യാത്രയുടെ മുഹൂർത്തം കുറിച്ചു, നമ്മ മെട്രോ പിങ്ക് ലൈൻ ഉടൻ തുറക്കും, മലയാളികൾക്കും നേട്ടങ്ങൾ നിരവധിയാണ്

ബെംഗളൂരുവിലെ ജനങ്ങളുടെ ജീവനാഡിയായ നമ്മ മെട്രോ ദിനംപ്രതി പുതിയ അപ്‌ഡേറ്റുകൾ നൽകിക്കൊണ്ടിരിക്കുകയാണ്. പാതയുടെ നവീകരണവും പുതിയ ട്രെയിനുകളും എല്ലാം ചേർന്ന് അതിവേഗത്തിലാണ് ബെംഗളൂരു മെട്രോ വികസിക്കുന്നത്. കഴിഞ്ഞ വർഷം, യെല്ലോ ലൈൻ പൊതുജനങ്ങൾക്കായി തുറന്നുകൊടുത്തിരുന്നു. ഇപ്പോൾ 7 ട്രെയിനുകളാണ് യെല്ലോ ലൈനിലൂടെ ഓടിക്കൊണ്ടിരിക്കുന്നത്. എട്ടാമത്തെ ട്രെയിനിന്‍റെ പരീക്ഷണ ഓട്ടം പുരോഗമിക്കുകയാണ്. എട്ടാമത്തെ ട്രെയിൻ പ്രവർത്ത സജ്ജമായാൽ കാത്തിരിപ്പ് സമയം 8 മിനുട്ടായി കുറയും.

പിങ്ക് ലൈൻ അസാനഘട്ടത്തിൽ

ബെംഗളൂരു മെട്രോയുടെ ഏറെ പ്രതീക്ഷയോടെ കാത്തിരുന്ന പിങ്ക് ലൈനിന്‍റെ മിക്ക ജോലികളും അവസാന ഘട്ടത്തിലാണ്. നിലവിലെ വിവരങ്ങൾ അനുസരിച്ച് അടുത്ത മൂന്ന് മുതൽ നാല് മാസത്തിനുള്ളിൽ മെട്രോ പിങ്ക് ലൈൻ പൊതുജനങ്ങൾക്കായി തുറന്നുകൊടുക്കാൻ സാധ്യതയുണ്ട്. ഇത് ദക്ഷിണ ബെംഗളൂരുവിലേക്ക് എത്തിച്ചേരുന്നത് കൂടുതൽ എളുപ്പമാക്കും. പിങ്ക് ലൈൻ രണ്ട് ഘട്ടങ്ങളിലായി തുറക്കാനാണ് ബിഎംആർസിഎൽ ഉദ്യോഗസ്ഥർ പദ്ധതിയിടുന്നത്.

കലേന അഗ്രഹാര (ഗോട്ടിഗെരെ) മുതൽ തവരേക്കരെ (സ്വാഗത്ത് ക്രോസ്) വരെയുള്ള 7.5 കിലോമീറ്റർ എലിവേറ്റഡ് സെക്ഷൻ ആദ്യ ഘട്ടത്തിലും ഡയറി സർക്കിളിനെ നാഗവാരയുമായി ബന്ധിപ്പിക്കുന്ന 13.8 കിലോമീറ്റർ ഭൂഗർഭ സെക്ഷനായ രണ്ടാം ഘട്ടത്തിലും പ്രവർത്തനം ആരംഭിക്കും. 2026 മെയ് മാസത്തിൽ ആദ്യഘട്ട പാത പൊതുജനങ്ങൾക്കായി തുറന്നുകൊടുക്കുമെന്ന് ഉപമുഖ്യമന്ത്രി ഡി കെ ശിവകുമാർ ട്വീറ്റിൽ സ്ഥിരീകരിച്ചു.

