പശ്ചിമേഷ്യ സംഘര്‍ഷം: ബെംഗളൂരുവില്‍ നിന്നുള്ള ഈ വിമാന സര്‍വീസുകള്‍ റദ്ദാക്കി, റൂട്ടുകളറിയാം

പശ്ചിമേഷ്യന്‍ സംഘര്‍ഷത്തെത്തുടര്‍ന്ന് ബെംഗളൂരു കെമ്പെഗൗഡ അന്താരാഷ്ട്ര വിമാനത്താവളത്തില്‍ നിന്നും തിരിച്ചുമുള്ള 34 അന്താരാഷ്ട്ര വിമാന സര്‍വീസുകള്‍ ബുധനാഴ്ച റദ്ദാക്കി.

ഇതില്‍ ബെംഗളൂരുവില്‍ എത്തിച്ചേരേണ്ട 18 എണ്ണവും ഇവിടെ നിന്നും പുറപ്പെടേണ്ട 16 എണ്ണവും ഉള്‍പ്പെടുന്നു. അബുദാബി, റിയാദ്,ജിദ്ദ, ദമ്മാം,ദുബായ്, ദോഹ തുടങ്ങിയ ഗള്‍ഫ് നഗരങ്ങളില്‍ നിന്നും ബെംഗളൂരുവിലേയ്‌ക്കെത്തേണ്ടതും അവിടേയ്ക്ക് തിരിച്ചുപോകുന്നതുമായ ഫ്‌ലൈറ്റുകളാണ് റദ്ദാക്കിയത്.

യാത്രക്കാരുടെ സംശയങ്ങള്‍ തീര്‍ക്കാനായി ടെര്‍മിനല്‍ 2, കെര്‍ബ്‌സൈഡില്‍ ഹെല്‍പ്പ്‌ഡെസ്‌ക്ക് സ്ഥാപിച്ചിട്ടുണ്ട്. ഭൂഗര്‍ഭ ഗതാഗതം ഏകോപിപ്പിക്കുക, സേവനങ്ങള്‍ സുഗമമാക്കുക, അന്വേഷണങ്ങള്‍ക്ക് മറുപടി നല്‍കുക എന്നീ സേവനങ്ങള്‍ ഹെല്‍പ്പ്‌ഡെസ്‌ക്ക് നിര്‍വഹിക്കും.

കെര്‍ബ്സൈഡില്‍ കസേരകള്‍, കുടിവെള്ളം, ലഘുഭക്ഷണങ്ങള്‍, മെഡിക്കല്‍ സഹായം, സാനിറ്ററി പാഡുകള്‍, ചാര്‍ജിംഗ് സ്റ്റേഷനുകള്‍, ഭക്ഷണ സൗകര്യം, വീല്‍ചെയര്‍ എന്നിവ സജ്ജീകരിച്ചിട്ടുണ്ടെന്നും വിമാനത്താവള അധികൃതര്‍ അറിയിച്ചു.

ബെംഗളൂരു നിവാസികള്‍ കുടുംബത്തോടൊപ്പം ചേര്‍ന്നു

നിരവധി ഇന്ത്യന്‍ പൗരന്മാര്‍ യുഎഇയില്‍ നിന്നും തിങ്കളാഴ്ച രാത്രി കെമ്പെഗൗഡ അന്താരാഷ്ട്ര വിമാനത്താവളത്തില്‍ തിരിച്ചെത്തി.നാട്ടില്‍ അവധിയാഘോഷിക്കാനും തിരിച്ച് ഇന്ത്യയിലെത്താനും ടിക്കറ്റ് ബുക്ക് ചെയ്തിരുന്നവരാണിവര്‍. എന്നാല്‍ ഇറാന്‍ മിസൈല്‍ ആക്രമം തുടങ്ങിയതോടെ യുഎഇ വ്യോമപാത അടയ്ക്കുകയും വിമാനങ്ങള്‍ റദ്ദാക്കുകയും ചെയ്തു.

തുടര്‍ന്ന് ഇവര്‍ യുഎഇയിലെ വിമാനത്താവളങ്ങളില്‍ കുടുങ്ങി. ഫെബ്രുവരി 28 ന് അബുദാബി അന്താരാഷ്ട്ര വിമാനത്താവളത്തില്‍ നടന്ന ചെക്ക്-ഇന്‍ പ്രക്രിയയിലാണ് പലര്‍ക്കും അപകടത്തിന്റെ ആദ്യ സൂചന ലഭിച്ചത്.

കാര്യങ്ങള്‍ മികച്ച രീതിയില്‍ കൈകാര്യം ചെയ്തതിന്‌ യാത്രക്കാര്‍ എത്തിഹാദ് എയര്‍വേയ്സിനും അബുദാബി സര്‍ക്കാരിനും ഇന്ത്യന്‍ സര്‍ക്കാരിനും നന്ദി പറഞ്ഞു.കുടുങ്ങിയ യാത്രക്കാരെ വിമാനക്കമ്പനികള്‍ ഹോട്ടലുകളിലേക്ക് മാറ്റിയിരുന്നു. സൗജന്യമായി ഭക്ഷണവും നല്‍കി.

ഇസ്രായേല്‍-ഇറാന്‍-അമേരിക്ക യുദ്ധം രൂക്ഷമായതിനെത്തുടര്‍ന്നാണ് വ്യോമയാന കമ്പനികള്‍ സര്‍വീസുകള്‍ റദ്ദാക്കിയത്. നിരവധി രാജ്യങ്ങള്‍ വ്യോമപാതകള്‍ അടച്ചിട്ടുണ്ട്.