ന്യൂ ഇയർ @ ബെംഗളൂരു, സർവ്വീസുകൾ നീട്ടി നമ്മ മെട്രോ, എം.ജി. റോഡ് മെട്രോ അടച്ചിടും

ബെംഗളൂരുവിലാണ് നിങ്ങൾ ഇത്തവണ ന്യൂ ഇയർ ആഘോഷിക്കുന്നതെങ്കിൽ ചില കാര്യങ്ങൾ പ്രത്യേകം ശ്രദ്ധിക്കണം. കാരണം ന്യൂ ഇയർ ആഘോഷത്തിന്‍റെ ഭാഗമായി നഗരത്തിലെ സുരക്ഷ പോലീസ് വർദ്ധിപ്പിച്ചിട്ടുണ്ട്. അതോടൊപ്പം ചില നിയന്ത്രണങ്ങളും ഏർപ്പെടുത്തിയിട്ടുണ്ട്. പുതുവത്സരാഘോഷത്തോടനുബന്ധിച്ച് ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് (ബിഎംആർസിഎൽ) നഗരത്തിലെ മൂന്ന് പ്രവർത്തന ലൈനുകളിലേക്കും അധിക സർവ്വീസുകളും പ്രഖ്യാപിച്ചു.

കൂടുതൽ മെട്രോ സർവ്വീസ്

പർപ്പിൾ ലൈനിലെ വൈറ്റ്ഫീൽഡിൽ നിന്ന് ചല്ലഘട്ടയിലേക്കുള്ള അവസാന ട്രെയിൻ ജനുവരി 1 ന് പുലർച്ചെ 1.45 ന് പുറപ്പെടും. ചല്ലഘട്ടയിൽ നിന്ന് വൈറ്റ്ഫീൽഡിലേക്കുള്ള അവസാന ട്രെയിൻ പുലർച്ചെ 2 മണിക്ക് പുറപ്പെടും. മഡവറയെയും സിൽക്ക് ഇൻസ്റ്റിറ്റ്യൂട്ടിനെയും ബന്ധിപ്പിക്കുന്ന ഗ്രീൻ ലൈനിലെ അവസാന ട്രെയിനുകൾ രണ്ട് സ്റ്റേഷനുകളിൽ നിന്നും പുലർച്ചെ 2 മണിക്ക് പുറപ്പെടും. പുതുവത്സരാഘോഷത്തിൽ പർപ്പിൾ, ഗ്രീൻ ലൈനുകളിലെ ട്രെയിനുകളുടെ ഇടവേള എട്ട് മിനിറ്റായിരിക്കും.

യെല്ലോ ലൈനിൽ, ആർവി റോഡിൽ നിന്ന് ബൊമ്മസാന്ദ്രയിലേക്കുള്ള അവസാന ട്രെയിൻ പുലർച്ചെ 3.10 ന് പുറപ്പെടും. എതിർദിശയിലുള്ള അവസാന ട്രെയിൻ പുലർച്ചെ 1.10 ന് പുറപ്പെടും. ഈ ലൈനിൽ ട്രെയിനുകൾ 15 മിനിറ്റ് ഇടവേളയിൽ ഓടും. "2025 ഡിസംബർ 31 ന് രാത്രി 11.30 മുതൽ വിപുലീകരിച്ച പ്രവർത്തനങ്ങൾ അവസാനിക്കുന്നതുവരെ സർവീസ് ഫ്രീക്വൻസി നിലനിർത്തും," ബിഎംആർസിഎൽ പറഞ്ഞു.

എം.ജി. റോഡ് മെട്രോ അടച്ചിടും

എം.ജി. റോഡ്, ബ്രിഗേഡ് റോഡ്, ചർച്ച് സ്ട്രീറ്റ് എന്നിവിടങ്ങളിൽ ധാരാളം ആളുകൾ എത്തുന്നതിനാൽ ഡിസംബർ 31 ന് രാത്രി 10 മണി മുതൽ എം.ജി. റോഡ് മെട്രോ സ്റ്റേഷൻ അടച്ചിരിക്കും. യാത്രക്കാർ ട്രിനിറ്റി, കബ്ബൺ പാർക്ക് സ്റ്റേഷനുകൾ വഴി കയറാനും ഇറങ്ങാനും ശ്രമിക്കണം. ട്രിനിറ്റി, കബ്ബൺ പാർക്ക് സ്റ്റേഷനുകളിൽ രാത്രി 11 മണിക്ക് ശേഷം ടിക്കറ്റ് വിൽപ്പന നിർത്തുമെന്നും യാത്രക്കാർ മുൻകൂട്ടി റിട്ടേൺ ടിക്കറ്റുകൾ വാങ്ങണമെന്നും പ്രസ്താവനയിൽ പറയുന്നു.

കനത്ത സുരക്ഷ

പുതുവത്സരാഘോഷങ്ങളിൽ പങ്കെടുക്കുന്ന സ്ത്രീകളുടെയും കുട്ടികളുടെയും സുരക്ഷയ്ക്ക് പ്രത്യേക ശ്രദ്ധ നൽകിയിട്ടുണ്ടെന്ന് പോലീസ് പറഞ്ഞു. അടിയന്തര സാഹചര്യങ്ങൾ നേരിടാൻ പ്രധാന ആഘോഷ മേഖലകളിൽ ആംബുലൻസുകളും മെഡിക്കൽ സ്റ്റാഫും ഉൾപ്പെടുന്ന സുരക്ഷാ ടെന്റുകൾ വിന്യസിക്കും. അർദ്ധരാത്രി 12 മണിക്കുശേഷം ആഘോഷ സ്ഥലങ്ങളിൽ ആരെയും തങ്ങാൻ അനുവദിക്കരുതെന്നും അധികൃതർ നിർദ്ദേശം നൽകിയിട്ടുണ്ട്. നിരീക്ഷണം വർദ്ധിപ്പിക്കുന്നതിനായി, തിരക്കേറിയ സ്ഥലങ്ങളിൽ കൂടുതൽ സിസിടിവി ക്യാമറകൾ സ്ഥാപിക്കും. എല്ലാ ആഘോഷ സ്ഥലങ്ങളിലും കർശനമായ ജനക്കൂട്ട നിയന്ത്രണം ഏർപ്പെടുത്തുമെന്ന് പോലീസ് മുന്നറിയിപ്പ് നൽകിയിട്ടുണ്ട്.

പബ്, ബാർ, ഹോട്ടൽ, റിസോർട്ട് ഉടമകൾക്കും വ്യക്തമായ നിർദ്ദേശങ്ങൾ നൽകിയിട്ടുണ്ട്. പ്രവേശന ടിക്കറ്റുകളും പാസുകളും സ്ഥലത്തിന്റെ ശേഷി അനുസരിച്ച് കർശനമായി നൽകണം. പ്രായപൂർത്തിയാകാത്തവർക്ക് മദ്യം നൽകുന്നത് നിരോധിച്ചിരിക്കുന്നു. പ്രവേശന കവാടങ്ങളിൽ സമഗ്രമായ പരിശോധനകൾ നടത്തണം. സംശയാസ്പദമായ വ്യക്തികളെയോ വസ്തുക്കളെയോ കണ്ടാൽ ഉടൻ തന്നെ പോലീസിൽ റിപ്പോർട്ട് ചെയ്യണം.