ബെംഗളൂരു മലയാളികളുടെ ശ്രദ്ധയ്ക്ക്; കന്റോണ്‍മെന്റ് സ്‌റ്റേഷനില്‍ ട്രെയ്‌നുകള്‍ വഴി തിരിച്ചുവിടുന്നു

ബെംഗളൂരു മലയാളികള്‍ ഏറെ ആശ്രയിക്കുന്ന റെയില്‍വേ സ്‌റ്റേഷനുകളാണ് കന്റോണ്‍മെന്റ്, മജസ്റ്റിക് (കെഎസ്ആര്‍ ബെംഗളൂരു), യശ്വന്ത്പൂര്‍ എന്നിവ. നിര്‍മ്മാണ പ്രവര്‍ത്തനങ്ങള്‍ നടക്കുന്നതിനാല്‍ ഇതില്‍ കന്റോണ്‍മെന്റ് സ്‌റ്റേഷന്‍ ട്രെയ്ന്‍ വഴിതിരിച്ചുവിടലിന് വേദിയാകും. ട്രെയ്‌നുകള്‍ വൈകാനും നിര്‍മ്മാണ പ്രവര്‍ത്തനങ്ങള്‍ കാരണമാകും.

കന്റോണ്‍മെന്റ്, ഫ്രേസര്‍ ടൗണ്‍ പ്രദേശങ്ങളില്‍ താമസിക്കുന്ന മലയാളികള്‍ ഇക്കാര്യത്തില്‍ ജാഗ്രത പുലര്‍ത്തണം.

ട്രെയിന്‍ വഴിതിരിച്ചുവിടുന്നു

• മൈസൂരു-എസ്.എം.വി.ടി ബെംഗളൂരു ഡെയ്ലി പാസഞ്ചര്‍ സ്പെഷ്യല്‍ ട്രെയിന്‍ (ട്രെയ്ന്‍ നമ്പര്‍: 06269)ഫെബ്രുവരി 17 മുതല്‍ മാര്‍ച്ച് 16 വരെ കെ.എസ്.ആര്‍ ബെംഗളൂരു-യശ്വന്ത്പൂര്‍-ബനസ്വാഡി-എസ്.എം.വി.ടി ബെംഗളൂരു സ്‌റ്റേഷനുകള്‍ വഴിയാണ് സര്‍വീസ് നടത്തുക. ഈ ദിവസങ്ങളില്‍ ട്രെയ്ന്‍ കന്റോണ്‍മെന്റ് സ്‌റ്റേഷനില്‍ നിര്‍ത്തില്ല.
• മൈസൂരു ഡെയ്ലി പാസഞ്ചര്‍ സ്പെഷ്യല്‍ ട്രെയിനും ( നമ്പര്‍:06270) ഫെബ്രുവരി 17 മുതല്‍ മാര്‍ച്ച് 16 വരെ കന്റോണ്‍മെന്റ് സ്‌റ്റേഷനില്‍ നിര്‍ത്തില്ല. പകരം എസ്.എം.വി.ടി -ബെംഗളൂരു-ബനസ്വാഡി-യശ്വന്ത്പൂര്‍-കെ.എസ്.ആര്‍ ബെംഗളൂരു വഴിയായിരിക്കും ഈ ട്രെയ്ന്‍ സര്‍വീസ് നടത്തുക.
• ട്രെയ്ന്‍ നമ്പര്‍ 16021 എംജിആര്‍ ചെന്നൈ സെന്‍ട്രല്‍-അശോകപുരം ഡെയ്‌ലി എക്‌സ്പ്രസ് ഫെബ്രുവരി 17 നും ഫെബ്രുവരി 19 നും മാര്‍ച്ച് 3,4 തീയതികളിലും 30 മിനിറ്റ് വൈകി ഓടും.

ബെംഗളൂരുവില്‍, പ്രത്യേകിച്ച് ഫ്രേസര്‍ ടൗണ്‍, ശിവാജിനഗര്‍, ബെന്‍സണ്‍ ടൗണ്‍, സമീപ പ്രദേശങ്ങള്‍ എന്നിവിടങ്ങളില്‍ താമസിക്കുന്ന മലയാളികള്‍ പലപ്പോഴും സൗകര്യത്തിനായി കന്റോണ്‍മെന്റ് സ്റ്റേഷനെ ആശ്രയിക്കുന്നു. മേല്‍പറഞ്ഞ ട്രെയ്‌നുകളെ ആശ്രയിക്കുന്ന ഓഫീസ് ജീവനക്കാരും വിദ്യാര്‍ത്ഥികളും ഇപ്പോള്‍ കെഎസ്ആര്‍ ബെംഗളൂരു, യശ്വന്ത്പൂര്‍, അല്ലെങ്കില്‍ ബനസ്വാടി സ്റ്റേഷനുകള്‍ ഉപയോഗിക്കേണ്ടതായി വരും.

ഇത് അധിക യാത്രാ സമയവും ചെലവും വര്‍ദ്ധിപ്പിക്കുന്നു. ചെന്നൈ എക്‌സ്പ്രസ് ആശ്രയിക്കുന്ന മലയാളികളെ ട്രെയ്ന്‍ വൈകുന്നത് വലയ്ക്കും.