ബംഗളൂരു യാത്രക്കാർ ശ്രദ്ധിക്കൂ; റേസ് കോഴ്‌സ് റോഡിൽ ഗതാഗത നിയന്ത്രണം ഡിസംബർ വരെ, റൂട്ടുകൾ ഇങ്ങനെ

ബംഗളൂരുവിലെ റെയ്‌സ് കോഴ്‌സ് റോഡിൽ 60 ദിവസത്തെ ഗതാഗത നിയന്ത്രണം തുടരുകയാണ്. ഒക്‌ടോബർ 11 ഞായറാഴ്ചയായ ഇന്നും റോഡിൽ നിയന്ത്രണം നിലവിലുണ്ട്. മൗര്യ ജങ്ഷൻ മുതൽ ഹരേ കൃഷ്ണ റോഡ് വരെയുള്ള ഭാഗത്ത് ഗ്രേറ്റർ ബംഗളൂരു അതോറിറ്റിയുടെ നേതൃത്വത്തിൽ വൈറ്റ്‌ടോപ്പിങ് പ്രവൃത്തികളും ഓവുചാൽ നിർമാണവുമാണ് നടക്കുന്നത്. സെൻട്രൽ ബിസിനസ് ഡിസ്ട്രിക്റ്റ് (സിബിഡി) ഏരിയയിൽ ബംഗളൂരു ട്രാഫിക് പൊലീസിന്റെ ഗതാഗത നിർദേശങ്ങൾ നിലവിലുണ്ട്. രാവിലെയും വൈകുന്നേരവുമുള്ള തിരക്കേറിയ സമയങ്ങളിൽ യാത്ര വൈകാൻ സാധ്യതയുള്ളതിനാൽ കൃത്യമായി റൂട്ട് പ്ലാൻ ചെയ്ത് ഇതര വഴികൾ തിരഞ്ഞെടുക്കുന്നതാകും നല്ലത്.

ശിവാനന്ദ ജങ്ഷൻ, ട്രൈലൈറ്റ് ജങ്ഷൻ എന്നിവിടങ്ങളിൽ നിന്ന് മൗര്യ ജങ്ഷനിലേക്കുള്ള വാഹനഗതാഗതം പൂർണമായി നിരോധിച്ചിട്ടുണ്ട്. ഒക്ടോബർ 5-ന് ആരംഭിച്ച നിയന്ത്രണങ്ങൾ ഡിസംബർ വരെ തുടരുമെന്ന് പൊലീസ് അറിയിച്ചു. ബിഎംടിസി ബസുകൾ, സ്വകാര്യ ബസുകൾ, ചരക്കുവാഹനങ്ങൾ എന്നിവ വിൻഡ്‌സർ മനോർ, എൽആർഡിഇ ജങ്ഷൻ, ബസവേശ്വര ജങ്ഷൻ വഴിയോ; അല്ലെങ്കിൽ കുമാര കൃപ റോഡ്, ശിവാനന്ദ സർക്കിൾ, ശേഷാദ്രി റോഡ് വഴി മജസ്റ്റിക്, കെ.ആർ. മാർക്കറ്റ് ഭാഗങ്ങളിലേക്കോ തിരിച്ചുവിട്ടിരിക്കുകയാണ്.

റെയ്‌സ് കോഴ്‌സ് റോഡ്: റൂട്ട് മാറ്റങ്ങളും സമയക്രമവും

വിൻഡ്‌സർ മനോർ - എൽആർഡിഇ - ബസവേശ്വര വഴിയും, കുമാര കൃപ - ശിവാനന്ദ - ശേഷാദ്രി റോഡ് വഴിയുമുള്ള യാത്രയാണ് നിലവിൽ കൂടുതൽ സൗകര്യപ്രദം. എന്നാൽ ഓഫീസ് സമയങ്ങളിൽ വിൻഡ്‌സർ മനോർ, ബസവേശ്വര, ശിവാനന്ദ ഫ്ലൈഓവർ ചേരുന്ന ഭാഗങ്ങളിൽ വലിയ ഗതാഗതക്കുരുക്കിന് സാധ്യതയുണ്ട്. മജസ്റ്റിക്, കെ.ആർ. മാർക്കറ്റ് പരിസരങ്ങളിലും വാഹനത്തിരക്ക് വർധിച്ചേക്കാം. ഉച്ചയ്ക്ക് 1:30 മുതൽ ടർഫ് ക്ലബ്ബിൽ കുതിരപ്പന്തയം ആരംഭിക്കുന്നതിനാൽ ഉച്ചയ്ക്ക് ശേഷം ഈ ഭാഗത്ത് വീണ്ടും തിരക്കേറാൻ സാധ്യതയുണ്ട്.

