ബെഗംളൂരു: മെട്രോ സ്‌റ്റേഷനുകള്‍ക്ക് സമീപം 10 പുതിയ ബിഎംടിസി ബസ് സ്റ്റോപ്പുകള്‍-നിങ്ങള്‍ക്ക് ഉപകരിക്കുമോ?

മലയാളികളുള്‍പ്പടെ രാജ്യമെമ്പാടുമുള്ള ജനങ്ങള്‍ തിങ്ങിപ്പാര്‍ക്കുന്ന നഗരമാണ് ബെംഗളൂരു. ജോലി ആവശ്യാര്‍ത്ഥമുള്ള ദൈനദിനം യാത്രയ്ക്കിടെ മെട്രോ പിടിക്കാന്‍ ഇവിടെ പലരും ബുദ്ധിമുട്ടാറുണ്ട്. ബസ് സ്റ്റോപ്പുകള്‍ മെട്രോ സ്‌റ്റേഷനുകളില്‍ നിന്നും ദൂരെയായതാണ് കാരണം.

ഈ പ്രശ്‌നത്തിനൊരു ശാശ്വത പരിഹാരവുമായെത്തിയിരിക്കയാണ് ബെംഗളൂരു മെട്രോപോളിറ്റന്‍ ട്രാന്‍സ്‌പോര്‍ട്ട് കോര്‍പ്പറേഷന്‍ (ബിഎംടിസി). പര്‍പ്പിള്‍, ഗ്രീന്‍ ലൈനുകളിലെ 10 മെട്രോ സ്‌റ്റേഷനുകള്‍ക്ക് സമീപമായി അവര്‍ 10 പുതിയ ബസ് സ്റ്റോപ്പുകള്‍ അവതരിപ്പിച്ചിരിക്കുന്നു.

ബാംഗ്ലൂര്‍ മെട്രോ റെയില്‍ കോര്‍പ്പറേഷന്‍ ലിമിറ്റഡും (BMRCL) ബെംഗളൂരു ട്രാഫിക് പോലീസും സംയുക്തമായി നടത്തിയ പരിശോധനകളെത്തുടര്‍ന്നാണ് നടപടി. ബസ് സ്‌റ്റോപ്പുകള്‍ മെട്രോ സ്‌റ്റേഷനുകളില്‍ നിന്നും അകലെയാണെന്ന് യാത്രക്കാര്‍ പരാതി ബോധിപ്പിച്ചു.

മെട്രോ സ്‌റ്റേഷനുകളിലേയ്ക്കുള്ള ബസ് സ്‌റ്റോപ്പുകളില്‍ ഫെബ്രുവരി 5 മുതല്‍ മാറ്റങ്ങള്‍ വന്നിട്ടുണ്ട്. അവ ചുവടെ:

