ബെംഗളൂരു മലയാളികളുടെ ശ്രദ്ധയ്ക്ക്: പാചക വാതക ബുക്കിംഗില്‍ കുതിച്ചുചാട്ടം, ഇക്കാര്യങ്ങള്‍ അറിയണം

ബെംഗളൂരുവില്‍ പാചക വാതക സിലിണ്ടര്‍ (എല്‍പിജി) ബുക്കിംഗില്‍ കുതിച്ചുചാട്ടം.മുന്‍ദിവസങ്ങളെ അപേക്ഷിച്ച് പ്രതിദിന ബുക്കിംഗുകള്‍ രണ്ടിരട്ടിയിലധികം ഉയര്‍ന്നു.

പശ്ചിമേഷ്യന്‍ സംഘര്‍ഷം രൂക്ഷമായതിനെത്തുടര്‍ന്ന് ഖത്തര്‍ പോലുള്ള രാജ്യങ്ങള്‍ വിതരണം നിര്‍ത്തിയതോടെയാണ് ഇത്.

പാചകവാതക വിതരണം തടസ്സപ്പെടുമെന്നും ആവശ്യത്തിന് ലഭ്യമാകില്ലെന്നും ഉപഭോക്താക്കള്‍ ഭയക്കുന്നു.അതുകാരണം അവര്‍ പാനിക്ക് ബുക്കിംഗ് നടത്തുകയാണ്.

പാചകവാതക ക്ഷാമം നിലനില്‍ക്കുന്നുണ്ടോ?
പാചകവാതക ക്ഷാമം നിലവിലില്ലെന്ന് വിതരണക്കാര്‍ അറിയിച്ചു. ഊഹാപോഹങ്ങളുടെ അടിസ്ഥാനത്തിലുള്ള പാനിക്ക് ബുക്കിംഗ് ഒഴിവാക്കണമെന്നാണ് അവരുടെ അഭ്യര്‍ത്ഥന. ആവശ്യമായ എല്‍പിജി സിലിണ്ടറുകള്‍ തുടര്‍ച്ചയായി എത്തുന്നുണ്ട്. വിതരണക്കുറവ് നിലവിലില്ല.

അതേസമയം ബുക്കിംഗുകളുടെ കൂടുതലായതിനാല്‍ സമയബന്ധിത വിതരണം തടസ്സപ്പെടുകയാണ്. പരിമിതമായ ജീവനക്കാരും ഡെലിവറി വാഹനങ്ങളും ഉപയോഗിച്ചാണ് സംവിധാനം പ്രവര്‍ത്തിക്കുന്നത്. അതിനാല്‍ എല്ലാ ഉപഭോക്താക്കള്‍ക്കും ഒരേ സമയം സിലിണ്ടറെത്തിക്കാന്‍ സാധിക്കില്ല.

സര്‍ക്കാര്‍ നടപടി
14.2 കിലോ സിലിണ്ടര്‍ ബുക്കിംഗ് കാലാവധി 21 ദിവസത്തില്‍ നിന്ന് 25 ദിവസമായി ഉയര്‍ത്തിയിട്ടുണ്ട്. പാനിക്ക് ബുക്കിംഗും സിലിണ്ടറുകള്‍ ശേഖരിക്കുന്നതും അവസാനിപ്പിക്കുകയാണ് ലക്ഷ്യം.

പ്രമുഖ ഗ്യാസ് വിതരണ കമ്പനികളായ ഭാരത് ഗ്യാസ്, എച്ച്പിസിഎല്‍, ബിപിസിഎല്‍ എന്നിവ ഉപഭോക്താക്കള്‍ക്ക് പ്രത്യേക സന്ദേശം കൈമാറി. ഗ്യാസ് ക്ഷാമമില്ലെന്നും സാധാരണ രീതിയില്‍ വിതരണം തുടരുകയാണെന്നും അവര്‍ വ്യക്തമാക്കി.

സാമൂഹ്യമാധ്യമങ്ങളിലൂടെ പ്രചരിക്കുന്ന തെറ്റായ വിവരങ്ങള്‍ വിശ്വസിക്കരുതെന്നും കമ്പനികള്‍ അഭ്യര്‍ത്ഥിച്ചു.

ഉപഭോക്തൃ പരാതി
പുതിയ ചട്ടം നിലവില്‍ വന്നതോടെ ബുക്കിംഗ് നിരസിക്കപ്പെട്ടതായി ഉപഭോക്താക്കള്‍ പരാതിപ്പെടുന്നു. 21 ദിവസത്തിന് ശേഷം ബുക്കിംഗ് നടത്താന്‍ ശ്രമിച്ചപ്പോള്‍ അത് സാധിക്കുന്നില്ല. പാചകവാതകം ഉടന്‍ തീരുമെന്ന ഘട്ടമാണ് നിലവിലുള്ളത്.

ഈ സാഹചര്യത്തില്‍ മലയാളികള്‍ ഉള്‍പ്പെടെയുള്ള ഉത്തരവാദിത്തപരമായ സമീപനം കൈക്കൊള്ളണം. സിലിണ്ടറുകള്‍ ബുക്ക് ചെയ്ത് സംഭരിക്കുന്നത് വിതരണ സംവിധാനത്തെ കൂടുതല്‍ സമ്മര്‍ദ്ദത്തിലാക്കുകയും ലഭ്യതക്കുറവ് വരുത്തുകയും ചെയ്യും.

അതിനാല്‍ ആവശ്യത്തിന് മാത്രം ബുക്കിംഗ് നടത്തുകയും ക്ഷമയോടെ കാത്തിരിക്കുകയും വേണം.

സിലിണ്ടറുകളെത്തുന്നത് വൈകുന്നപക്ഷം, ഇതര പാചകമാര്‍ഗ്ഗങ്ങള്‍ സ്വീകരിക്കണമെന്നും അധികൃതര്‍ ഉപദേശിച്ചു.