്‍ജുകള്‍ , ഐസിയു ചാര്‍ജ്ജ്, ഭക്ഷണം, ഇംപ്ലാന്‍റ് ചാര്‍ജുകള്‍ എന്നിവ ഉള്‍പ്പെടുന്നതായിരിക്കും.

• സര്‍ക്കാര്‍ ആശുപത്രിക്കു പുറമേ സ്വകാര്യ ആശുപത്രിയിലും ഈ പദ്ധതി പ്രകാരം പണമീടാക്കാതെ തന്നെ ചികിത്സ ലഭിക്കുന്നതായിരിക്കും

• ചികിത്സയുമായി ബന്ധപ്പെട്ടുണ്ടാകാന്‍ സാധ്യതയുള്ള മറ്റു ആരോ​ഗ്യ പ്രശ്നങ്ങൾക്കും ഇതിലൂടെ സഹായം ലഭിക്കുന്നതായിരിക്കും

• കുടുംബത്തിന്‍റെ വലുപ്പം, പ്രായം അല്ലെങ്കിൽ ലിംഗത്വം എന്നിവ അടിസ്ഥാനമാക്കി നിയന്ത്രണം ഇല്ല.

പി.എം.ജെ.എ.വൈ യുടെ പ്രധാന മേന്മകള്‍

• കണ്‍സള്‍ട്ടേഷന്‍, മെഡിക്കല്‍ പരിശോധനകള്‍, ചികിത്സകള്‍
• മെഡിസിനും അനുബന്ധ വസ്തുക്കളും
• അതി തീവ്ര പരിചരണ വിഭാഗം
• രോഗ നിര്‍ണ്ണയവും ലാബ് പരിശോധനകളും
• ഇംപ്ലാന്‍റേഷന്‍
• താമസ സൗകര്യം
• തുടര്‍ ചികിത്സ

ഇത്തരത്തിൽ ഈ പദ്ധതിക്കു കീഴിൽ ഒരു വ്യക്തിക്കോ കുടുംബത്തിനോ പൂർണ പരിരക്ഷ നൽകാൻ ഇതിലൂടെ സാധിക്കും. പ്രൈവറ്റ് ആശുപത്രികൾ ഈടാക്കുന്ന കൊള്ള ലാഭത്തിൽ നിന്നും മോചനം നേടാൻ സാധിക്കും.

ആയുഷ്മാൻ ഭാരത് സ്കീം 50 കോടിയിലധികം വ്യക്തികൾക്ക് നൽകാൻ ലക്ഷ്യമിടുന്നുണ്ട് എന്നാൽ നഗര-ഗ്രാമീണ ജനസംഖ്യയ്ക്ക് വ്യത്യസ്ത മാനദണ്ഡങ്ങളാണുള്ളത്. അർബൻ ഏരിയയിൽ ഗാർഹിക തൊഴിലാളികൾ, വഴിയോരക്കച്ചവടക്കാർ, നിർമ്മാണ തൊഴിലാളികൾ, തൂപ്പുകാരും ശുചീകരണ തൊഴിലാളികളും, വീട്ടുജോലിക്കാർ, തയ്യൽക്കാർ തുടങ്ങിയ മേഖലകളിലെല്ലാം ജോലി ചെയ്യുന്നവർക്കും ഈ പരിരക്ഷ നൽകുന്നു.

വീടില്ലാത്ത കുടുംബങ്ങൾ, പ്രാകൃത ഗോത്ര വിഭാഗങ്ങൾ, കടുത്ത ദാരിദ്ര്യത്തിൽ ജീവിക്കുന്നവർ അല്ലെങ്കിൽ ഭിക്ഷയെടുത്ത് ജീവിക്കുന്നവർ, താൽക്കാലിക ചുവരുകളും മേൽക്കൂരയുമുള്ള ഒറ്റമുറി വീട്ടിൽ താമസിക്കുന്ന കുടുംബങ്ങൾ, ശുചീകരണ ജോലികൾ ചെയ്യുന്ന കുടുംബങ്ങൾ, പട്ടികജാതി-പട്ടികവർഗ വിഭാഗത്തിൽ ഉൾപ്പെടുന്ന കുടുംബങ്ങൾ തുടങ്ങിയ ​ഗ്രാമീണ മേഖലയിൽ ജീവിക്കുന്നവർക്കും പരിരക്ഷ ഉറപ്പാക്കുന്നു.