ബെംഗളൂരു ജീവിതം ഇനി കൂടുതൽ എളുപ്പം, സൗകര്യങ്ങൾ കൂട്ടാൻ നമ്മ മെട്രോ, കാത്തിരിപ്പ് സമയം വീണ്ടും കുറയും

നഗരത്തിന്‍റെ ഗതാഗത പ്രശ്നങ്ങൾക്ക് ശ്വാശ്വത പരിഹാരം എന്ന നിലയിലാണ് ബെംഗളൂരു മെട്രോ ആരംഭിക്കുന്നത്. ബിഎംആർസിഎൽ (Bangalore Metro Rail Corporation Limited) നടപ്പാക്കുന്ന ഈ പദ്ധതി ഇന്ന് വിപ്ലവകരമായ മാറ്റങ്ങൾ കൊണ്ടുവന്നിട്ടുണ്ട്. നഗരത്തിലെ യാത്രാസൗകര്യങ്ങൾ മെച്ചപ്പെടുത്തുന്നതിനൊപ്പം, വാഹന തിരക്കും വായു മലിനീകരണവും കുറയ്ക്കുന്നതിൽ നിർണായക പങ്കാണ് ഇന്ന് ബെംഗളൂരു മെട്രോ അഥവാ നമ്മ മെട്രോ വഹിക്കുന്നത്.

നിലവിൽ പ്രവർത്തിക്കുന്ന പർപ്പിൾ ലൈനും ഗ്രീൻ ലൈനും യെല്ലോ ലൈനും പ്രതിദിനം ലക്ഷക്കണക്കിന് യാത്രക്കാരാണ് ഉപയോഗിക്കുന്നത്. വൈറ്റ്‌ഫീൽഡ് മുതൽ ചല്ലഘട്ട വരെയുള്ള പർപ്പിൾ ലൈൻ, നാഗസന്ദ്ര മുതൽ സിൽക്ക് ഇൻസ്റ്റിറ്റ്യൂട്ട് വരെയുള്ള ഗ്രീൻ ലൈൻ, രാഷ്ട്രീയ വിദ്യാലയ റോഡ്-ബൊമ്മസാന്ദ്ര വരെയുള്ള യെല്ലോ ലൈൻ എന്നിവ ഇന്ന് നഗരത്തിന്‍റെ ജീവ നാഡിയാണ്. ഐടി ഹബ്ബുകൾ, വിദ്യാഭ്യാസ സ്ഥാപനങ്ങൾ, വാണിജ്യ കേന്ദ്രങ്ങൾ എന്നിവയെ ബന്ധിപ്പിക്കുന്നതിനാൽ മെട്രോ നഗരത്തിന്റെ നട്ടെല്ലായി മാറിക്കഴിഞ്ഞു.

ആധുനിക സംവിധാനങ്ങൾ

യാത്രക്കാരുടെ സുരക്ഷയും സൗകര്യവും മുൻനിർത്തി ആധുനിക ട്രെയിനുകളും ഡിജിറ്റൽ ടിക്കറ്റിംഗ് സംവിധാനങ്ങളും സ്റ്റേഷനുകളിൽ ഒരുക്കിയിട്ടുണ്ട്. സ്മാർട്ട് കാർഡുകൾ, ക്യൂആർ ടിക്കറ്റ് സംവിധാനം, ഫീഡർ ബസ് സർവീസുകൾ എന്നിവ മെട്രോ യാത്രയെ കൂടുതൽ എളുപ്പമാക്കുന്നു.

കൂടുതൽ വികസനം

ഫേസ്-2, ഫേസ്-2എ, ഫേസ്-3 എന്നീ വികസന ഘട്ടങ്ങൾ വേഗത്തിലാക്കാനുള്ള ശ്രമങ്ങളാണ് ബിഎംആർസിഎൽ നടത്തുന്നത്. ഔട്ടർ റിംഗ് റോഡ്, വിമാനത്താവളം ഉൾപ്പെടെയുള്ള പ്രധാന മേഖലകളിലേക്ക് മെട്രോ എത്തിക്കുന്നതിലൂടെ റോഡ് ഗതാഗതത്തെ ആശ്രയിക്കുന്നതിൽ വലിയ കുറവുണ്ടാകുമെന്നാണ് പ്രതീക്ഷ. പ്രത്യേകിച്ച്, കെംപെഗൗഡ അന്താരാഷ്ട്ര വിമാനത്താവളത്തിലേക്കുള്ള മെട്രോ ലൈൻ പൂർത്തിയാകുന്നത് നഗരത്തിന്റെ ആഗോള ബന്ധം കൂടുതൽ ശക്തമാക്കും.

