ബെംഗളൂരു ബിഎംടിസി ബസില്‍ നിന്നുമൊരു പാഠം, നിങ്ങള്‍ക്കാണിത് സംഭവിച്ചതെങ്കിലോ?

ഓരോ ബെംഗളൂരു നിവാസിയുടേയും ജീവിതത്തിന്റെ ഭാഗമാണ് ബാംഗ്ലൂര്‍ മെട്രോപൊളിറ്റന്‍ ട്രാന്‍സ്‌പോര്‍ട്ട് കോര്‍പ്പറേഷന്‍ (ബിഎംടിസി) ബസ്സുകള്‍. ബസ് ജീവനക്കാരുടെ സത്യസന്ധതയും അര്‍പ്പണമനോഭാവവും തെളിയിക്കുന്ന നിരവധി സംഭവങ്ങളാണ് ഇപ്പോള്‍ റിപ്പോര്‍ട്ട് ചെയ്യപ്പെടുന്നത്.

തെറ്റായി ട്രാന്‍സ്ഫര്‍ ചെയ്ത വലിയ തുകകള്‍ മടക്കി നല്‍കിയതും മറന്നുവച്ച വിലകൂടിയ വസ്തുക്കള്‍ തിരിച്ചുനല്‍കിയതും ഉദാഹരണങ്ങള്‍. 

ദിവസം ജനുവരി 14. അന്ന്, ഉത്തരഹള്ളിയില്‍ നിന്നും ബിഎംടിസി ബസില്‍ കയറിയ വയോധിക, ടിക്കറ്റ് നിരക്കായ 6 രൂപയ്ക്ക് പകരം ക്യുആര്‍ കോഡ് വഴി ട്രാന്‍സ്ഫര്‍ ചെയ്തത് 62,316 രൂപയാണ്. സംഭവം തിരിച്ചറിഞ്ഞ കണ്ടക്ടര്‍ കെ പുട്ടുസ്വാമി, ഇവരെ കാര്യങ്ങള്‍ ധരിപ്പിക്കുകയും ഡിപ്പോയുമായി ബന്ധപ്പെട്ട് തുക തിരിച്ചുനല്‍കാനുള്ള സജ്ജീകരണങ്ങളൊരുക്കുകയും ചെയ്തു. ബാങ്ക് രേഖകളും ആധാറിന്റെ കോപ്പിയുമാണ് രേഖകളായി സ്വീകരിച്ചത്.

ഡിസംബര്‍ 5 ന് നിരഞ്ജന എന്ന ഐടി പ്രൊഫഷണലും സമാന അനുഭവത്തിലൂടെ കടന്നുപോയി. കണ്ടക്ടര്‍ മാരുതി പാന്ദ്രയാണ് ഇത്തവണ രക്ഷയ്‌ക്കെത്തിയത്. തെറ്റായി ട്രാന്‍സ്ഫര്‍ ചെയ്ത 64,000 രൂപ തിരിച്ചുകിട്ടാന്‍ അദ്ദേഹത്തിന്റെ സമയോചിത ഇടപെടലിലൂടെ സാധിച്ചു. കെങ്കേരിയില്‍ നിന്ന് ഇലക്ട്രോണിക്‌സ് സിറ്റിയിലേയ്ക്കുള്ള യാത്രയിലായിരുന്നു നിരഞ്ജന.

മറന്നുവച്ച 10 ലക്ഷം രൂപയും സ്വര്‍ണ്ണാഭരണങ്ങളും തിരിച്ചു നല്‍കിയതും റോബോട്ടിക് വാക്വം ക്ലീനര്‍ ഉടമസ്ഥയ്ക്ക് നല്‍കിയതും ബിഎംടിസിയുടെ സേവന മാതൃകകളായി റിപ്പോര്‍ട്ട് ചെയ്യപ്പെടുന്നു. പ്രശംസനീയ സേവനങ്ങള്‍ നല്‍കിയ കണ്ടക്ടര്‍മാരെ ഗതാഗത മന്ത്രി രാമലിംഗ റെഡ്ഡി ഈയിടെ ഉപഹാരങ്ങള്‍ നല്‍കി ആദരിച്ചു.

ബെംഗളൂരുവില്‍ താമസിക്കുന്നവരും ജോലി ചെയ്യുന്നവരുമായ മലയാളികളുള്‍പ്പെടെ ഏവര്‍ക്കും ആശ്വാസകരമായ നടപടിയാണ് ബിഎംടിസിയുടെ ഭാഗത്തുനിന്നുമുണ്ടായത്.

അധിക തുക തെറ്റായി നല്‍കുക, സാധനങ്ങള്‍ മറന്നുവയ്ക്കുക തുടങ്ങിയ സാഹചര്യങ്ങളില്‍ സംവിധാനം ഉണര്‍ന്ന് പ്രവര്‍ത്തിക്കുമെന്ന് ഈ സംഭവങ്ങള്‍ തെളിയിച്ചു. വേഗത്തില്‍ നീങ്ങുന്ന ഒരു നഗരത്തില്‍, സത്യസന്ധത മായാത്ത സിഗ്നലുകളാണെന്ന് ഈ സംഭവങ്ങള്‍ അടിവരയിടുന്നു.