ബജാജ് ഡൊമിനാർ 250 മോഡൽ സ്വന്തമാക്കാം 17000 രൂപയോളം ഇളവിൽ; വിലകുറച്ച് കമ്പനി

ന്യൂഡൽഹി: കോവിഡ് പ്രതിസന്ധിക്കിടയിലും രാജ്യത്ത് ബൈക്കുകളുടെയും കാറുകളുടെയും വില ഉയരുകയാണ്. ഈ ഒരു ഘട്ടത്തിൽ ഇന്ത്യയിലെ പ്രമുഖ ടൂ വീലർ നിർമാതാക്കളായ ബജാജ് അവരുടെ ബ്രാൻഡ് മോഡലുകളിലൊന്നായ ഡൊമിനാറിന് വില കുറച്ചിരിക്കുകയാണ്. ഡോമിനാർ 250 സിസി മോഡലിനാണ് ബജാജ് 17,000 രൂപയോളം കുറച്ചിരിക്കുന്നത്.

കൃത്യമായി പറഞ്ഞാൽ 16,800 രൂപയാണ് ബജാജ് ഡൊമിനാറിന് വില കുറച്ചിരിക്കുന്നത്. അതായത് നേരത്തെ 1.71 ലക്ഷം രൂപയ്ക്ക് ലഭിച്ചിരുന്ന ബജാജ് ഡൊമിനാർ 250 ഇനി മുതൽ സ്വന്തമാക്കണേൽ 1.54 ലക്ഷം രൂപ എക്സ്ഷോറൂം വിലയായി മുടക്കിയാൽ മതി. വില കുറച്ചെങ്കിലും മോഡലിൽ യാതൊരു മാറ്റവുമില്ലാതെയാകും ഡൊമിനാർ ഉപഭോക്താക്കളിലേക്ക് എത്തുക.

എന്നാൽ ഇതുവരെ നാല് കളർ ഓപ്ഷനുകളിൽ ലഭ്യമായിരുന്ന 250 പതിപ്പ് ഇനിമുതൽ രണ്ട് നിറങ്ങളിൽ മാത്രമാകും തെരഞ്ഞെടുക്കാനാവുക. ഡൊമിനാർ 250 കാന്യോൺ റെഡ്, ചാർക്കോൾ ബ്ലാക്ക്, അറോറ ഗ്രീൻ, വൈൻ ബ്ലാക്ക് എന്നിവ വാഗ്ദാനം ചെയ്തിരുന്നു. വില കുറഞ്ഞതോടെ ഉത്പാദനം കാനിയൻ റെഡ്, ചാർക്കോൾ ബ്ലാക്ക് എന്നിവയിലേക്ക് ചുരുങ്ങി.