കാത്തിരിപ്പ് സമയം കുറയും

സാധാരണ ദിവസങ്ങളിൽ മെട്രോ സർവീസ് രാവിലെ നേരത്തെ ആരംഭിച്ച് രാത്രി വൈകിയും തുടരുന്ന രീതിയിലാണ് ക്രമീകരിച്ചിരിക്കുന്നത്. പീക്ക് അവറുകളിൽ, അഥവാ രാവിലെ ഓഫീസിലേക്ക് പോകുന്ന സമയത്തും വൈകുന്നേരം മടങ്ങുന്ന സമയത്തും, ട്രെയിനുകൾ കുറച്ചുസമയ ഇടവേളകളിൽ സർവീസ് നടത്തുന്നു. ഇതിലൂടെ തിരക്കും പ്ലാറ്റ്‌ഫോം കാത്തിരിപ്പും കുറയ്ക്കാനാണ് ലക്ഷ്യം.

യെല്ലോ ലൈനില്‍ ആറാം ട്രെയിന്‍ സര്‍വീസ് ആരംഭിച്ചതോടെ കാത്തിരിപ്പ് സമയം 13 മിനിട്ടായി കുറഞ്ഞു. 5 ട്രെയിനുകളുമായി 15 മിനിട്ടിന്റെ ഇടവേളയിലായിരുന്നു ഇതുവരെ യെല്ലോ ലൈനില്‍ സര്‍വീസുകള്‍ പ്രവര്‍ത്തിപ്പിച്ചിരുന്നത്. ഏഴാം ട്രെയിന്‍ സെറ്റ് ബെംഗളൂരുവില്‍ എത്തിയിട്ടുണ്ട്. ഡിസംബര്‍ 18 വ്യാഴാഴ്ച വൈകുന്നേരത്തോടെയാണ് 6 കോച്ചുകള്‍ ഹെബ്ബഗോഡി ഡിപ്പോയില്‍ എത്തിച്ചത്. പ്രസ്തുത ട്രെയിന്‍ ഇനി നിര്‍ബന്ധിത സുരക്ഷാ പരിശോധനകളും ട്രയല്‍ റണ്ണും പൂര്‍ത്തിയാക്കേണ്ടതുണ്ട്. ശേഷം, ജനുവരി ആദ്യ വാരത്തോടെ ഈ ട്രെയിന്‍ പുതുവര്‍ഷ സമ്മാനമായി സര്‍വീസ് ആരംഭിക്കുമെന്ന് ബാംഗ്ലൂര്‍ മെട്രോ റെയില്‍ കോര്‍പറേഷന്‍ ലിമിറ്റഡ് (BMRCL) അറിയിക്കുന്നു.

നമ്മ മെട്രോ കേവലം ചുറ്റി സഞ്ചരിക്കാനുള്ള ഒരു മാർഗം എന്നതിലുപരി; അത് വൃത്തിയുള്ളതും, ഹരിതാഭമായതും, മികച്ച രീതിയിൽ ബന്ധിപ്പിച്ചതുമായ ഒരു ബാംഗ്ലൂരിനെ രൂപപ്പെടുത്തുന്നു. നഗരത്തിലുടനീളം പുതിയ മെട്രോ പബ്ലിക് ട്രാൻസ്‌പോർട്ട് സർവീസ് സ്റ്റേഷനുകൾ തുറക്കുന്നതോടെ, ഒരു സമ്പൂർണ്ണ മെട്രോ ശൃംഖല വേഗത്തിൽ യാഥാർത്ഥ്യമാകുകയാണ്. വരാനിരിക്കുന്ന ബ്ലൂ ലൈനായാലും ഉടൻ പൂർത്തിയാകുന്ന ഓറഞ്ച് ലൈനായാലും, ബാംഗ്ലൂരിലെ പൊതുജന യാത്രാ രീതിയെ നമ്മ മെട്രോ പരിവർത്തനം ചെയ്യുകയാണ്.