ബെംഗളൂരു നമ്മ മെട്രോ: ഗ്രീന്‍ ലൈനില്‍ പുതിയ ട്രെയിന്‍ ഉടന്‍, മറ്റൊരു റൂട്ടില്‍ താല്‍ക്കാലിക വേഗത നിയന്ത്രണം

വടക്ക് നാഗസാന്ദ്രയില്‍ നിന്ന് തെക്ക് സില്‍ക്ക് ഇന്‍സ്റ്റിറ്റ്യൂട്ട് വരെയുള്ള ഗ്രീന്‍ ലൈനിലേയ്ക്ക് പുതിയ ട്രെയ്ന്‍ എത്തുന്നു. ഇതിനായുള്ള ആറു കോച്ചുകള്‍ പീനിയ ഡിപ്പോയില്‍ എത്തി.  മറ്റൊരു ട്രെയിന്‍കൂടി ഉടനെ എത്തുമെന്നും ഇവ മെയ്-ജൂണോടെ സര്‍വീസ് തുടങ്ങുമെന്നും അധികൃതര്‍ അറിയിച്ചു.

ബെംഗളൂരു ആസ്ഥാനമായ ടിറ്റാഗര്‍ റെയില്‍ ലിമിറ്റഡ് (ടിആര്‍എസ്എല്‍) ആദ്യമായി ഇന്ത്യയില്‍ അസംബിള്‍ ചെയ്തതെന്ന പ്രത്യേകതയും കോച്ചുകള്‍ക്കുണ്ട്.

മലയാളി യാത്രികര്‍
പീനിയ, മജസ്റ്റിക് (കെമ്പെഗൗഡ ഇന്റര്‍ചേഞ്ച്), ജയനഗര്‍, ബനശങ്കരി തുടങ്ങിയ പ്രദേശങ്ങളിലൂടെ കടന്നുപോകുന്ന ഗ്രീന്‍ ലൈന്‍ മലയാളികളെ സംബന്ധിച്ച് ഏറെ ഉപകാരപ്രദമാണ്. നിരവധി മലയാളി കുടുംബങ്ങളും പ്രൊഫഷണലുകളുമാണ് ഇവിടെ താമസിക്കുന്നത്.

കണക്ടിവിറ്റി
മജസ്റ്റിക്കില്‍ ഗ്രീന്‍ലൈന്‍ പര്‍പ്പിള്‍ ലൈനുമായി ബന്ധിക്കുന്നു. അതുകൊണ്ടുതന്നെ ജയനഗര്‍,ബനശങ്കരി,കൊണനകുണ്ട എന്നിവിടങ്ങളില്‍ താമസിക്കുന്ന മലയാളികള്‍ക്ക് ഇന്ദിരാനഗര്‍,ബൈയപ്പനഹള്ളി, വൈറ്റ്ഫീല്‍ഡ് എന്നിവിടങ്ങളിലെത്താന്‍ ഈ ഇന്റര്‍ചെയ്ഞ്ച് ഉപയോഗിക്കാം.

പ്രൊഫഷലുകളുടേയും വിദ്യാര്‍ത്ഥികളുടേയും ദൈനംദിന യാത്രാ സൗകര്യപ്രദമാക്കാന്‍ ഗ്രീന്‍ലൈന്‍ സഹായിക്കുന്നു.

നിലവിലെ ട്രെയ്‌നുകള്‍

നിലവില്‍ പര്‍പ്പിള്‍,ഗ്രീന്‍ ലൈനുകളിലായി 57 ട്രെയിനുകളാണ് സര്‍വീസ് നടത്തുന്നത്. യെല്ലോ ലൈനിനായി ഏഴ് ട്രെയ്‌നുകള്‍ നിര്‍മ്മിക്കാനുള്ള കരാറും പര്‍പ്പിള്‍, ഗ്രീന്‍ ലൈനുകള്‍ക്കായി 18 ഓളം ട്രെയ്‌നുകള്‍ നിര്‍മ്മിക്കാനുള്ള കരാറും ടിആര്‍എസ്എല്ലിന് നല്‍കിയിട്ടുണ്ട്.

വേഗത നിയന്ത്രണം
ആര്‍വി റോഡിനും ജയനഗറിനും മധ്യേ അറ്റകുറ്റപ്പണികള്‍ നടക്കുന്നതിനാല്‍ വേഗത നിയന്ത്രണം ഏര്‍പ്പെടുത്തിയിട്ടുണ്ടെന്നും ബിഎംആര്‍സിഎല്‍ അറിയിച്ചു.
ഗ്രീന്‍ ലൈനിലെ ട്രെയിന്‍ സര്‍വീസുകള്‍ ഷെഡ്യൂള്‍ പ്രകാരം നടക്കും.

നെരത്തെ ഫെബ്രുവരി 27 തൊട്ട് യെല്ലോ ലൈനില്‍ പുതിയ ട്രെയ്ന്‍ സര്‍വീസ് ആരംഭിച്ചിരുന്നു. ഇതോടെ ഈ റൂട്ടില്‍ കാത്തിരിപ്പ് ദൈര്‍ഘ്യം കുറഞ്ഞു. നിലവില്‍ തിരക്കേറിയ സമയങ്ങളില്‍ 9 മിനിറ്റ് ഇടവേളയിലും തിരക്കില്ലാത്ത സമയങ്ങളില്‍ 14 മിനിറ്റ് ഇടിവേളയിലുമാണ് ട്രെയിന്‍ എത്തുക.

പുതിയ ട്രെയിന്‍ സവിശേഷതകള്‍
ഇപ്പോള്‍ പീനിയ ഡിപ്പോയിലെത്തിയ കോച്ചുകള്‍ പ്രാരംഭ പരിശോധനഘട്ടത്തിലാണ്.

നിലവിലെ സ്റ്റാറ്റിക്, ഇലക്ട്രിക്കല്‍ പരിശോധനകള്‍ പൂര്‍ത്തിയായാല്‍ ഈ ഡിസ്റ്റന്‍സ്-ടു-ഗോ (DTG) ട്രെയിനിനെ ട്രെയല്‍ റണ്ണിന് വിധേയമാക്കും. . മുന്നോട്ടുള്ള ദൂരം കണക്കാക്കി സുരക്ഷിതമായ രീതിയില്‍ സഞ്ചരിക്കാനുള്ള കഴിവാണ് പരിശോധിക്കുക.