ബെംഗളൂരുവിന് അതിവേഗം, ബുള്ളറ്റ് ട്രെയിൻ എത്തുന്നത് ഈ റൂട്ടിൽ, യാത്രാ സമയം വെറും 2.25 മണിക്കൂർ മാത്രം

ദക്ഷിണേന്ത്യയിലെ മൂന്ന് പ്രമുഖ നഗരങ്ങളാണ് ചെന്നൈ, ബാംഗ്ലൂർ, മൈസൂർ എന്നിവ. നിരവധി മലയാളികളും ഈ നഗരങ്ങളിൽ ജോലി ചെയ്യുന്നുണ്ട്. ഇപ്പോഴിതാ ഈ മൂന്ന് നഗരങ്ങളേയും ബന്ധിപ്പിച്ച് അതിവേഗ റെയിൽപാതയെക്കുറിച്ച് ആലോചിക്കുകയാണ് കേന്ദ്ര സർക്കാർ. ബുള്ളറ്റ് ട്രെയിൻ യാഥാർത്ഥ്യമായാൽ 463 കിലോമീറ്റർ ദൈർഘ്യമുള്ള യാത്ര ഏകദേശം 1 മണിക്കൂർ 10 മിനിറ്റായി കുറയ്ക്കും. നിലവിൽ, മൈസൂരിനും ചെന്നൈയ്ക്കും ഇടയിലുള്ള ഏറ്റവും വേഗതയേറിയ ട്രെയിനാണ് വന്ദേ ഭാരത് എക്സ്പ്രസ്. ഇത് ബാംഗ്ലൂർ വഴി 6 മണിക്കൂറും 30 മിനിറ്റും എടുത്താണ് ലക്ഷ്യ സ്ഥാനത്ത് എത്തുന്നത്.

മൈസൂർ, ചെന്നൈ ബുള്ളറ്റ് ട്രെയിൻ: അവലോകനം

ഇന്ത്യയുടെ അതിവേഗ റെയിൽ ശൃംഖല മെച്ചപ്പെടുത്താനുള്ള പദ്ധതികളുടെ ഭാഗമാണ് മൈസൂർ ചെന്നൈ ബുള്ളറ്റ് ട്രെയിൻ. ദക്ഷിണേന്ത്യയിലെ ഈ രണ്ട് പ്രധാന നഗരങ്ങൾക്കിടയിലുള്ള യാത്രാ സമയം ഗണ്യമായി കുറയ്ക്കുന്നതിനും അതുവഴി വേഗത്തിലുള്ള കണക്റ്റിവിറ്റി, സാമ്പത്തിക വളർച്ച, പ്രാദേശിക വികസനം എന്നിവ വർദ്ധിപ്പിക്കുന്നതിനും പദ്ധതി ലക്ഷ്യമിടുന്നു. മൈസൂർ, ബാംഗ്ലൂർ, ചെന്നൈ എന്നിവയെ ബന്ധിപ്പിക്കുന്ന ഇടനാഴി വളരെ ജനസാന്ദ്രതയുള്ളതാണ്. നിരവധി കമ്പനികൾ, ടെക്‌നോപാർക്കുകൾ, നിർമ്മാണ കേന്ദ്രങ്ങൾ, ടൗൺഷിപ്പുകൾ എന്നിവ ഈ ഇടനാഴിയിലാണ് സ്ഥിതി ചെയ്യുന്നത്. പ്രവർത്തനക്ഷമമായാൽ, ബുള്ളറ്റ് ട്രെയിൻ ഇടനാഴി കണക്റ്റിവിറ്റി മെച്ചപ്പെടുത്തുന്നതിനൊപ്പം റിയൽ എസ്റ്റേറ്റ് വികസനത്തെയും സ്വാധീനിക്കും.

