ബെം​ഗളൂരുവിലെ തിരക്ക് കുറയും; നമ്മ മെട്രോ യെല്ലോ ലൈനിൽ പുതിയ ട്രെയിനുകൾ എത്തുന്നു, ഇനി ലേറ്റാവില്ല!

ബെം​ഗളൂരു മലയാളികളെ നിങ്ങളറിഞ്ഞോ? നിങ്ങളുടെ യാത്രാക്ലേശം പരിഹരിക്കുന്നതിനായി നമ്മ മെട്രോയുടെ യെല്ലോ ലൈനിലെ എട്ടാമത്തെ ട്രെയിൻ സെറ്റ് ഉടൻ ട്രാക്കിലെത്തും. ഇത് എത്തിയാൽ മെട്രോ യാത്രക്കാർക്ക് അവരുടെ കാത്തിരിപ്പ് സമയം കുറയും. അതായത് 10 മിനിറ്റോ അതിൽ കുറവോ സമയത്തിനുള്ളിൽ തന്നെ അടുത്ത ട്രെയിൻ ട്രാക്കിലെത്തുമെന്ന് അർത്ഥം. ഇത് തിരക്ക് നിയന്ത്രിക്കാൻ എളുപ്പത്തിൽ സാധിക്കുകയും ​ഗതാ​ഗതക്കുരുക്ക് കുറക്കാൻ കാരണമാവുകയും ചെയ്യും.

കൊൽക്കത്ത ആസ്ഥാനമായുള്ള ടിറ്റാഗഡ് റെയിൽ സിസ്റ്റംസ് ലിമിറ്റഡ് (TRSL) വ്യാഴാഴ്ച രാത്രിയാണ് ആറ് കോച്ചുകളുള്ള പുതിയ ട്രെയിൻ സെറ്റ് ബെംഗളൂരുവിലേക്ക് അയച്ചത്. ജനുവരി 15-ന് മകരസംക്രാന്തി ആഘോഷങ്ങൾക്ക് തൊട്ടുപിന്നാലെ ട്രെയിൻ ഹെബ്ബഗോഡി ഡിപ്പോയിൽ എത്തിച്ചേരുമെന്നാണ് പ്രതീക്ഷിക്കുന്നത്.

നിലവിൽ പരീക്ഷണ ഓട്ടം പൂർത്തിയാക്കി വരുന്ന ഏഴാമത്തെ മെട്രേ ട്രെയിൻ അടുത്ത ആഴ്ചയോടെ സർവീസിനായി ട്രാക്കിലെത്തുമെന്നാണ് ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡ് (BMRCL) അറിയിച്ചിരിക്കുന്നത്. ഏഴാമത്തെ ട്രെയിനിന്റെ പ്രധാന പരീക്ഷണ ഓട്ടം നിലവിൽ നടന്നുവരികയാണ്, രാത്രികാല സർവീസുകൾ കാരണം ഇത് മന്ദഗതിയിലായി. യാത്രക്കാർക്കായി ട്രെയിൻ ഉടൻ ട്രാക്കിലെത്തുമെന്നാണ് ഔദ്യോ​ഗിക അറിയിപ്പ്.

വരാനിരിക്കുന്ന എട്ടാമത്തെ ട്രെയിൻ ഫെബ്രുവരി പകുതിയോടെ സർവ്വീസ് ആരംഭിക്കുമെന്നാണ് പറയുന്നത്. ഇതോടെ തിരക്കേറിയ സമയങ്ങളിലെ ട്രെയിൻ കാത്തിരിപ്പ് സമയം ​ഗണ്യമായി കുറയും. ഇത് യാത്രക്കാർക്ക് കൂടുതൽ ആശ്വാസകരമാവുകയും ചെയ്യും.

ഇലക്ട്രോണിക്സ് സിറ്റിയിലെ ടെക് ഹബ്ബുകളെ നഗരവുമായി ബന്ധിപ്പിക്കുന്ന 19.15 കിലോമീറ്റർ ദൈർഘ്യമുള്ള ആർ.വി റോഡ് - ബൊമ്മസാന്ദ്ര പാതയിൽ നിലവിൽ ആറ് ട്രെയിനുകളാണ് സർവീസ് നടത്തുന്നത്. പ്രതിദിനം ശരാശരി ഒരു ലക്ഷത്തോളം യാത്രക്കാർ മെട്രോയെ ആശ്രയിക്കുന്നുണ്ടെങ്കിലും ഈ പാതയിൽ ട്രെയിനുകളുടെ എണ്ണം കുറവാണ്. ഈ കാരണത്താൽ വൻ തിരക്കാണ് അനുഭവപ്പെടുന്നത്.

നമ്മ മെട്രോയുടെ മഞ്ഞ ലൈൻ

ആർ.വി. റോഡ് മുതൽ ബൊമ്മസാന്ദ്ര വരെയുള്ള ഏകദേശം 19 കിലോമീറ്റർ ദൂരമാണ് മഞ്ഞ ലൈൻ പാതക്കുള്ളത്. 2025 ഓഗസ്റ്റിൽ പ്രവർത്തനക്ഷമമായ ഈ ലൈൻ, ബെംഗളൂരുവിന്റെ ഐടി ഹബ്ബായ ഇലക്ട്രോണിക്സ് സിറ്റിയെ നഗരത്തിന്റെ മറ്റ് പ്രധാന ഭാഗങ്ങളുമായി നേരിട്ട് ബന്ധിപ്പിക്കുന്നു. ഹോസൂർ റോഡിലെ ഗതാഗതക്കുരുക്കിൽപ്പെടാതെ യാത്ര ചെയ്യാമെന്നത് ആയിരക്കണക്കിന് ടെക്കികൾക്കും സ്ഥിരം യാത്രക്കാർക്കും വലിയ ആശ്വാസമാണ് നൽകുന്നത്.

നിലവിൽ ആറ് ട്രെയിനുകളുമായി സർവീസ് നടത്തുന്ന ഈ പാതയിൽ യാത്രക്കാരുടെ എണ്ണം വർദ്ധിച്ചുവരുന്ന സാഹചര്യമാണുള്ളത്. ഇത് പരിഗണിച്ച് കൂടുതൽ ട്രെയിൻ സെറ്റുകൾ ഉൾപ്പെടുത്തുന്നതിന്റെ ഭാ​ഗമായിട്ടാണ് ഇപ്പോൾ എട്ടാമത്തെ സെറ്റ് എത്തുന്നത്. കൂടുതൽ ട്രെയിനുകൾ എത്തുന്നതോടെ ഇപ്പോൾ അനുഭവപ്പെടുന്ന തിരക്ക് കുറയുകയും ചെയ്യും. യാത്രക്കാർക്ക് പ്ലാറ്റ്‌ഫോമുകളിൽ ദീർഘനേരം കാത്തിരിക്കേണ്ടി വരുന്ന സാഹചര്യം ഇല്ലാതാകുന്നതോടെ മെട്രോ യാത്ര കൂടുതൽ സുഗമവും സുഖകരവുമായി മാറും.