പിങ്ക് ലൈൻ സ്റ്റേഷനുകളും റൂട്ട് വിശദാംശങ്ങളും

പിങ്ക് ലൈനിന് 21.56 കിലോമീറ്റർ നീളമുണ്ട്, അതിൽ 13 കിലോമീറ്റർ തുരങ്കവും 7.5 കിലോമീറ്റർ എലവേറ്റഡ് ട്രാക്കും ഉൾപ്പെടുന്നു. ഇതിന് ആകെ 17 സ്റ്റേഷനുകളുണ്ട്. കലേന അഗ്രഹാര, ഹുളിമാവ്, ഐഐഎംബി, ജെപി നഗർ നാലാം ഘട്ടം, തവരെകെരെ, ഡയറി സർക്കിൾ, ലക്കസാന്ദ്ര, ലാങ്ഫോർഡ്, നാഷണൽ മിലിട്ടറി സ്കൂൾ, എം.ജി. റോഡ്, ശിവാജിനഗർ, കൻ്റോൺമെൻ്റ്, പോട്ടറി ടൗൺ, ടാനറി റോഡ്, വെങ്കിടേഷ്പൂർ, കടുഗൊണ്ടനഹള്ളി, നാഗവാര.

യാത്ര എളുപ്പമാക്കും

ദക്ഷിണ ബെംഗളൂരു പ്രദേശത്തുള്ള ആളുകൾക്ക് വേഗത്തിലും എളുപ്പത്തിലും ഗതാഗത സൗകര്യം. റോഡ് ഗതാഗത പ്രശ്നങ്ങൾ കുറവാണ്. പ്രധാന മേഖലകളുമായി നേരിട്ടുള്ള ബന്ധം: പാർക്കുകൾ, സ്കൂളുകൾ, മാർക്കറ്റുകൾ, തൊഴിൽ കേന്ദ്രങ്ങൾ. മെട്രോ സംവിധാനം സുരക്ഷിതമാണ്, എല്ലാ ആധുനിക സാങ്കേതികവിദ്യ ഉപയോഗിച്ചാണ് പ്രവർത്തിക്കുന്നത്.

4.5 മിനുട്ടിൽ ട്രെയിൻ എത്തും

21 കിലോമീറ്റർ ദൈർഘ്യമുള്ള പിങ്ക് ലൈനിൽ 23 ട്രെയിനുകൾ ഉണ്ടായിരിക്കും, തിരക്കേറിയ സമയങ്ങളിൽ ഓരോ 4.5 മിനിറ്റിലും തിരക്കില്ലാത്ത സമയങ്ങളിൽ ഓരോ 8 മിനിറ്റിലും ട്രെയിനുകൾ ഓടും. രാവിലെ 5 മുതൽ അർദ്ധരാത്രി വരെയാണ് പ്രവർത്തനങ്ങൾ. യെല്ലോ ലൈൻ (ആർവി റോഡ്-ബൊമ്മസാന്ദ്ര) പോലെ, പിങ്ക് ലൈനും ആധുനിക ആശയവിനിമയ അധിഷ്ഠിത ട്രെയിൻ നിയന്ത്രണ (സിബിടിസി) സംവിധാനം ഉപയോഗിക്കും.

പിങ്ക് ലൈനിൽ പൂർണ്ണമായും ഓട്ടോമേറ്റഡ് ഡ്രൈവറില്ലാ (GoA-4) പ്രവർത്തനങ്ങൾ പിന്നീട് ആരംഭിക്കുമെന്നും, യെല്ലോ ലൈനിന് സമാനമായി സെമി-ഓട്ടോമേറ്റഡ് (GoA-2) മോഡിലാണ് കോറിഡോർ തുടക്കത്തിൽ തുറക്കുകയെന്നും ബിഎംആർസിഎൽ അറിയിച്ചു. പിങ്ക് ലൈൻ ആരംഭിക്കുന്നതോടെ ബെംഗളൂരു മെട്രോ സംവിധാനത്തിന് കൂടുതൽ വിപുലമായും കാര്യക്ഷമമായും പ്രവർത്തിക്കാൻ കഴിയും.