ബാങ്കുകൾ ആഴ്ചയിൽ 3 ദിവസം മാത്രം; ബാങ്കിങിതര ധനകാര്യ സ്ഥാപനങ്ങളുടെ സമയത്തിലും മാറ്റം

തിരുവനന്തപുരം; സംസ്ഥാനത്ത് ശനിയാഴ്ച മുതൽ ലോക്ക് ഡൗൺ പ്രഖ്യാപിച്ച പശ്ചാത്തലത്തിൽ ബാങ്കുകളുടെ പ്രവൃത്തി ദിനത്തിലും മാറ്റം. ബാങ്കുകൾ ആഴ്ചയിൽ ഒന്നിടവിട്ട ദിവസങ്ങളിലായിരിക്കും പ്രവർത്തിക്കുക. തിങ്കൾ, ബുധൻ, വെള്ളി എന്നീ മൂന്ന് ദിവസങ്ങളിൽ മാത്രമേ ബാങ്കുകൾ പ്രവർത്തിക്കുകയുള്ളൂ. ബാങ്കിങിതര ധനകാര്യ സ്ഥാപനങ്ങളുടെ (എന്‍ബിഎഫ്‌സി) പ്രവർത്തന സമയത്തിലും മാറ്റം ഉണ്ട്.

രാവിലെ 10 മുതല്‍ ഉച്ചയ്ക്ക് 1 മണി വരെയാകും തുറന്ന് പ്രവ‍ർത്തിക്കുക. കര്‍ശനമായ കൊവിഡ് പ്രോട്ടോക്കോള്‍ പാലിച്ചായിരിക്കും സ്ഥാപനങ്ങള്‍ പ്രവര്‍ത്തിക്കുകയെന്ന് അസോസിയേഷന്‍ ഓഫ് നോണ്‍ ബാങ്കിങ് ഫിനാന്‍സ് കമ്പനീസ് വാര്‍ത്താക്കുറിപ്പില്‍ അറിയിച്ചു.സ്ഥാപനങ്ങൾ നൽകി വരുന്ന ഡിജിറ്റൽ സേവനങ്ങൾ തുടരും.

സംസ്ഥാനത്ത് 8 ന് രാവിലെ ആറ് മുതലാണ് ലോക്ക്ഡൗൺ പ്രഖ്യാപിച്ചിരിക്കുന്നത്. 16 വരെയാണ് സംസ്ഥാനം സമ്പൂർണമായും അടച്ചിടുക. അവശ്യസർവ്വീസുകൾ എല്ലാം തന്നെ പ്രവർത്തിക്കും. അതേസമയം സംസ്ഥാനത്ത് ഇന്ന് 38,460 പേർക്ക് കൊവിഡ് സ്ഥിരീകരിച്ചു.

എറണാകുളം 5361, കോഴിക്കോട് 4200, തിരുവനന്തപുരം 3950, മലപ്പുറം 3949, തൃശൂര്‍ 3738, കണ്ണൂര്‍ 3139, പാലക്കാട് 2968, കൊല്ലം 2422, ആലപ്പുഴ 2160, കോട്ടയം 2153, പത്തനംതിട്ട 1191, വയനാട് 1173, ഇടുക്കി 1117, കാസര്‍ഗോഡ് 939 എന്നിങ്ങനേയാണ് ജില്ലകളില്‍ ഇന്ന് രോഗ ബാധ സ്ഥിരീകരിച്ചത്.