റൂട്ട് വിവരങ്ങൾ

റെയില്‍ പാത നിര്‍മിക്കുന്നതിനായി ഭൂവുടമകളുമായി ചര്‍ച്ചകള്‍ പുരോഗമിക്കുകയാണ്. വ്യോമ സര്‍വേ ഉടന്‍ ആരംഭിക്കുമെന്നാണ് വിവരം. ബെംഗളൂരുവിന് അടുത്തുള്ള ഹോസ്‌കോട്ടിനും ചെന്നൈയ്ക്കടുത്തുള്ള ശ്രീപെരുംപുത്തൂരിനും ഇടയിലായിരിക്കും പ്രധാന പാത. ചെന്നൈയുടെ രണ്ടാമത്തെ വിമാനത്താവളവുമായും ബുള്ളറ്റ് ട്രെയിന്‍ ബന്ധിപ്പിക്കും. ബുള്ളറ്റ് ട്രെയിനിന്റെ പരമാവധി വേഗത മണിക്കൂറിൽ 350 കിലോമീറ്ററും ശരാശരി വേഗത മണിക്കൂറിൽ 250 കിലോമീറ്ററുമായിരിക്കും.

ഓരോ ട്രെയിനിലും 750 പേർക്ക് സഞ്ചരിക്കാൻ കഴിയും . നിലവിലെ 6 മണിക്കൂർ 30 മിനിറ്റിൽ നിന്ന് 2 മണിക്കൂർ 25 മിനിറ്റായി യാത്രാ സമയം കുറയ്ക്കാനും ഇത് സഹായിക്കും. മൈസൂർ, ബാംഗ്ലൂർ, ചെന്നൈ തുടങ്ങിയ പ്രധാന നഗരങ്ങളിലേക്ക് വേഗത്തിൽ എത്തിച്ചേരാൻ ബുള്ളറ്റ് ട്രെയിൻ സഹായിക്കും.

നേട്ടങ്ങൾ നിരവധി

ചെന്നൈ, ബാംഗ്ലൂർ, മൈസൂർ എന്നിവിടങ്ങളെ ബന്ധിപ്പിക്കുന്ന നിർദ്ദിഷ്ട ഹൈ-സ്പീഡ് റെയിൽ (HSR) പദ്ധതി ദക്ഷിണേന്ത്യയുടെ യാത്രാ മേഖലയിൽ മാറ്റം വരുത്തുമെന്ന് പ്രതീക്ഷിക്കുന്നു. ബിസിനസ്സ് പ്രൊഫഷണലുകൾക്കും യാത്രക്കാർക്കും കണക്റ്റിവിറ്റി വർദ്ധിപ്പിക്കുന്നതിനൊപ്പം, പദ്ധതിക്ക് കാര്യമായ സാമ്പത്തികവും സാമൂഹികവുമായ നേട്ടങ്ങൾ ഉണ്ടാകുമെന്ന് പ്രതീക്ഷിക്കുന്നു.

ഉദാഹരണത്തിന് , മെച്ചപ്പെട്ട യാത്രാ കാര്യക്ഷമത ബാംഗ്ലൂർ പോലുള്ള സാങ്കേതിക കേന്ദ്രങ്ങളും ചെന്നൈയിലെ ബിസിനസ്സ് കേന്ദ്രങ്ങളും തമ്മിലുള്ള സഹകരണത്തെ പ്രോത്സാഹിപ്പിക്കും.

കൂടാതെ, മൈസൂരിലെ സാംസ്കാരിക ആകർഷണങ്ങളിലേക്ക് കൂടുതൽ വിനോദസഞ്ചാരികളെ ആകർഷിക്കുന്നതിലൂടെയും ചുറ്റുമുള്ള ജില്ലകളെ ഉത്തേജിപ്പിക്കുന്നതിലൂടെയും പ്രാദേശിക സമ്പദ്‌വ്യവസ്ഥയ്ക്ക് ഗുണം ചെയ്യുമെന്ന് പ്രതീക്ഷിക്കുന്നു. കൂടുതൽ സാമ്പത്തിക പ്രവർത്തനങ്ങളിലൂടെയും നിക്ഷേപത്തിലൂടെയും വ്യാവസായിക വികാസം, തൊഴിലവസരങ്ങൾ സൃഷ്ടിക്കൽ, പ്രാദേശിക വികസനം എന്നിവയ്ക്ക് ഈ പദ്ധതി പ്രചോദനം നൽകും. പദ്ധതി യാഥാർത്ഥ്യമായാൽ ഈ നഗരങ്ങളിൽ ജോലി ചെയ്യുന്ന മലയാളികൾക്കും നേട്ടമാണ്.