ബെംഗളൂരുവിൽ വീടിന് മുന്നിലെ പാർക്കിംഗിനും ഇനി പണം നൽകണം; പുതിയ ചട്ടങ്ങൾ ഇങ്ങനെ

ബെംഗളൂരുവിൽ വീടുകൾക്ക് മുന്നിലെ സൗജന്യ പാർക്കിംഗ് ഇനി പഴങ്കഥയാകും. നഗരവികസന വകുപ്പ് 'ഗ്രേറ്റർ ബെംഗളൂരു ഏരിയ (ജിബിഎ) പാർക്കിംഗ് ചട്ടങ്ങൾ 2026'-ന്റെ കരട് വിജ്ഞാപനം പുറത്തിറക്കി. നഗരത്തിലുടനീളമുള്ള റസിഡൻഷ്യൽ റോഡുകളിൽ നിലവിൽ പണം നൽകണമെന്നില്ല. എന്നാൽ പുതിയ നയം വരുന്നതോടെ എല്ലാ നഗരപ്രദേശങ്ങളിലും സൗജന്യ റോഡരിക പാർക്കിംഗ് അവസാനിക്കും. ചട്ടങ്ങൾ പ്രാബല്യത്തിൽ വരുന്നതോടെ കാർ ഉടമകൾ വാർഷിക പെർമിറ്റ് എടുക്കുകയോ മണിക്കൂർ അടിസ്ഥാനത്തിൽ പാർക്കിംഗ് ചാർജ് നൽകുകയോ ചെയ്യണം. ഗതാഗതക്കുരുക്ക് കുറയ്ക്കാനും അനധികൃത പാർക്കിംഗ് തടയാനുമാണ് ഈ നീക്കം.

കരട് നിർദേശങ്ങൾ അനുസരിച്ച് നഗരവാസികൾക്ക് വീടിന് മുന്നിലെ റോഡിൽ വാഹനം പാർക്ക് ചെയ്യണമെങ്കിൽ നഗരസഭാ അധികൃതരിൽ നിന്ന് വാർഷിക പെർമിറ്റ് നിർബന്ധമാണ്. ഹാച്ച്ബാക്ക് കാറുകൾക്ക് പ്രതിവർഷം 15,000 രൂപയാണ് പെർമിറ്റ് ഫീസ്. സെഡാൻ കാറുകൾക്ക് 20,000 രൂപയും എസ്‌യുവികൾക്ക് 25,000 രൂപ വരെയുമാണ് വാർഷിക ഫീസ്. അതേസമയം, വാണിജ്യ മേഖലകളിലെ റോഡുകളിൽ പാർക്ക് ചെയ്യുന്നതിന് റോഡിന്റെ തരംതിരിവ് അനുസരിച്ച് മണിക്കൂറിന് 40 മുതൽ 80 രൂപ വരെ നൽകേണ്ടി വരും.

ബെംഗളൂരു പാർക്കിംഗ് കരട് ചട്ടങ്ങൾ 2026: പ്രധാന നിർദേശങ്ങൾ

തിരക്കേറിയ മെട്രോ സ്റ്റേഷനുകൾക്ക് സമീപം 'ഓഫ്-സ്ട്രീറ്റ്' പാർക്കിംഗ് കേന്ദ്രങ്ങൾ പ്രോത്സാഹിപ്പിക്കാനും പദ്ധതിയുണ്ട്. തരിശായി കിടക്കുന്ന സ്വകാര്യ സ്ഥലങ്ങൾ പൊതു പാർക്കിംഗ് കേന്ദ്രങ്ങളാക്കി മാറ്റുന്ന വസ്തു ഉടമകൾക്ക് വസ്തുനികുതിയിൽ ഇളവ് നൽകും. ഇത്തരം ഓഫ്-സ്ട്രീറ്റ് കേന്ദ്രങ്ങളിൽ മണിക്കൂറിന് 20 മുതൽ 40 രൂപ വരെയായിരിക്കും കുറഞ്ഞ നിരക്ക്. കൂടാതെ, പ്രധാന നോ-പാർക്കിംഗ് സോണുകൾ സദാസമയവും നിരീക്ഷിക്കാൻ എൻഫോഴ്സ്മെന്റ് സ്ക്വാഡുകളെയും ഡിജിറ്റൽ പേയ്മെന്റ് സംവിധാനങ്ങളെയും നിയോഗിക്കും. നിർദിഷ്ട പിക്കപ്പ് പോയിന്റുകളിൽ വാഹനങ്ങൾ പരമാവധി അഞ്ച് മിനിറ്റ് മാത്രമേ നിർത്തിയിടാൻ അനുവദിക്കൂ.

നിലവിൽ പൊതുജനങ്ങളുടെ അഭിപ്രായ രൂപീകരണത്തിനായി പുറപ്പെടുവിച്ച കരട് നിർദേശങ്ങളാണിതെന്ന് നഗരസഭാ അധികൃതർ വ്യക്തമാക്കി. പൊതുജനങ്ങൾക്ക് തങ്ങളുടെ നിർദേശങ്ങളും എതിർപ്പുകളും അറിയിക്കാൻ 30 ദിവസത്തെ സമയമുണ്ട്. ജനങ്ങളുടെ പ്രതികരണങ്ങൾ പരിശോധിച്ച ശേഷമായിരിക്കും സംസ്ഥാന സർക്കാർ അന്തിമ നയത്തിന് രൂപം നൽകുക. ബെംഗളൂരുവിലെ യാത്രാ സംസ്കാരത്തെത്തന്നെ മാറ്റിമറിക്കാൻ പോന്നതാണ് ഈ പുതിയ പാർക്കിംഗ് പരിഷ്കാരങ്ങൾ.