ബിഎംടിസി ബസ് റൂട്ടുകളിലെ മാറ്റവും എയർപോർട്ട് യാത്രക്കാർക്കുള്ള നിർദേശവും

സാങ്കി, കുമാര കൃപ റോഡുകളിലൂടെ പോകുന്ന ബിഎംടിസി ബസുകൾ പൊലീസിന്റെ ഗതാഗത തിരിച്ചുവിടൽ നിർദേശങ്ങൾ പാലിച്ചാണ് സർവീസ് നടത്തുന്നത്. അതിനാൽ വിൻഡ്‌സർ മനോർ, ബസവേശ്വര പരിസരങ്ങളിൽ ബസുകൾ കൂട്ടത്തോടെ കിടക്കാൻ സാധ്യതയുണ്ട്. രാവിലെ 8 മുതൽ 11 വരെയുള്ള സമയത്തും വൈകുന്നേരം 5 മുതൽ 9 വരെയുമുള്ള സമയത്തും മജസ്റ്റിക്, കെ.ആർ. മാർക്കറ്റ് എന്നിവിടങ്ങളിലേക്ക് പോകുന്നവർ 20 മുതൽ 30 മിനിറ്റ് വരെ അധിക സമയം കരുതേണ്ടതുണ്ട്. സിബിഡിയിൽ നിന്ന് വിമാനത്താവളത്തിലേക്ക് പോകുന്നവർ സാങ്കി റോഡ് വഴി മേഖ്രി സർക്കിളിലെത്തി, ഹെബ്ബാൾ - ബെല്ലാരി റോഡ് വഴി യാത്ര ചെയ്യുന്നതാകും നല്ലത്. ക്യാബുകൾ ബുക്ക് ചെയ്യുമ്പോൾ ആവശ്യത്തിന് സമയം കൈയ്യിൽ കരുതാനും ഓർക്കുക.

റൂട്ട് മാപ്പ്, ആംബുലൻസ് പാത, പാർക്കിങ് നിയമങ്ങൾ

ഓൾഡ് ജെഡിഎസ് ഭാഗത്തുനിന്ന് വരുന്നവർ റേസ് വ്യൂവിൽ നിന്ന് ഇടത്തേക്ക് തിരിഞ്ഞ് കുമാര കൃപ വഴി ശിവാനന്ദയിലേക്ക് പോവുക. ട്രൈലൈറ്റിൽ നിന്നുള്ളവർ ശിവാനന്ദ ഫ്ലൈഓവർ കയറി നെഹ്റു സർക്കിൾ, ശേഷാദ്രി റോഡ് വഴി മജസ്റ്റിക്കിലെത്താം. ആംബുലൻസുകൾക്ക് വഴിമാറിക്കൊടുക്കാൻ പ്രത്യേകം ശ്രദ്ധിക്കുക. ആംബുലൻസിന് പോകാൻ വഴി നൽകുന്നതിനായി സിഗ്നൽ മറികടക്കേണ്ടി വന്നാൽ പിഴ ഈടാക്കില്ലെന്ന് ബംഗളൂരു ട്രാഫിക് പൊലീസ് വ്യക്തമാക്കിയിട്ടുണ്ട്. സിബിഡി മേഖലയിൽ ടോയിങ് പുനരാരംഭിച്ചതിനാൽ ജങ്ഷനുകളിലും ബാരിക്കേഡുകൾക്ക് സമീപത്തും വാഹനങ്ങൾ പാർക്ക് ചെയ്യരുത്.