• ട്രിനിറ്റി: 'ബി' പ്രവേശന കവാടത്തിന് സമീപമാണ് പുതിയ സ്റ്റോപ്പ്. (ഹോട്ടല്‍ ഒബ്‌റോയിക്ക് എതിര്‍വശത്ത്). എംജി റോഡില്‍ നിന്ന് ഹലസുരുവിലേക്ക് യാത്ര ചെയ്യുന്നവര്‍ക്ക്‌
  ഈ ബസ് സ്റ്റോപ്പ് ഉപയോഗപ്പെടുത്താം.
• ഹൂഡി: സീതാരാമപാളയയില്‍ നിന്ന് ഗരുഡാചാര്‍പാളയയിലേക്ക് യാത്ര ചെയ്യുന്നവര്‍ക്ക്‌
  'ബി' പ്രവേശന കവാടത്തിന് സമീപമാണ് (ഡി'മാര്‍ട്ടിന് എതിര്‍വശത്ത്) ബസ് സ്റ്റോപ്പ്.
• മഞ്ജുനാഥനഗര്‍: ചിക്കബിദരക്കല്ലില്‍ നിന്ന് നാഗസാന്ദ്രയിലേക്ക് യാത്ര ചെയ്യുന്നവര്‍ക്ക്‌
  മെട്രോ സ്റ്റേഷന് താഴെ 'എ' പ്രവേശന കവാടത്തിന് സമീപം ബസ് പിടിക്കാം.
• പീനിയ: ഗൊരഗുണ്ടേപാളയയില്‍ നിന്ന് പീനിയ ഇന്‍ഡസ്ട്രിയല്‍ ഏരിയയിലേക്ക് യാത്ര ചെയ്യുന്നവര്‍ക്ക്‌ സര്‍വീസ് റോഡില്‍ മെട്രോ സ്റ്റേഷന് എതിര്‍വശത്ത് ബസ് സ്റ്റോപ്പുണ്ട്. പീനിയില്‍ നിന്ന് യാത്ര ചെയ്യുന്ന യാത്രക്കാര്‍ക്കായി 'ബി' പ്രവേശന കവാടത്തിന് സമീപം മെട്രോ സ്റ്റേഷന് താഴെ മറ്റൊരു പുതിയ ബസ് സ്റ്റോപ്പ് നല്‍കി.
• ലാല്‍ബാഗ്: സൗത്ത് എന്‍ഡ് സര്‍ക്കിളില്‍ നിന്ന് നാഷണല്‍ കോളേജിലേക്ക് യാത്ര ചെയ്യുന്ന യാത്രക്കാര്‍ക്ക് 'ബി' പ്രവേശന കവാടത്തിന് സമീപം മെട്രോ സ്റ്റേഷന് അടുത്തായി ബസ് കാത്തുനില്‍ക്കാം.
• സൗത്ത് എന്‍ഡ് സര്‍ക്കിള്‍: ലാല്‍ബാഗില്‍ നിന്ന് ജയനഗറിലേക്ക് യാത്ര ചെയ്യുന്ന യാത്രക്കാര്‍ക്ക് മെട്രോ സ്റ്റേഷന് മുമ്പായി 'എ' പ്രവേശന കവാടത്തിന് സമീപം ബസ് സ്റ്റോപ്പ് നല്‍കിയിരിക്കുന്നു.
• ജെ.പി. നഗര്‍: ബനശങ്കരിയില്‍ നിന്ന് യെലച്ചനഹള്ളിയിലേക്ക് യാത്ര ചെയ്യുന്ന യാത്രക്കാര്‍ക്കായി മെട്രോ സ്റ്റേഷന് എതിര്‍വശത്ത് 'സി' പ്രവേശന കവാടത്തിന് സമീപം ഒരു പുതിയ ബസ് സ്റ്റോപ്പ് അനുവദിച്ചു. യാത്രക്കാര്‍ക്കായി മെട്രോ സ്റ്റേഷന് താഴെ 'ഡി' പ്രവേശന കവാടത്തിന് സമീപം മറ്റൊരു പുതിയ ബസ് സ്റ്റോപ്പും അനുവദിച്ചിട്ടുണ്ട്.
• കൊണനകുണ്ടെ ക്രോസ്: ദൊഡ്ഡക്കല്ലസന്ദ്രയില്‍ നിന്ന് യെലച്ചനഹള്ളിയിലേക്ക് പോകുന്ന യാത്രക്കാര്‍ക്കായി 'എ' പ്രവേശന കവാടത്തിന് സമീപം (സ്തംഭം നമ്പര്‍ 147) ഒരു പുതിയ ബസ് സ്റ്റോപ്പ് അനുവദിച്ചു. കൂടാതെ, യെലച്ചനഹള്ളിയില്‍ നിന്ന് ദൊഡ്ഡക്കല്ലസാന്ദ്രയിലേക്ക് പോകുന്ന യാത്രക്കാര്‍ക്കായി 'ബി' പ്രവേശന കവാടത്തിന് സമീപം (സ്തംഭം നമ്പര്‍ 148) മറ്റൊരു പുതിയ ബസ് സ്റ്റോപ്പും ഒരുക്കിയിട്ടുണ്ട്.
• വജരഹള്ളി: തലഘട്ടപുരയില്‍ നിന്ന് ദൊഡ്ഡക്കല്ലസാന്ദ്രയിലേക്ക് പോകുന്ന യാത്രക്കാര്‍ക്കായി മെട്രോ സ്റ്റേഷന് താഴെ 'ബി' പ്രവേശന കവാടത്തിന് സമീപം ഒരു പുതിയ ബസ് സ്റ്റോപ്പ് തയ്യാറാണ്. ദൊഡ്ഡക്കല്ലസാന്ദ്രയില്‍ നിന്ന് തലഘട്ടപുരയിലേക്ക് യാത്ര ചെയ്യുന്നവര്‍ക്ക്‌ 'എ' പ്രവേശന കവാടത്തിന് സമീപമാണ് പുതിയ ബസ് സ്റ്റോപ്പ്.
• തലഘട്ടപുര: സില്‍ക്ക് ഇന്‍സ്റ്റിറ്റ്യൂട്ടില്‍ നിന്ന് വജരഹള്ളിയിലേക്ക് യാത്ര ചെയ്യുന്ന യാത്രക്കാര്‍ക്ക് 'ബി' പ്രവേശന കവാടത്തിന് സമീപവും വജരയില്‍ നിന്ന് യാത്ര ചെയ്യുന്ന യാത്രക്കാര്‍ക്ക് 'എ' പ്രവേശന കവാടത്തിന് സമീപം മെട്രോ സ്റ്റേഷന് താഴെയുമാണ് പുതിയ ബസ് സ്റ്റോപ്പുകളുള്ളത്.

ഇവയ്ക്ക് പുറമെ മറ്റെല്ലാ മെട്രോ സ്‌റ്റേഷനുകളുടേയും 100 മീറ്റര്‍ പരിധിയില്‍ ബിഎംടിസി ബസ് സ്റ്റോപ്പുകള്‍ ലഭ്യമാണ്. കെമ്പെഗൗഡ അന്താരാഷ്ട്ര വിമാനത്താവളത്തിലേക്ക് യാത്ര ചെയ്യുന്ന യാത്രക്കാര്‍ക്ക്, റൂട്ടിലെ എല്ലാ മെട്രോ സ്റ്റേഷനുകളിലും ബിഎംടിസി വായു വജ്ര ബസ് സ്റ്റോപ്പുകള്‍ പിടിക്കാം. വിമാനത്താവളത്തിലേക്ക് പോകുന്ന യാത്രക്കാര്‍ക്ക് മെട്രോ സ്റ്റേഷനുകളില്‍ നിന്ന് നേരിട്ട് വായു വജ്ര ബസുകളില്‍ കയറാന്‍ സാധിക്കും.